President a Odzi Kan na n’Apamfo Amandzɛɛbɔ, Ɛbɔw 2015
N’Abasa Botoo no Etwa Hɛnho Ehyia
Tse dɛ nyimpa pii no, emi so mber pii na meenya nkuranhyɛ wɔ nsaano mfonyin a ɔyɛ fɛw na ndwom mu. Aber kor a ɔtse dɛm yɛ ber a nna migyina nsaano mfonyin mapã bi a Danishnyi Frans Schwarz a ɔyɛ mfonyinyɛnyi yɛɛ a ɔtoo no dzin The Agony in the Garden1 no enyim.
Dɛm nsaano mfonyin fɛɛfɛw a ɔma awerɛhowdzi kɛse yi na ɔkyerɛ ber a nna Agyenkwa no ebu ntwɛr wɔ Gethsemane Ture no mu no. Ɔrobɔ mpaa no, sor bɔfo bi gyina Ne nkyɛn, dze nsa efua No bɔkɔɔ, rema no awerɛkyekyer, ɔsor mboa na tsipia.
Mber tsentsen ara a modwendwen dɛm nsaano mfonyin yi ho no, dɛmara so na m’akoma na m’adwen hyɛ mã wɔ atsenkã a ɔma me botooyɛ na ndaase kɛse a murunntum nnkyerɛ mpo. Mutum minya nsusui kumaabi, wɔ mbrɛ nna ɔtse dɛ mowɔ hɔ aber a Agyenkwa no ɔhyɛɛ no honam mu dwumadzi nhyehyɛɛ kɛse no ase dze gyee wiadze bɔn nyina too no Ho do no. Mobɔhu wɔ ɔdɔ a ɔmmbɔ adze da nye ehumbɔbɔr a Egya no wɔ dze ma Ne mba. Medze enyisɔ kɛse a ɔhyɛ m’akoma mã dze ma Ɔbabanyin no a bɔn nnyi no ho yi yɛe dze maa adasamba na emi.
Nyankopɔn Ne Ba no N’afɔrbɔ.
Afe biara wɔ dɛm aber yi yɛkaa na yɛdwendwen Jesus Christ N’afɔr a ɔbɔe dze maa adasamba nyina no ho.
Adze a Agyenkwa no gyinaa hɛn anan mu yɛe fitsi Gethsemane kodur Golgotha no ɔbor me ntseasee do. Ɔgyee hɛn bɔn ho adzesoa too No do na oenntua onnyiewiei na ngyinanmu kaw a otsim amma Adam n’ahyɛse mfom no nkotsee na mbom so ɔdze maa bɔn na mfom a ɔwɔ hɔ ma akra ɔpepepem dze bɔ ɔpepepem do a wɔatsena nkwa mu da so. Dɛm onnyiewiei afɔrbɔ krɔnkrɔn yi maa “Nyame a mo sō sen obiara mpo, moho popoe osian yaw ntsi, na bɔgya fii mo honandua enyi nyina kyii, na muhun amandze wɔ honam nye sunsum mu” (N&A 19:18).
Ohun amandze maa me.
Ohun amandze maa wo.
Sɛ modwendwen dɛm afɔrbɔ a ɔsom bo yi ntsease ho a, ɔma me kra n’enyisɔ bu do. Ɔma minya mberɛwyɛ dɛ muhu dɛ dodow biara a wɔbɛgye dɛm akyɛdze yi na wɔbɛdan hɔn akoma ama No no benya bɔnfakyɛ na wɔatsew hɔn ho efi hɔn bɔn ho, ɔmmfa ho dɛ mbrɛ hɔn nkekãa si dum anaaso dɛ mbrɛ hɔn adzesoa si hyɛ hɔn do.
Obotum eyi hɛn nkekãa ma hɛn ho atsew bio. Hɛn Agyenkwa dɔfo no no onnyiewiei afɔrbɔ no botum agye hɛn.
Woana Bɛma Hɛn Awerɛkyekyer?
Hɛn mu biara nnkotum enya fasusu wɔ Ewuradze N’amandzehu no dur mu mbrɛ ɔtse dze, naaso wɔ aber a hɛn awerɛhow ɔnye hɛn yawdzi bɛyɛ dɛ ɔsõ kyɛn dza yebotum asoa no, na yebenya hɛnara hɛn sum na wenwen mber— Mber bi bɛba a hɛn bɔn na mfehoekyir no mu duryɛ bɔhom hɛn do a ehumbɔbɔr biara nnyi mu.
Sɛ ɔtse dɛm mpo, na sɛ yɛbɛma hɛn akoma do ama Ewuradze wɔ dɛm mber no a, nokwar ara Obohu na Ɔatse ase. Ɔno a ɔdze etuhoakyɛ dze hun amandze maa hɛn wɔ ture no mu na mbeamudua no do no nnkegyaa hɛn a ɔremma hɛn awerɛkyekyer. Ɔbɛhyɛ hɛn dzen, Ahyɛ hɛn nkuran, na Oehyira hɛn. Ɔdze n’abasa botoo no botwa hɛn ho ehyia.
Ɔbɛkyɛn ɔsor bɔfo ama hɛn.
Ɔdze awerɛkyekyer nhyira, ayarsã, enyidado, na bɔnfakyɛ bɛbrɛ hɛn.
Ɔnam dɛ Ɔno nye hɛn Pomfo.
Hɛn Gyefo
Hɛn Agyenkwa mbɔbɔrhufo na nhyira Nyankopɔn.
© 2015 Intellectual Reserve, Inc. Wɔakora ho tumdzi nyina. USA na wotsintsimii. Ngyirisi kasa ho mpendo: 6/14. Nkyereasee ho mpendo: 6/14. First Presidency Message, March 2015. Fante. 12583 502 ne Nkyerɛasee
Erekyerɛkyerɛ efi Amandzɛɛbɔ Yi Mu
Ansaana ebɛkyerɛ no, hwehwɛ Sunsum no kwankyerɛ ma ɔmboa na fa nya ndzɛmba pɔtsee a hɔn ho hia ma hɔn a erekyerɛ hɔn adze no. Sɛ ekɔdo nye hɔn kyɛ nyiyimu fi President Uchtdorf n’amamndzɛɛbɔ no mu a, gye dase wɔ Agyenkwa no na No mponee afɔrbɔ ho. Dwen ho dɛ ibebisa hɔn a erekyerɛ hɔn no mbrɛ Werdambɔ no si hia ma hɔn na mbrɛ woesi enya atsenkã wɔ Ewuradze n’awerɛkyekyer wɔ hɔn “sum na dɔnhwer wenwen” aber bi mu.”