Messaġġ tal-Għalliema taż-Żjajjar, Februari 2015
Il-Kwalitajiet ta’ Ġesù Kristu: Mingħajr Dnub
Bl-għajnuna tat-talb studja dan il-materjal u fittex sabiex tkun taf x’ għandek taqsam ma’ ħutek. Kif jista’ l-għarfien tiegħek tal-ħajja tas-Salvatur u l-irwol Tiegħu jgħinek tkabbar il-fidi tiegħek fih u tbierek lil dawk li int responsabbli minnhom permezz tat-tagħlim taż-żjajjar? Għal aktar informazzjoni, żuru reliefsociety.lds.org.
Fidi, Familja, Għajnuna
Is-Salvatur tagħna, Ġesù Kristu, kien l-uniku wieħed li kapaċi jwettaq l-Att tal-Fidwa għall-umanità. “Ġesù Kristu, il-Ħaruf ta’ Alla mingħajr tebgħa, minn jeddu, qiegħed lilu nnifsu fuq l-altar tas-sagrifiċċju u ħallas il-prezz għal dnubietna,” qal il-President Dieter F. Uchtdorf, it-Tieni Kunsillier fl-Ewwel Presidenza.1 Li aħna nifhmu li Ġesù Kristu kien mingħajr dnub jgħinna nkabbru l-fidi tagħna fih u nagħmlu dak kollu li nistgħu biex inżommu l-kmandamenti Tiegħu, nindmu u nsiru safja.
“Ġesù kien …esseru tad-demm u l-laħam kif ukoll spirtu, iżda Huwa ma waqax għat-tentazzjoni (ara Mosiah 15:5),” qal il-Presbiteru D. Todd Christofferson tal-Kworum tat-Tnax-il Appostlu. “Nistgħu nduru lejh … għax Huwa jifhimna. Huwa jifhem t-taqbida tagħna, u huwa jifhem ukoll kif nistgħu nirbħu dik it-taqbida. …
“… Il-qawwa tal-Att tal-Fidwa Tiegħu tista’ teħlisna mill-effett tad-dnub li jinsab fina. Meta aħna nindmu, il-grazzja tal-Att tal-Fidwa Tiegħu tiġġustifikana u tnaddafna (ara 3 Nephi 27:16–20). Inkunu qisna qatt ma waqajna, bħallikieku ma ħallejniex it-tentazzjoni tegħlibna.
“Hekk kif nagħmlu li nistgħu, jum wara jum u ġimgħa wara ġimgħa, biex nimxu fit-triq ta’ Kristu, l-ispirtu tagħna juri l-qawwa tiegħu, il-battalja ta’ ġo fina tieqaf u t-tentazzjoni ma tibqax aktar tinkwetana.”2
Skrittura Addizzjonali
Mill-Iskrittura
Is-Salvatur ħallas il-prezz ta’ dnubietna permezz tal-istat divin Tiegħu bħala Iben Alla, permezz tal-ħajja mingħajr dnub Tiegħu, permezz tas-sofferenza Tiegħu u peress li xerred demmu fil-Ġnien tal-Ġetsemani, permezz tal-mewt Tiegħu fuq is-salib u permezz tar-Reżurezzjoni Tiegħu mill-qabar. Permezz tal-Att tal-Fidwa ta’ Ġesù Kristu, aħna nistgħu nerġgħu nindafu hekk kif nindmu minn dnubietna.
Is-Sultan Benjamin għallem lin-nies tiegħu dwar l-Att tal-Fidwa ta’ Ġesù Kristu u mbagħad staqsiehom jekk kinux jemmnu kliemu. “Ilkoll għajtu b’ vuċi waħda, qalu: … l-Ispirtu … ġab bidla kbira fina, jew f’ qalbna, li aħna m’ għandniex dispożizzjoni aktar li nagħmlu l-ħażin, iżda li nagħmlu t-tajjeb kontinwament. …
“U aħna lesti li nidħlu f’ patt ma’ Alla tagħna li nagħmlu r-rieda tiegħu, u nkunu ubbidjenti lejn il-kmandamenti tiegħu f’ kull ħaġa” (Mosiah 5:1–2, 5).
Aħna wkoll nistgħu nesperjenzaw “bidla kbira” bħan-nies tas-Sultan Benjamin, li ma kellhomx “dispożizzjoni aktar li jagħmlu l-ħażin, iżda li jagħmlu t-tajjeb kontinwament” (Mosiah 5:2).
© 2015 minn Intellectual Reserve, Inc. Id-drittijiet kollha riservati. Stampat fil-Ġermanja. Approvazzjoni bl-Ingliż: 6/14. Approvazzjoni tat-traduzzjoni: 6/14. Traduzzjoni ta’ Visiting Teaching Message, February 2015. Maltese. 12582 159
Ikkunsidra Dan
Li tkun safi kif inhu differenti minn li tkun perfett?