Klumech er a First Presidency, Ongelolem el buil 2015
A Telungalek a Sebechel mo Dmak el mora Ulebongel
Sel klisichel a priesthood lomak a telungalek el mora ulebongel a ta er a kot el ngarbab el sengk er a Dios. Bek el chad el medengelii a uldasou el kirel a mo suobel a olsingch el kirel tial diak a ulebengelel klengeltengat. Tial teletael lomak a telungalek a di mekedmokl er a chelsel a mla moterekokl el templo er a Ikelesia er a Jesus Kristo er a Uriul-klebesei el Santo el Dios a mesterir a telungalek sel yaksok el tir a mo moak el telungalek el mora ulebongel.
Sel kiis er a priesthood el uchul e tia sebechel mekedmokl a mlo luut el mei er a beluulechad lokiu a profet Elijah el mora Joseph Smith er a chelsel a Kirkland Templo. Aikaikid el kiis er a priesthood a mla mudelid e moiuid lokiu a re ngar el profet er a chelsel a Ikelesia er a Jesus Kristo er a Uriul-klebesei el Santo el mel muut er chelechal sils.
A Osobel er a le ngara beluulechad eng millekoi el mora Petrus, el mle ngarbab el Apostol er Ngii, el kirel a klisiich lomak a telungalek el millekoi el kmo, “A kmal kmu er kemiu el kmo, Ngii di el ngerang lobak er a beluulechad a ulak er a babeluades: e a ngii di el ngerang el mengubet er a beluulechad a nglubet er a babeluades” (Mateus 18:18).
Ng kmal di chelsel a rengedel a celestial a sebeched el mo dmak el kiei el telungalek el mora ulebongel. Chelsel tiaikid e kede mo telungalek el ngara rengedel a Demad er a Babeluades me a Osobel. A Profet Joseph Smith a silodii tial klebokel el teletael er a chelsel a Doctrine and Covenants:
“A Osobel sel lemei e kede mo mesang er sel teletelel. Kede mo mesang el chad el di uai kid.
“E sel osisiu el teletael el ngarngii er a delongeled er chelechal taem a osisiu el teletael sel de bo er sei, ng di chelisois er a diak a ulebengelel klebkall, el ngii el klebkall a diak dodengelii er chelechal taem” (D&C 130:1–2).
Tial bades ochotii el kmo ng sebeched lolsingch el kirel a ngarbab el teletael er a babeluades er a chelsel a telungalek er kid er chelechang. Ng sebeched el mo mui lomekerreu er a rechedal a telungalek er kid, a re ngar me a re mla mad, el mo meruul aikel rokui el sebeched el kirir me bo lengai aikal chedaol ruoll er a priesthood e luchul e kede mo moak er a babeluades.
Betok er kemiu, a rengeasek me a remeklou, a meruul er tial teletael. Ko mla osiik a ngklir a rebeldekiu el tir a dirkak el ngai chedaol ruoll el uchul e bo moak el mo er tir.
E oumesingd er kemiu el rokui a ngarnii a re kiei el chedemiu el tir a dirkak le moak el telungalek lokiu a klisichel a priesthood. Betok er kemiu a ngarngii a re kiei el chedemiu el tir a mla ngmai chedaol ruoll er a priesthood eng di diak loltirakl a telbiil el tir a riruul lobengkel a Dios. A Dios a mo omekngeltengat er kemiu me bol sebechiu el ngosuterir tirkel rokui el chedemiu el lokiua klaumerang. Kemiu oba sel yaksok el Rubak a dillii el mora roltirakl er Ngii el mo melai er a rebebil el mo er Ngii:
“E ngikel ngoikemiu, a bo kubengkel, le ngak a mo merael er medemiu. Ngii a mo ngara kadikm ma katur kid, e a Reng er Ngii a mora chelsel a rengud, e a reanghel er Ngii a iliuekel er kid, el mo sobecheklid” (DC 84:88).
Sel bedul a mado er a obis er ngak, eng bek el sils el kumes er a robekel el melai a siasing er tir er a delul a bung me a meliesech el ralm. A sechal a blechoel kleuokou er a redil er a chimal, el kora meteteruach a blekeklel, e a chad er a omelai el siasing a melai a siasing er tir. Bek el taem el kisa tial teletael, e ak melbedebek er a robekel el kudengelterir—el tir a chelsel a kedeb el taem ruriul er a merengel a chebechielir—el te mle kasebechakl er a ikel ringel er a klengar tir. Ng sebechel mo diak a urerir. A rengalek a mechell el betok a chetituokel er tir. A secher a sebechel mo er ngii. E sel, kse el meruul el mora rebebil aikel ngii a soad a loruul el mei er kid—a mo beot—e rullid el mo mesisiich el sechal me a redil er a chelsel aikel olibesongel taem el ngii a ble domdasou el kmo ng kmal meringel er kid.
Ng kired el kudmeklii a deleuill lobengkel a telungalk er kid el sebeched el nguu el mora rengedel a Dios Ng kired el melasm el diak bo domtok maelchub e bo duchul a ultok. Ng sebechel mo blak a rengud el mo mereched e mui lousubes. Ng sebeched el melasm losiik er a mo uchul a deureng el mora rebebil bol ngaruchei er a deureng el mei er kid. Ng sebeched el mo ungil omelkinged. Sel dolasm el meruul aikal rokui, e kede siotai er a Chedaol Reng el mei er a chelsel a telungalk er kid me a klengar kid.
A tekingek el mo er kemiu a kmo, ngultuil er a ngesou er a Rubak me a ouchel el reng er a rengud, eng sebeched el mesa telkib er tial klengar el mo uai sel klengar el kid a soad el mo er ngii el mora ulebongel. A Chedam er a Babeluades a betik a rengul er kid. Ngii a soal a deluut el mo er Ngii. Ngokiu a klisichel aTngakireng, er a Osobel, eng sebechel a rengud el mengodech el uchul eng mo sebeched el mo soiseb er a chedaol templo, e kudmokl a telbiil el ngii a sebeched el otirakl, e a uriul taem eng sebeched el lemuut el mo kiei el telungalek er a chelsel—a rengedel a celestial.
© 2015 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/14. Kengei er a oidel: 6/14. Oidel a First Presidency Message, June 2015. Palauan. 12586 881
Osischeklel Tia el Klumech
Sel mouchais osisechakl el kirel a diak a ulebengelel telungalek, e momdasou a tekingel a Elder Richard G. Scott er a Chelechad er a Teruich me a terung el Apostol el millekoi el kmo: “Bo blechoel melisiich er a telungalek er kau. Molisechakl lultuil er sel moktek el kirel a klou el belkul a telungalek sel bol moak er a chelsel a templo. … Sel moba sel moktek el kirel a chedaol ruoll lomak a telungalek er a chelsel a templo, e kau a mo olngeseu el mengederoder er a rengedel a Dios er a beluulechad” (“I Have Given You an Example,” Liahona, May 2014, 34). Ke mekera e ngosuterir tirkal molisechakl er tir el mo oba sel moktek el kirel a klou el belkul a telungalek a le moak er a chelsel a templo? Molengit er tirkel tir a dirkak el moak el telungalek me bo mosaod a teletael el tir el sebechir remuul el kirel tial chedaol ruoll. Molengit er tirkel mla moak el telungalek me louchais el kmo te mekerang e melemolem loba sel moktek el kirel a diak a ulebengelel telungalek er tir e oureor el melisiich er a deleuill er tir.