Pweng sin Prestuhnsi Se Met, Jun 2015
Sucu uh Kuh In Tuhkweni Ne Tok
Kuh luhn pristut in orwacni sucu uh ma pahtpaht pa sie mwe sang yohk luhn God. Mwet nuh kwewa suc etuh ke plwacn in molwelah uh tuhpan mwe insewowo wacngihn sahflahiyac sac. Ke alu ke sil muhkwena orek ke tempuhl akmuhsralah luhn Alu luhn Jisus Kraist luhn Mwet Luhlahlfongi ke Lwen-sahflah pa God El sang olwelah ma sucu uh kuh in tuhkweni nuh sie ne tok.
Ki luhn pristut ma oruh kuh in orek kain inge uh fohlohkihnyuckyak nuh facluh sel mwet pahluh Elijah nuh sel Joseph Smith lun Tempuhl Kirtland. Ki luhn pristut ingacn pahsiyuckme tuhkuh sin mwet pahluh moul ke Alu luhn Jisus Kraist luhn Mwet Luhlahlfongi ke Lwen-sahflah ne mihsenge.
Mwet Lahngo ke luti Lal facluh El sruhmuhn ke kuh in sili sucu uh ke kahs nuh sel Peter, Mwet Sap fuhlwact Lal, ke El fahk, “Ke ma inge nga fahk nu suwos nukwewa: Kutena ma kowos kapriya fin falu, ac fah kapiri pac inkusrao; ac kutena ma kowos tulala faclu, ac fac taltalla pac inkusrao” (Matthew 18:18).
Tohkohsrahi luhn celestial muhkwena pa kuht kuh in suculac muhta ne tok uh. Acn we kuht kuh in suculac muhta ye muhtuhn Pahpah Lucng ac Mwet Lahngo. Mwet Pahluh Joseph Smith el ahkuhtweyac ke puhla wowo sacn ke ohiyac se inge ke Doctrine and Covenants:
Ke Mwet Lahngo lac sikme uh kuht ac liyacl in oacna El. Kuht fah liye lah El mukul se oacna kuht sifacna.
Ac lah kuhtuh ohiyac ma oasr inmahsrlosr inge fah oasr inmahsrlosr we tuh ac fah wi pac engan ma pahtpaht suc engan se ma wacngihn sesr ingena (liye D&C 130:1–2).
Ma suhmuhslah se inge fahk lah ke luhlahlfongi kuht kuh in liye nuh ke akwuck fal luhn inkuhsrao ke kuhpahsr lasr nuh sin sucu lasr uh. Kuht kuh in karihngihn fal mwet ke sucu lasr uh, mwet moul ac misac, in oruh ma nuh kwewa kuht kuh kac in sang akwuck luhn pristut ma fah orekuhtweni nuh inkuhsrao.
Puhs suwos, mwet fuhsr ac mahtuh, oruh ma ingacn. Kowos suk ke ine luhn mwet mahtuh somlah lowos suc soenna eis ke akwuck ma kuh in sili kowosi nuh sie.
Apkuhran in kowos nuh kwewa oasr sucu moul lowos la suc soenna siliyuck nuh ke sucu ke kuh luhn pristut. Puhs oasr sucu moul lalos suc eis akwuck luhn pristut tuhsruhk tiac karihngihn olweacng elos orwaclah nuh sin God. God lac ahkinsewowoye kowos tuh kowos in fah kahsruh saplakyang nuh sin sucu an kwewa ke luhlahlfongi. Oasr yuruwos olwelah se ma Leum El oruh nuh sin mwet tuhma lutlut Lal suc som in use mwet sahyac nuh Yohrohl:
Leum El fahk muh ke sie mwet el eis kuht, El ac oasr we pac. El fah fahsrot ye muhtahsr, El fah oasr ke lacpoh lacyot ac lacsac lowos, ac Nguhn Lal fah oan insiyacsr, ac lihpufacn Lal fah raunikuhtlac, in sruhk kuhtyak (liye D&C 84:88).
Ke winto ke ohfohs luhk ah lwen nuh kwewa nga liye siacnyacn uh petsaciyuck inmahsrlon ros kahto ac ke unohn in kof uh. Mukul sac kwacna sruhkwack us muhtwacn kiyacl ah, finne ke kihtin pacl, ke mwet in orek petsac sac ac eis petsac in macruht uh. Pacl nuh kwewa ke nga liye uh, nga nuhnkuh ke siacnyacn suc nga tuh etuh suc ke sie pacl ah—kuhtuh pacl uh ke pacl na fototo tukun lwen in macruht lalos ah—elos usaclos kais sie ke inkacnek sahyac ke moul lalos upaclac ah. Orekma uh kuh in wacngihnlac. Tuhlihk uh kuh in isuslac ke ma upac nuh se. Mas uh kuh in tuhkuh. Na, pahlah se in oruh nuh sin mwet sahyac uh ke kuht ac oruh nuh sesr uh—ke tuh fihsracsr ah—fah oruh kuht in etweyuck yohk ac pwengpweng ke pacl in srihke ah ke ac upac likina ke kuht nuhnkuh muh kuht kuh nuh kac.
Kuht soemoul sin sucu lasr ke kain kuhpahsr kuht kuh in us nuh ye muhtuhn God. Kuht enenuh in srihke in tiac ahkkolukye kuh inse kolukkihn. Kuht kuh in nuhnkuh in sa na nuhnak muhnahs ac nuhnak muhnahs in pwacye. Kuht kuh in srihke in suk engan luhn mwet sahyac liki engan lasr sifacna. Kuht kuh in kuhlwacng ke sramsram lasr uh. Ke kuht srihke in oruh ma inge nuh kwewa uh, kuht ac suli Nguhn Muhtahl nuh in sucu lasr uh ac nuh in moul lasr uh.
Ahkpwacye luhk nuh suwos uh pa lah, ke kahsruh luhn Leum ac ke inse auliyak uh, kuht kuh in eis ke oruh luhn moul se inge uh kain moul se kuht ke eis ne tok uh. Pahpah Lucng El luhngse kuht. El luhngse kuht in fohlohk nuh Yohrohl. Mwet Lahngo, ke kuh luhn Iwaclah Lal, oruh oasr eklac luhn insiyacsr ma kuht enenuh in oruh kuht in kuh in ilyak nuh in tempuhl muhtahl, oruh olweacng kuht kuh in muh karihngihn, ac sie pacl in sifil muhta we yurin sucu ne tok ke wolacna luhn celestial—ke lohm sesr.
© 2015 sin Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 1/14. Ahkkweyeyucklac ke Lweng: 1/14. Lwenglah luhn First Presidency Message, June 2015. Kosraean. 12586 868
Luti ke Pweng Se Inge
Ke kowos akacsruhi ke mwe luti ke sucu ma pahtpaht uh, nuhnkuh ma Elder Richard G. Scott ke U luhn Mwet Sap Singucul Luo el fahk ah: “Suk pacl nuh kwewa in ahkfokokoye sucu uh. Luti ke ararama se ke yohk srihpaciyacn sucu in siliyucki lun tempuhl. … Ke oasr yuruwos ararama se ke akwuck luhn sil lun tempuhl uh, kowos ac kahsruh in muhsahi tohkohsrahi luhn God fin facluh” (“I Have Given You an Example,” Liahona, Mei 2014, 34). Kowos ac kahsruh fuhkah mwet kowos luti an in ahkyohkye sie ararama ke yohk srihpaciyacn siliyucki lun tempuhl uh? Suli elos suc soenna siliyucki in sramsramkihn mukwikwi elos kuh in oruh nuh ke akwuck sacn. Suli elos suc siliyucki tari in sruhmuhn ohiyac ma elos kuh in karihngihn ararama ke sucu ma pahtpaht lalos ac orekma in ahkwoye kuhpahsr lalos sie sin sie uh.