Feia apî
Tu‘atihia i to’u utuafare e a muri noa’tu
Te ora nei te taata papaʻi i Utah, Marite.
I te faaamuraahia vau i te toruraa o to’u matahiti, ua farii to’u metua vahine fanau i te parau faaamuraa maori râ, e farii to’u na metua faamu ia rave i to’u mau oro‘a i roto i te Ekalesia ia ti‘ahia to’u 12 matahiti. Ua mana‘o oia e, titauhia ia paari rii a‘e au no te rave i te faaotiraa no’u iho, tera râ e mea fifi roa te tia‘iraa.
Oia mau, e mea fifi roa ia hi‘o i to’u mau hoa ia bapetizohia i te va‘uraa o to ratou matahiti, te mea fifi roa a‘e râ, eita e ti‘a ia’u ia taatihia i to’u na metua faamu e nau taea‘e e tuahine e pae paari a‘e ia’u hou i te 12 matahiti. Ua ri‘ari‘a roa vau e tupu mai te tahi ohipa i ni‘a ia’u e eita atura e ti‘a ia’u ia taati ia ratou.
I te fatataraa mai i te 12raa o to’u matahiti, ua haamata matou i te faanaho i to’u bapetizoraa e te taatiraa i te utuafare. Ua vaiiho to’u na metua ia ma‘iti au i te hiero e taatihia ai matou. O te hiero no San Diego California te hiero nehenehe roa a‘e na’u e no reira, ua farii to’u utuafare taatoa ia faahoro i te pereoo no te haere i California e taati atu ai.
Eita faahou e nehenehe ta’u e tia‘i no te riro ei utuafare mure ore e to’u na metua e taea‘e e tuahine. I roto i te taatiraa, ua putapu vau i te Varua, ua puai roa ho‘i aita e parau no te reira. I teie nei râ ua oti au i te taatihia i to’u utuafare, ua monohia to’u mau mana‘o haape‘ape‘a i te tamahanahana e te hau, inaha ua ite au ua tu‘atihia vau ia ratou.