Mensahe iti Visiting Teaching, Pebrero 2015
Dagiti Kababalin ni Jesucristo: Awanan Basol
Nainkararagan nga adalenyo daytoy a material ken kalikagumanyo nga ammuen no ania ti ibinglayyo. Kasano a ti pannakaawatyo iti biag ken mision ti Mangisalakan ket mangpapigsa iti pammatiyo Kenkuana ken mangparabur kadagiti ay-aywananyo babaen ti visiting teaching? Para iti ad-adu pay nga impormasion, mapan iti reliefsociety.lds.org.
Pammati, Pamilia, Tulong
Ti Mangisalakantayo, ni Jesucristo, ti kakaisuna a makabael a mangaramid iti pannubbot para iti sangkataw-an. “Ni Jesucristo, ti Karnero nga awanan iti mulit, siaayat nga impaiddana ti Bagina iti rabaw ti altar a pagidatonan ket inkarona dagiti basbasoltayo,” kinuna ni Presidente Dieter F. Uchtdorf, Maikadua a Mammagbaga iti Umuna a Panguluen.1Iti pannakaawat nga awan basolna ni Jesucristo ket makatulong kadatayo a mangpadakkel iti pammatitayo Kenkuana ken mangikarigatantayo nga aggtungpal kadagiti bilinna, agbabawi, ken agbalin a natarnaw.
“Ni Jesus ket …maysa a nabiag nga addaan lasag ken espiritu, ngem saan a nagpasulisog (kitaen iti Mosiah 15:5),” kinuna ni Elder D. Todd Christofferson ti Korum dagiti Sangapulo-ket-dua nga Apostol. “Makaasidegtayo Kenkuana … gapu ta maawatanna. Maawatanna ti pannakibakal, ket maawatanna pay no kasano ti panangabak iti pannakibakal. …
“… Ti bileg ti Pannubbotna ket mabalinna a pugasen dagiti epekto ti basol kadatayo. No agbabawitayo, ti pangsubbot a paraburna ket mangikalintegan ken mangdalus kadatayo (kitaen iti 3 Nephi 27:16–20). Daytoy ket no saantayo a nagpaabak, no saantayo a nagpasulisog.
“No itrabahotayo iti inaldaw ken linawas a mangsurot iti dalan ni Cristo, ipatalged ti espiritu ti kinaindaklanna, tumalinaay ti dangadang iti kaunggan, ken agsardeng a mangriribuk dagiti pannulisog.”2
Dagiti Mainayon a Nasantuan a Kasuratan
Manipud kadagiti Nasantuan a Kasuratan
Inkaro ti Mangisalakan dagiti basbasoltayo babaen ti nadiosan a Kinaanakna, ti awan basolna a biagna, ti panagsagaba ken ti panagsayasay ti darana iti Minuyongan ti Getsemani, ti ipapatayna iti krus ken ti Panagungarna manipud iti tanem. Babaen ti Pannubbot ni Jesucristo, makapagbalintayo a nadalus manen no agbabawitayo kadagiti basbasoltayao.
Insuro ni Ari Benjamin kadagiti taona maipapan iti Pannubbot ni Jesucristo ket kalpasanna sinaludsodna ida no mamatida kadagiti balikasna. “Sangsangkamaysada a nangidir-i, a kinunada: ti Espiritu … nangipaay iti naindaklan a panagbalbaliw kadakami, wenno iti puspusomi, nga awanen kadakami ti tarigagay nga agaramid iti kinadakes, ngem ti ketdi agtultuloy a panagaramid iti kinaimbag. …
“Ket siaayatkami a makitulag iti Diosmi nga agaramid iti pagayatanna, ken agtungpal kadagiti bilinna iti amin a banag” (Mosiah 5:1–2, 5).
Mabalintayo met ti maaddaan iti “naindaklan a panagbalbaliw” kas kadagiti tao ni Ari Benjamin, nga “awanen ti tarigagay nga agaramid iti kinadakes, ngem agtultuloy a panagaramid iti kinaimbag” (Mosiah 5:2).
© 2015 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/14. Pannakaanamongna a maipatarus: 6/14. Pannakaipatarus ti Visiting Teaching Message, February 2015. Ilokano. 12582 864
Ibilang Daytoy
Kasano a maigiddiat ti panagbalin a natarnaw iti panagbalin a naan-anay?