Lamharon
Sarah sa Iban nga Tawo
Ang tagsulat nagaistar sa Utah, Estados Unidos sang Amerika.
Nabudlayan ako sang una nga gamiton ang akon mga ginapatihan sa pagsabat sa simple nga pamangkot pareho sang “Ngaa wala ka nagainom sang kape?” Sang una nagahimo ako sang mga balibad pareho sang “Kapait kaayo” or “Indi ako nanamian sang sabor.”
Ngaa bala nga nahuya ako? Ngaa bala nga nahadlok ako kaayo nga magtindog para sa kon ano ang akon ginapatihan? Kon akon balikan sa karon, indi ko gid mahangpan kon ngaa nahadlok ako. Pero madumduman ko kon san-o ako nag-untat sa pagpanago sa likod sang mga balibad.
Isa ka adlaw sa akon klase sa English sa high school, ang teacher nag-anunsyu nga magatan-aw kami sang palagwaon sa tv nga nahibal-an ko nga indi ko dapat lantawon. Samtang ang iban nga mga estudyante naghinugyaw sa kalangkag, ang akon kaklase nga si Sarah nag-alsa sang iya kamot kag nagpamangkot kon pwede sia maggwa.
Sang ginpamangkot sia sang maestra kon ngaa, si Sarah nagsabat sing prangka, “Tungod isa ako ka Mormon kag wala ako nagatan-aw sang mga palagwaon nga may pamuyayaw.”
Ang iya kaisog sa pagtindog sa tunga sang klase makadalayaw. Salamat kay Sarah, ako man, nagtindog kag naghulat sa gwa nga may matinlo nga konsyensya hasta matapos ang palagwaon.
Dalayon ako nga nag-bag-o. Nagsugod ako sa pagpaathag sang akon mga ginapatihan imbis nga maglikaw sa topiko. Bilang resulta, nakaangkon ako sang kompiyansa sa akon kaugalingon kag mas nagpartisipar pa gid sa mga kahiwatan sa Simbahan kag sa eskwelahan.
Wala ko gid masugiran si Sarah kon paano ka makahulugan sa akon ang iya halimbawa, apang ginatinguhaan ko nga sundon ang iya halimbawa sang kompiyansa. Akon na karon nahangpan nga ang pagkamiyembro sa dalayawon, sagrado nga Simbahan sang Dios indi gid dapat ikahuya. Kabay nga sarang ako, paagi sa akon halimbawa, mangin isa ka Sarah sa iban nga tawo.