Mensahe sang Unang Panguluhan, Abril 2015
Si Pangulong Monson Nagapanawagan sang Kaisog
Halos wala sang oras, sa pagpanilag ni Pangulong Thomas S. Monson, nga wala kita nagakinahanglan nga maghimo sang mga pagpili sing bisan ano nga sahi.
Sa paghimo sang maalamon nga mga pagpili, sia naglaygay, kinahanglan naton ang kaisog—“ang kaisog nga maghambal indi, ang kaisog nga maghambal huo. Ang mga desisyon naga dikta sang kapalaran.”1
Sa masunod nga mga sinambit, si Pangulong Monson nagapahanumdum sa mga Santos sa Ulihing mga Adlaw nga kinahanglanon ang kaisog sa pagtindog para sa kamatuoran kag pagkamatarong, sa pagpangapin sang ila ginapatihan, kag sa pag-atubang sang kalibutan nga nagasikway sang wala’y katapusan nga mga panindugan kag mga prinsipyo.
“Ang panawagan para sa kaisog nagaabot pirme sa tagsa sa aton,” siling niya. “Nangin amo sini sumugod sadto, kag magapabilin nga amo sini.”2
Ang Kaisog Nagadala sang Pagpakamaayo sang Dios
“Tanan kita magaatubang sang kahadlok, magaeksperiyensya sang pagyaguta, kag magasugata sang oposisyon.” Himuon naton—tanan kita—nga mag-angkon sang kaisog nga batuan ang ginaugyunan sang kadam-an, ang kaisog nga magtindog para sa prinsipyo. Kaisog, indi ang pagkompromiso, ang nagadala sang pagpakamaayo sang Dios. Ang kaisog mangin isa ka mapuslanon kag makahuluganon nga kinaiya kon kabigon ini nga indi lang ang kahanda nga mapatay sing maisog kundi isa man ka determinasyon nga magkabuhi sing disente. Sa aton padayon nga pagpanglakaton, nga nagatinguha nga magkabuhi sing nagakadapat, pat-od gid nga magabaton kita sing bulig gikan sa Ginuo kag makasalapo sing kaumpawan sa Iya mga pulong.”3
Magbatas nga may Kaisog
“Ano ang buot silingon sang magbatas? Nanamian ako sini nga kahulugan: makigsumpong nga may kaisog. Ang kaisog mahimo nga kinahanglanon agud kamo magpati; ini kon kaisa mangin kinahanglanon man sa inyo pagtuman. Ini pat-od gid nga pagakinahanglanon sa inyo pagbatas tubtob sinang adlaw kon ka san-o kamo magataliwan na sining mortal nga kabuhi.”4
Mag-angkon sing Kaisog nga Magtindog para sa Kamatuoran
“[Kabay] nga kamo makaangkon sing kaisog nga magtindog para sa kamatuoran kag pagkamatarong.” Bangod nga ang uso sa sosyedad sa karon malayo sa mga panindugan kag mga prinsipyo nga ginhatag sang Ginuo sa aton, halos pat-od gid nga pagatawgon kamo agud magpangapin sinang inyo ginapatihan. Magluwas kon ang mga gamot sang inyo panaksihon mapag-on nga natanum, mangin mabudlay para sa inyo ang makigsumpong sa mga pagpangyaguta sinang mga nagahangkat sang inyo pagtuo. Kon mapag-on ang pagkatanum, ang inyo panaksihon sa ebanghelyo, sa Manluluwas, sa aton Amay nga Langitnon magaimpluwensya sang tanan ninyo nga ginahimo sa bug-os ninyo nga kabuhi.”5
Kinahanglanon Naton ang Espiritwal kag Moral nga Kaisog
“Ang mga mensahe nga ginapakita sa telebisyon, sa mga sine, kag sa iban pa nga media [sa karon] masami nga baliskad kaayo sa sinang gusto naton nga batunon kag pakamahalon sang aton mga kabataan. Aton responsibilidad indi lamang ang tudloan sila nga mangin nagakasanto sa espiritu kag doktrina kundi nga buligan man sila nga magapabilin nga subong sina, bisan ano pa nga mga impluwensya sa gwa ang ila masugata. Ini magakinahanglan sang dako nga panahon kag kabudlay sa aton bahin--kag agod makabulig sa iban, kita mismo nagakinahanglan sang espiritwal kag moral nga kaisog agud pakigbatuan ang aton makita nga malain sa bisan diin.”6
Kabay nga Magapabilin Kita nga Maisog
“Sa pagpangabuhi naton sa adlaw-adlaw, indi gid malikawan nga pagahangkaton ang aton pagtuo. Mahimo nga kon kaisa masalapuan naton ang aton kaugalingon nga napalibutan sang iban nga mga tawo apang nagatindog nga minorya ukon basi gani nagatindog nga isahanon parte sa kon ano ang husto kag kon ano ang indi-husto. …
“Kabay nga magapabilin kita nga maisog kag nakahanda nga magtindog sa kon ano ang aton ginapatihan, kag kon kinahanglanon nga magtindog kita nga isahanon sa sina nga higayon, kabay nga mahimo naton sing may kaisog, nga napabakod sang ihibalo nga sa pagkamatuod wala gid kita nagaisahanon kon nagatindog kita upod sa aton Amay sa Langit.”7
© 2015 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/14. Petsa sang pagtugot sa paglubad: 6/14. Paglubad sang First Presidency Message, April 2015. Hiligaynon. 12584 861
Pagtudlo gikan sa Sining Mensahe
Mahimo ninyo pamangkuton sila nga inyo ginatudloan nga magpanundum sang isa ka sitwasyon sa maabot nga semana—sa balay, sa obra, sa eskwelahan, ukon sa Simbahan—nga magapangayo sa ila nga maghimo [sang isa ka bagay] nga may kaisog. Mahimo nga sila magaatubang sang kahadlok, magabatas sang isa ka bagay nga makahalangkat, magatindog sa ila mga ginapatihan, magadesisyon sa pagtuman sing lubos sang isa ka prinsipyo sang ebanghelyo. Agdaha sila sa pagpaambit sang ila mga panghunahuna ukon sa pagsulat sang mga ini.