Lamharon
Kadalag-an paagi kay Jesucristo
May ara ako sing problema sa pagkaon sing sobrasobra. Ang akon sulit-sulit nga pagpaningaon sing sobra nagdulot sang makatulublag nga pagkakonsensya, kapaslawan kag pagkadismaya. Ginaluyahan ako kon ginatinguhaan ko nga daugon ang akon problema.
Sa malawig nga panahon ginpabayaan ko ang kamatuoran nga ang Pagpasag-uli [Atonement] sang Manluluwas wala lamang nagaluwas sa aton kundi subong man nagatubos sa atonkag nagaperpekto sa aton, kag nga ini nagakaigo man sa akon athagon nga indi-husto nga ugali sa pagkaon sing sobrasobra.
Nagpamat-od ako nga itugyan ang akon kaugalingon sa Manluluwas. Nagpangamuyo ako. Sinsero ko nga gin-ako ang akon kahuyang kag ang akon pagkinahanglan sang grasya, kag dayon nagpangabay ako sa Langitnon nga Amay nga bendisyunan ako sang Iya diosnon nga bulig sa maabot nga adlaw. Sina nga gab-i nabatyagan ko ang pagpasalig sang isa ka mapinalanggaon nga Amay nga may yara Sia sing di-matungkad nga handum sa pagbulig sa Iya anak kag sang di-madaug nga gahum agud matuman ang Iya pagbuot.
Sumugod sadto nga gab-i ang pagkaon wala na sing pareho kadako nga impluwensya sa akon. Nakahibalo ako nga si Jesucristo amo ang rason sang akon kadalag-an. Pareho kay Pablo, nagatuon ako nga “maghimo ako sang tanan nga butang paagi kay Jesucristo nga nagapabakod sa akon” (Mga Taga-Filipos 4:13). Kag akon ginatinguhaan nga indi gid malipat sang isa pa ka leksyon gikan kay Pablo: “Apang salamat sa Dios, nga nagahatag sa aton sang pagdaug paagi sa aton Ginuong Jesucristo” (1 Mga Taga Corinto15:57).