Mensahe sang Unang Panguluhan, Marso 2015
Ginahakos sang Iya Mapinalanggaon nga mga Butkon
Pareho sang kadam-an, masami ako nga nagakainspirar sa matahum nga mga buhat sang arte kag musika. Isa ka subong nga okasyon amo sang nagatindog ako sa atubang sang isa ka obra-maestra nga ginpinta sang isa ka Danish nga pintor nga si Frans Schwarz nga gintig-ulohan Ang Kasakit sa Hardin1
Ining masyado katahum nga painting nagapakita nga ang Manluluwas nagaluhod sa Hardin sang Getsemani. Samtang Sia nagapangamuyo, isa ka anghel ang nagtindog sa tupad Niya, nga ginahakos Sia sang mapinalanggaon nga mga butkon, nagatanyag sing kaumpawan, langitnon nga bulig, kag suporta.
Mas malawig ko nga ginatulok ining painting, mas labi na gid nga napuno ang akon tagipusuon kag hunahuna sing indi mapabutyag nga mga balatyagon sang pagpalangga kag pagpasalamat. Akon mabatyagan, sing diutay, kon paano ang mangin yara sang ang Manluluwas nagsugod sang Iya pinakadako nga buluhaton sa sini nga kabuhi paagi sa pag-ako sa Iya Kaugalingon sang mga sala sang kalibutan. Nahalawhaw ako sa wala’y dulunan nga gugma kag kaluoy sang Amay para sa Iya mga anak. Nagabatyag ako sang wala’y tupong nga kapasalamatan para sa ginhimo sang wala’y sala nga Anak para sa tanan nga katawhan kag para sa akon.
Ang Pagsakripisyo sang Anak sang Dios
Sa tagsa katuig sini nga panahon aton ginadumdom kag ginabinagbinag ang ginhimo nga pagsakripisyo ni Jesucristo para sa tanan nga katawhan.
Ang ginhimo sang Manluluwas gikan sa Getsemani pakadto sa Golgota para sa aton sobra katama sangsa akon sarang mahangpan. Gin-ako Niya sa Iya kaugalingon ang kabug-at sang aton mga sala kag ginbayaran ang wala’y katapusan kag ginakinahanglan nga pagtubos indi lamang para sa kalapasan ni Adan kundi para man sa mga sala kag kalapasan sang binilyon nga mga kalag nga nagkabuhi. Ining wala’y katapusan, sagrado nga pagsakripisyo rason nga “bisan pa ang Dios, ang pinakagamhanan sa tanan, nga magkurog tungod sang kasakit, kag magwaan sang dugo sa tagsa ka buho sang panit, kag mag-antos alangay sa lawas kag espiritu“ (D&C 19:18).
Nag-antos Sia para sa akon.
Nag-antos Sia para sa inyo.
Ang akon kalag nagapalanglapaw sang kapasalamatan kon akon ginabinagbinag ang dako nga kahulugan sini nga pagsakripisyo. Nagabatyag ako sing pagpaubos nga mahibaloan nga ang tanan nga nagabaton sining dulot kag nagasentro sang ila mga tagipusuon sa Iya sarang mapatawad kag matinluan sang ila mga sala, ano man kaitom sang ila mantsa ukon ano man kabug-at sang ila mga ginapas-an.
Sarang kita mangin mga wala’y dagta kag mangin puraw liwat. Sarang kita matubos paagi sa wala’y katapusan nga pagsakripisyo sang aton pinalangga nga Manluluwas.
Sin-o ang Magpaumpaw sa Aton?
Bisan nga wala gid sa aton ang magaeksperiyensya sang kadalumon sang gin-antos sang aton Manluluwas, isa-isa kita ang tagsa sa aton magaangkon sang madulom kag mapait nga tinion— mga panahon nga ang aton mga kasubo kag kalisud daw mas mabug-at pa sangsa aton masarangan. May mga tinion nga ang kabug-at kag kabasulanan sang aton mga sala magaduot sing wala’y kaluoy sa aton.
Bisan pa nga amo sina, kon aton itugyan ang aton mga tagipusuon sa Ginuo sa tinion nga subong sina, pat-od gid nga Sia makahibalo kag makahangop. Sia nga nag-antos sing indi maiyaiyahon para sa aton sa hardin kag sa krus indi magabiya sa aton nga wala sing kaumpawan sa karon. Sia magapabakod, magapaisog, kag magapakamaayo sa aton. Pagahakson Niya kita sa Iya mapinalanggaon nga mga butkon.
Mangin labaw pa Sia sa isa ka anghel sa aton.
Iya kita nga hatagan sang kaumpawan, pagpaayo, paglaum, kag kapatawaran.
Bangod Sia ang aton Manunubos.
Ang aton Manughilway.
Ang aton maluluy-on kag balaan nga Dios.
© 2015 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/14. Petsa sang pagtugot sa paglubad: 6/14. Paglubad sang First Presidency Message, March 2015. Hiligaynon. 12583 861
Pagtudlo gikan sa Sining Mensahe
Antes kamo magtudlo, pangabaya ang paggiya sang Espiritu nga buligan kamo nga mahangpan ang mga panginahanglan sang inyo mga ginatudloan. Sa inyo pagpaambit sang mga bahin gikan sa mensahe ni Pangulong Uchtdorf, magpaambit sang panaksihon parte sa Manluluwas kag sang Iya nagatubos nga pag-antos. Binagbinaga ang pagpamangkot sa inyo ginatudloan kon ano ang kahulugan sang Iya Pagpasag-uli para sa ila kag kon paano nila nabatyagan ang pagpaumpaw sang Ginuo sa ila “madulom kag mapait nga mga tinion.”