Visiting Teaching Amandzɛɛbɔ, Ebɔbira 2015
Jesus Christ no Su Ndabraba anaa Enyisomkyerɛ Biara Mbata ho
Mpaabɔ mu ara sũa adzesũadze yi na hwehwɛ dɛ ibohu dza ibɛkyɛ. Eretse Agyenkwa N’abrabɔ na no dwuma horow ase no besi dɛn ato wo gyedzi mu wɔ No mu ma oehyira hɔn a idua visiting teaching do hwɛ hɔn do no? Ho nsɛm mbordo no, kɔ reliefsociety.lds.org.
Gyedzi, Ebusua, Mboa
Yerinya ntseasee dɛ Jesus Christ nntwa ndabraba na Ɔnnyɛ enyisomkyerɛ besi dɛn aboa hɛn ma yɛaper edzi Ne fasusu do. Elder Joseph B. Wirthlin (1917–2008) a nna ɔkã Asomafo Duebien hɔn Quorum ho no kãa dɛ: “Eredaadaa nye ebotwa ɔtor anaa ama obi atɔ gon. … Obi a onntwa ndabraba nye obi a odzi bem, ɔwɔ nokwar botae, na n’akoma no mu tsen a, n’abrabɔ ndzeyɛɛ daa daa no kyerɛ nokwardzi ntsetsee. … Megye dzi dɛ ohia papanara dɛ Asɔrmba nnyi ndabraba dɛm ber yi kyɛn ber biara osiandɛ dodowara wɔ wiadze yi mu a wɔnntse ɔbrapa yi no ho hia a ohia ho ase.”1
Ɔfa enyisomkyerɛ ho no, President Dieter F. Uchtdorf, Ɔpamfo a Otsĩa Ebien wɔ President a Odzi Kan na n’Apamfo mu no kãa dɛ: “Hɛn mu biara nnyɛ Christ-sɛfo dɛ mbrɛ yenyim dɛ ɔwɔ dɛ yɛyɛ no. Mbom enyiberdo ara yɛpɛ dɛ yedzi hɛn esintɔ na bɔn a yɛtɔ yɛ no do konyim. Yɛdze hɛn akoma na hɛn kra nyina pɛ dɛ yedua Jesus Christ No Werdambɔ no mboa do bɛyɛ papa.”2
Yenyim dɛ “wobobua hɛn atsɛn dɛ mbrɛ hɛn ndzeyɛɛ tse, hɛn akoma mu apɛdze, na nyimpa ban a yɛabɛyɛ.”3 Naaso yɛreper dɛ yebonu hɛnho a, hɛnho bɛtsew yie—na “nhyira akã hɔn a hɔn akoma mu tsew: na hɔn na wobohu Nyankopɔn” (Matthew 5:8).
Kyerɛwsɛm a Ɔkã ho
Fi Kyerɛwsɛm no mu
Mbofra nkakraba nntwa ndabraba Jesus Christ see dɛ: “Hom mma mbofraba no kwan ma wɔmbra me nkyɛn, na mma hom nnsiw hɔn kwan: na woyi dɛm na Nyankopɔn ahenman no yɛ hɔndze. … Na ɔyɛɛ [mbofraba] no etuu, na ɔdze ne nsa guu hɔn do dze hyiraa hɔn” (Mark 10:14, 16).
Christ soom mbofraba no wɔ America asaasetɔw Ne Mbeamuduabɔ ekyir no. Na Ɔhyɛɛ nkorɔfo no dɛ wɔmfa hɔn mbofraba no mbra Ne nkyɛn na wɔbɛtsenatsenaa famu twaa noho hyiae, na Jesus gyinaa finimfin; …
“… [Na] osũi, na nyimpadodow no gyee ho dase, na ɔfaa hɔn mbofraba no nkorkor, na ohyiraa hɔn, na ɔbɔɔ mpaa serɛɛ Egya no dze maa hɔn. …
Na ber a wɔrohwɛ hɔn no, wɔtoo hɔn enyiwa wɔ sor, na … wohun abɔfo dɛ wofi sor risian na ɔyɛ dɛ mbrɛ wɔwɔ ogya ne finimfin; na wɔbae botwaa dɛm mbofraba noho hyiae, … na abɔfo bɔsoom hɔn” (3 Nephi 17:12, 21, 24).
© 2015 Intellectual Reserve, Inc. Wɔakora ho tumdzi nyina. USA na wotsintsimii. Ngyirisi kasa ho mpendo: 6/14. Nkyereasee ho mpendo: 6/14. Visiting Teaching Message, April 2015. Fante. 12584 502 ne Nkyerɛasee
Susu Iyi
Ebɛnadze na yebotum esũa efi mbofraba hɔ a ndabraba mmbata hɛnho? (Hwɛ Kyerɛwsɛm Kwankyerɛ, “Ndabraba.”)