President a Odzi Kan na n’Apamfo Amandzɛɛbɔ, Ebɔbira 2015
President Monson Frɛ dɛ Yenya Akokodur
President Thomas S. Monson ahyɛ no nsew dɛ dɔnhwer kor mpo nsen a, na wɔmmfrɛ hɛn dɛ yɛmbɔ adwenpɔw kor bi anaa kor bi so.
Otuu fo dɛ, ama yɛaabɔ adwenpɔw nyansa mu no, yehia akokodur—“akokodur a edze bɛse oho, akokodur a edze bɛse nyew. Adwenpɔw no bɔ na ɔkyerɛ hyɛbea.”1
Dza odzi do yi a woetwa no esinesin no, President Monson kaa Latter-day Saintfo dɛ wohia akokodur dze egyina ama nokwar na tsenenee, dze abɔ dza wogye dzi ho ban, na wɔnye wiadzemba a wɔropow onnyiewiei suban pa na nkyerɛkyerɛ no edzi esi.
Ɔkãa dɛ “Ɔfrɛ dɛ yenya akokodur no ba hɛn mu nkorkor hɔ daa daa.” “Dɛm ara na wɔayɛ, na ɔbɛyɛ dɛm so afebɔɔ.”2
Akokodur Dze Nyame Ne Mpendo Ba
“Hɛn nyina yebehyia dza ɔyɛ suro, wobesi hɛn atwetwe, na woetsia hɛn. Hom mma—hɛn nyina—yenya akokodur ngyina dɛ ankorankor, akokodur a wɔodze gyina ma nkyerɛkyerɛ pa. Akokodur, dze Nyame Ne mpendo enyigye mu ba, nnyɛ nsanekyir. Akokodur ba bɛyɛ ɔbrafɛw a ɔyɛ enyisɔ ber yɛhwɛ no dɛ ɔnnyɛ ɔpɛ nko dɛ yebowu dɛ ɔbarimba, mbom so dɛ yɛdze enyimpi bɔbɔ bra pa. Ber a yɛkɔ kan, yɛreper dɛ yɛbɔbɔ bra dɛ mbrɛ ɔsɛ no, ampara yebenya mboa efi Ewuradze hɔ na yebotum enya awerɛkyekye efi Ne nsɛm mu.”3
Fa Akokodur Gyina Ano
“Tsim n’asekyerɛ nye dɛn? Mepɛ nkyerɛase yi: edze akokodur gyina ano. Bia ibehia akokodur dze agye edzi; ber bi mu no obehia dɛ edze bɛyɛ setsie. Obehia mapã ber a itsim kodu da no a ibefi ɔnnkyebo asetsena yi mu no.”4
Nya Akokodur dɛ Ibegyina ama Nokwar no
“[Nkyɛ] hom enya akokodur dze egyina pintsinn ama nokwar na tseneneeyɛ. Osiandɛ ndɛ wiadzemba abrabɔ su adan efi ɔbrapa na nkyerɛkyerɛ a Ewuradze dze ama hɛn no ho no, mbrɛ ɔbɛdan biara no wɔbɛfrɛ wo ma abɔ dza egye dzi ho ban. Gyedɛ wo dasegye no ndwow no woedua ma woetsim yie, ɔno ɔbɛyɛ dzen ama wo dɛ ibegyina hɔn a wɔgye wo gyedzi ho kyim hɔn atwetwesi no ano. Sɛ woedua ma woetsim a, w’asɛmpa ho dasegye wɔ Agyenkwa, na hɛn Egya a ɔwɔ Sor ho no benya nhyɛdo wɔ dza eyɛ wɔ w’abrabɔ mu nyina do.”5
Yehia Sunsum mu nye Ɔbra Pa ho Akokodur
“Nsɛm a wɔda no edzi wɔ tɛlɛbihyɛn do, seneyi mu, nye [ndɛ] dawurbɔ horow mu no taa nye dza yɛpɛ dɛ hɛn mbofra fua na wosuo mu yie no bɔ ebira. Hɛn asodzii nnyɛ yɛkyerɛ hɔn ma wobedzi mu wɔ sunsum nye nkyerɛkyerɛ mu nko, mbom dɛ yɛboa hɔn so ma dza ɔbɔkõ etsia a wobehyia no ehuu mu biara no, wɔtsena dɛm kwan no do. Iyi behia hɛn mber pii na mbɔdzembɔ—na ama yeetum aaboa binom no, hɛn ankasa yehia sunsum mu na ɔbra pa ho akokodur dze egyina bɔn biara a yehu no afã biara no ano.”6
Nkyɛ Yɛayɛ Akokodurfo Daa
“Ber a yɛkɔdo bɔ bra fi da to da yi, mbrɛ ɔtse biara no wɔbɛgye hɛn gyedzi tafɛrbanyinmbɔmu. Mber bi mu no yebohu dɛ yesuar anaa yegyina akonam mpo no fi nkaafo a woetwa hɛn ho ehyia no, dza wɔgye to mu nye dza wɔnngye no. …
“Nkyɛ yɛayɛ akokodurfo daa na yɛayɛ ahoboa dɛ yebegyina ama dza yɛgye dzi, na sɛ otwar dɛ hɛn nko na yegyina mpo a, nkyɛ yɛayɛ dɛm akokodur mu a, nokwar nyimdzee dɛ yenngyina ankonam da, ber a yɛnye hɛn Ɔsor Egya gyina no, ahyɛ hɛn dzen.”7
© 2015 Intellectual Reserve, Inc. Wɔakora ho tumdzi nyina. USA na wotsintsimii. Ngyirisi kasa ho mpendo: 6/14. Nkyereasee ho mpendo: 6/14. First Presidency Message, April 2015. Fante. 12584 502 ne Nkyerɛasee
Erekyerɛkyerɛ efi Amandzɛɛbɔ Yi Mu
Ibotum ebisa hɔn a ekyerɛkyerɛ hɔn no ma wɔadwen gyinabew bi ho wɔ dapɛn a ɔreba no mu a—fie, edwuma mu, skuul, anaa asɔr mu no—wobehia akokodur dze edzi dwuma. Ibia a wobehyia adze suro bi, woetsim ɔhaw bi mu, woegyina ama hɔn gyedzi, anaa wɔabɔ adwen pɔw dɛ wɔbɛyɛ setsie ama asɛmpa nkyerɛkyerɛ bi emudzi mu. To nsa frɛ hɔn ma wɔnkyɛ hɔn adwendwen anaa wɔnkyerɛw nto hɔ.