Mensahe sa Visiting Teaching, Marso 2015
Ang mga Kinaiya ni Jesucristo: Mainantuson kag Mapainumuron
Tun-i sing mainampuon ining materyal kag magpangamuyo agud mahibaloan kon ano ang ipaambit. Paano ang paghangop sa kabuhi kag katungdanan sang Manluluwas makapadugang sang inyo pagtuo sa Iya kag magabugay sa ila nga inyo ginabantayan paagi sa visiting teaching? Para sa dugang nga impormasyon, maglog-on sa reliefsociety.lds.org.
Pagtuo, Pamilya, Bulig
Ang pagpaumod masami nga ginapensar nga isa ka malinong, indi aktibo nga pamatasan, apang si Pangulong Dieter F. Uchtdorf, Ika-duhang Manuglaygay sa Unang Panguluhan, nagsiling, “Ang pagpaumod indi isa ka pagpangampo, indi man ini isa ka kapaslawan sa pag-akto tungod sang aton mga kahadlok. Ang pagpaumod nagakahulugan sing aktibo nga paghulat kag pagbatas. Ini nagakahulugan sang pagpadayon sa isa ka butang… bisan pa nga ang handum sang aton mga tagipusuon nagakaatrasar. Ang pagpaumod indi lamang ang pagbatas; kundi ang pagbatas sing maayo!”
Sa aton kabuhi antes sa duta, ang aton Amay nga Langitnon nagpreparar sang isa ka plano para sa aton—ang Iya kabataan sa espiritu—kag naghinugyaw kita sa kalipay sa oportunidad nga makakari sa duta (tan-awa sa Job 38:7 Sa aton pagpili nga iuyon ang aton pagbuot sa Iya pagbuot sa tion sang aton dutan-on nga kabuhi, Sia “magahimo sang isa ka galamiton para sa [aton] sa [Iya] mga kamot tuhoy sa kaluwasan sang madamo nga mga kalag” (Alma 17:11).
Si Pangulong Uchtdorf nagpadayon, “Ang pagpaumod nagakahulugan sa pagbaton sinang indi na mabag-o kag pag-atubang sini sing may kaisog, grasya, kag pagtuo. Ini nagakahulugan sang ‘pagkahanda sa pagsunod sang tanan nga butang nga ginatan-aw sang Ginuo nga nagakabagay nga ipatuman sa [aton], bisan subong sang isa ka bata nga nagasunod sa iya amay’ (Mosias 3:19). Sa katapusan, ang pagpaumod nagakahulugan sang pagmangin ‘mabakod, kag malig-on, kag di-malingkang sa pagtuman sang mga kasuguan sang Ginuo’ [1 Nefi 2:10], tagsa ka oras sa tagsa ka adlaw, bisan pa kon ini mabudlay himuon.”1
Dugang nga Balaan nga mga Kasulatan
Mga Salmo 40:1; Mga Taga-Galacia 5:22–23; 2 Pedro 1:6; Alma 17:11
Gikan sa Balaan nga mga Kasulatan
Ang balaan nga mga kasulatan nagahambal sa aton nga sa aton dutan-on nga kabuhi, kita dapat nga “magmangin mapainumuron sa kapipit-an, kay [may yara kita] sing madamo.” Nian ang Dios naghatag sa aton sining nagapaumpaw nga promisa, “Batasa sila, kay, yari karon Ako nagaupod sa imo, tubtob sa katapusan sang imo kabuhi” (D&C 24:8).
Ang masunod nga estorya sa Biblia isa ka halimbawa sang pagpaumod kag pagtuo.
“Kag ang babayi nga may tagas sang dugo sing napulog duha katuig … nagtandog sang sidsid sang kunop ni [Cristo]: kag sa gilayon natugon [nauntat] ang pagtagas sang iya dugo.
“Kag si Jesus nagsiling, … May isa nga nagtandog sa akon; kay nabatyagan ko nga ang gahum naggwa sa akon.
“Kag sang makita sang babayi nga wala sia malipdi, nagpalapit sia nga nagakurog, kag sang nagayaub sia sa atubangan niya nag-asoy sa atubangan sang tanan nga katawhan kon sa anong kabangdanan nagtandog sia sa iya, kag kon paano nga nag-ayo sia gilayon.
“Kag si Jesus nagsiling sia sa iya, Anak, ang imo pagtuo nag-ayo sa imo; lakat sa paghidaet.” (Lucas 8:43–48).
Kasubong niya, sarang kita makasalapo sang pagpakamaayo kag pagpaumpaw, kag bisan pagpang-ayo, sa aton pagdab-ot kay Jesucristo— nga ang Iya Pagpasag-uli sarang magpaayo sa aton.
© 2015 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/14. Petsa sang pagtugot sa paglubad: 6/14. Paglubad sang Visiting Teaching Message, March 2015. Hiligaynon. 12583 861
Binagbinaga Ini
Gikan sa kasaysayan sa Lucas 8, paano ang tinuig nga pagpaumod sining babayi kag dayun ang iya pagtuo kay Jesucristo ginpadyaan?