Mensahe sa Visiting Teaching, Abril 2015
Mga Kinaiya ni Jesucristo: Wala sing Limbong ukon Pagkasalimpapaw
Tun-i sing mainampuon ining materyal kag magpangamuyo agud mahibaloan kon ano ang ipaambit. Paano ang paghangop sa kabuhi kag misyon sang Manluluwas makapadugang sang inyo pagtuo sa Iya kag magabugay sa ila nga inyo ginabantayan paagi sa visiting teaching? Para sa dugang nga impormasyon, maglog-on sa reliefsociety.lds.org.
Pagtuo, Pamilya, Bulig
Ang paghangop nga si Jesucristo wala sing limbong kag pagkasalimpapaw makabulig sa aton nga matinuohon nga makapaninguha sa pagsunod sang Iya halimbawa. Si Elder Joseph B. Wirthlin (1917–2008) sang korum sang Napulo’g Duha ka mga Apostoles nagsiling: “Ang pagpanglimbong amo ang pagdaya ukon pagpatalang. … Ang tawo nga wala’y limbong isa ka tawo nga inosente, may tampad nga tinutuyo, kag puraw nga mga motibo, nga ang iya kabuhi nagapakita sang iya simple nga pagginawi nga nagasanto sa mga prinsipyo sang integridad. . … Nagapati ako nga ang kakinahanglan sang mga miyembro sang Simbahan nga mangin wala sing limbong mas ginadalian sa karon sangsa ano pa man nga panahon tungod madamo sa kalibutan ang maathag nga wala makahangop sang kapuslanan sini nga kinaiya.1
Sa pagkasalimpapaw, si Pangulong Diether F. Uchtdorf, Ikaduhang Manuglaygay sa Unang Panguluhan, nagsiling: “Wala ni isa sa aton ang pareho gid ka Cristohanon suno sa aton nga nahibaloan nga nagakadapat. Apang sinsero kita nga nagahandum nga madaug ang aton mga kasaypanan kag huyug sa pagpakasala. Sa bug-os naton nga tagipusuon kag kalag nagahandum kita nga mangin mas maayo sa bulig sang Pagpasag-uli ni Jesucristo.2
Nakahibalo kita nga “pagahukman kita suno sa aton mga buhat, mga handum sang aton mga tagipusuon, kag sa sahi sang tawo nga kita nangin.”3 Pero kon kita nagatinguha sa paghinulsol, kita mangin mas puraw—kag “bulahan ang mga putli sing tagipusuon: kay sila makakita sa Dios” (Mateo 5:8).
Dugang nga Balaan nga mga Kasulatan
Gikan sa Balaan nga mga Kasulatan
Ang magagmay nga kabataan wala sing limbong. Si Jesucristo nagsiling: “Tuguti ninyo ang kabataan sa pagkari sa akon, kag dili sila pagdumilian: kay ang ginharian sang Dios ila sang mga kasubong nila. … Kag Iya ginkugos [ang kabataan] kag ginpakamaayo sila” (Marcos 10:14,16).
Si Cristo nag-alagad man sa mga kabataan sa Amerika pagkatapos sang Iya Paglansang. Iya ginsugo ang mga tawo nga dalhon nila palapit ang ila magagmay nga mga kabataan kag “ginpamutang sila sa palibot sa iya, kag si Jesus nagtindog sa tunga; …
“… [Kag] naghibi sia, kag ang kadam-an nagpamatuod sini, kag ginkuha niya ang ila magagmay nga mga kabataan, sing isa-isa, kag ginpakamaayo sila, kag nagpangamuyo sa Amay para sa ila. …
“Kag samtang nagatulok sila sa pagtan-aw ginbayaw nila ang ila mga mata ayon sa langit, kag … nakita nila ang mga anghel nga nagapanaog gikan sa langit nga daw yara sa tunga sang kalayo; kag nagpanaog sila kag ginpalibutan yadtong magagmay nga mga kabataan, … kag ang mga anghel nag-alagad sa ila” (3 Nefi 17:12, 21, 24).
© 2015 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/14. Petsa sang pagtugot sa paglubad: 6/14. Paglubad sang Visiting Teaching Message, April 2015. Hiligaynon. 12584 861
Binagbinaga Ini
Ano ang aton matun-an parte sa pagka-wala sing limbong gikan sa magagmay nga mga kabataan? (Tan-awa sa Guide to the Scriptures, “Guile.”