Visiting Teaching Amandzɛɛbɔ, Ɛbɔw 2015
Jesus Christ no Su: Penkyɛr na Abotar
Mpaabɔ mu ara sũa adzesũadze yi na hwehwɛ dɛ ibohu dza ebɛkyɛ. Eretse Agyenkwa N’abrabɔ na no dwuma horow ase besi dɛn ato wo gyedzi mu wɔ No mu ma oehyira hɔn a idua visiting teaching do hwɛ hɔn do no? Ho nsɛm mbordo no, kɔ reliefsociety.lds.org.
Gyedzi, Ebusua, Mboa
Abotar yɛ biribi a wɔtɔ dɛ wɔdwen ho dɛ ɔyɛ komm, na ɔnnkekã no ho, naaso President Dieter F. Uchtdorf, Ɔpamfo a Otsia Ebien wɔ President a Odzi Kan na n’Apamfo mu no, kãa dɛ, “Abotar nnyɛ biribi a ogyaa na ɔnnkekã no ho, anaa onntum nnyɛ biribi a ɔnam hɛn suro ntsi. Abotar kyerɛ dɛ edze nkekãho rotweɔn na itsintsim. Ɔkyerɛ dɛ enye biribi bɛtsena …mpo ber a hɛn akoma mu apɛdze no rekyɛr no. Abotar nnyɛ dɛ iritsintsim ekodu ewiei ara; ɔyɛ dɛ iritsintsim ekodu ewiei yie!
Abrabɔ a ansaana nyimpa reba asaase do no, hɛn Egya a ɔwɔ Sor yɛɛ nhyehyɛɛ maa hɛn—No sunsum mu mba—na yɛdze enyigye bɔɔ osē wɔ akwanya a yɛdze reba asaase do. (hwɛ Job 38:7). Dɛ mbrɛ yɛfa na yɛdze hɛn pɛ fãm Ne dze ho wɔ hɛn asaase yi do abrabɔ mu no, “Ɔbɛyɛ hɛn edwindadze wɔ Ne nsamu dze ama akra pii enya nkwagye” (Alma 17:11).
President Uchtdorf sɔɔw do, “Abotar kyerɛ dɛ eregye dza nnkotum asesã ato mu na edze akokodur, adom, na gyedzi dze rigyina ano. Ɔkyerɛ dɛ “enya pɛ dɛ [yɛ]bɔsɔw biribiara a Ewuradze noara nyim dɛ oye dɛ ɔdze ba [hɛn] do, koraa mpo dɛ mbrɛ abofra gyaa noho ma n’egya no” [Mosiah 3:19]. Ewiei no, abotar kyerɛ dɛ ‘igyina pintsinn na itsintsim, na innkehihim da, dze etsie Ewuradze na mbrasɛm no’ [1 Nephi 2:10] dɔnhwer biara wɔ dabiara, mpo koraa dɛ ɔyɛ dzen dɛ yebotum ayɛ dɛm a.”1
Kyerɛwsɛm a Ɔkã ho
Fi Kyerɛwsɛm no mu
Kyerɛwsem no kã kyerɛ hɛn dɛ wɔ hɛn asaase yi do abrabɔ mu no ɔsɛ dɛ “yenya abotar wɔ amandzehu mu, osiandɛ yebohu pii.” Na afei Nyankopɔn ma hɛn dɛm awerɛkykyer bɔhyɛ yi, “Sɔw ne nyina, na hwɛ, menye wo wɔ hɔ, kesi wo nda ewiei mpo” (N&A 24:8).
Bible mu abakɔsɛm a odzi do yɛ fasusu ma abotar na gyedzi.
“Na ɔbaa bi a oenya bɔgyaagu mfe duebien…kãa [Christ] atar ano ndwow; na amonmu hɔ ara na no bɔgyaagu twae.
“Na Jesus see dɛ, … Obi akã me, na mehu dɛ ahoɔdzen efi mo mu kɔ.
“Na ɔbaa no hun dɛ oennsuma no, ɔdze ahopopo bae, na ɔbɔhwee n’enyim na ɔkãa adze kor a osian ntsi ma ɔkãa no, na mbrɛ no ho yɛɛ no dzen amonmu hɔ ara kyerɛɛ no wɔ nkorɔfo nyina enyim.
“Na ɔsee no dɛ, Babaa, ahotɔ nkã wo, wo gyedzi agye wo, kɔ asomdwee mu” (Luke 8:43–48).
Tse dɛ ɔno no, yebotum enya nhyira na abotɔyamu, na mpo ayarsa, wɔ aber a yɛtwe kɔ Jesus Christ—a no Werdambɔ botum asa hɛn yar no hɔ.
© 2015 Intellectual Reserve, Inc. Wɔakora ho tumdzi nyina. USA na wotsintsimii. Ngyirisi kasa ho mpendo: 6/14. Nkyereasee ho mpendo: 6/14. Visiting Teaching Message, March 2015. Fante. 12583 502 ne Nkyerɛasee
Susu Iyi
Yɛfa nsɛnkã a ɔwɔ Luke 8 mu a, ebɛn kwan na dɛm basia yi ne mfe a ɔdze siee abotar na ne gyedzi wɔ Jesus Christ mu no maa onyaa mu mfaso.