Ngeasek
Ulak el mora Telungalek er Ngak el mora Ulebongel
A milluches a kiei er a Utah, USA.
Sera ledei a rekik ek merrodel, e a delak el milchellak a kilengei me lemekedmokl a babier el kirel omerodel alsekum e tirkal mo oungalek er ngak el chad a kongei me a chedaol ruoll er a Ikelesia el kirek a mekedmokl sel bol 12 a rekik. Ng ulemdasou el kmo ng mle kirek el mo klou el mo sebechek el di ngak el melilt a kuruul, e ng di tia kmal mle meringel lomengiil.
Oi, ng mle meringel sel kisterir a rebetok el sechelik el metecholb sel bla bo leai a rekrir, e sel kmal mle merengelel a sel kudengei el kmo ng dimlak el sebechek el moak el mo er tirkal rirdelak me a reteim el meklou el bebil er ngak el di mereko bol 12 a rekik. Ak mlek bekikl el kmo ng mol dubech a kmo ngerang el me er ngak eng mo diak el sebechek el mo moak el mo er tir.
A lolkedang el mocha 12 a rekik, e a ki mocha mengkekedmokl er kemam el kirel a techolbechelid er ngak me a dirrek el mo moak el mora telungalek er ngak. A rechad er a blik a milchikak me ak melilt er a templo el ki bo moak er a chelsel. Ak di mla omdasou el kmo sel San Diego Californis Temple a mle kot el klebokel, me tial rokir el telungalek er ngak a kilengei el ki momekall el mora California el mo moak el telungalek.
A kmal ulerreched el mo moak el telungalek el mora ulebongel lobengterir a rechad er a blik me a rebebil er ngak. Sera lomak er kemam el telungalek, e ak mlo melchesuar a mesisiich el Chedaol Reng el diak a tekoi el smodii. Chelecha el blak moak el mora telungalek er ngak, e sel sebek reng er ngak a mlutechei lobengkel a ongelaod me a budech, el medengei el kmo ak ulak el mo er tir el mora ulebongel.