Cov Mus Saib Xyuas Tom Tsev tsab Xov, Yim Hli Ntuj 2015

Tej Cwj Pwm ntawm Yexus Khetos: Siab Mos Siab Muag thiab Txo Hwj Chim

Ua tib zoo thov Vajtswv kawm tej yam no thiab nug seb koj yuav tsum qhia dab tsi. Qhov uas koj to taub tus Cawm Seej lub neej thiab tej luag hauj lwm yuav ua rau koj txoj kev ntseeg Nws loj tuaj thiab foom koob hmoov li cas rau cov uas koj saib xyuas tom tsev? Kom tau ntaub ntawv xov xwm ntxiv, cia li txuas rau reliefsociety.lds.org.

Kev Ntseeg, Tsev Neeg, Kev Pab

Yexus hais tias, “Nej cov yog leej twg xav ua tus hlob, tus ntawd yuav tsum ua ib yam li yog tus yau, thiab tus twg yog tus thawj coj, tus ntawd yuav tsum ua ib yam li tus tub txib. Tus twg yog tus loj dua? Tus uas zaum noj mov los sis tus tub txib? Twb yog tus uas zaum noj mov ntag. Tiam sis kuv nrog nej nyob, kuv ua ib yam li tus tub txib” (Lukas 22:26–27).

“Tus Cawm Seej yog tus yam ntxwv zoo tshaj plaws txog lub hwj chim uas los ntawm lub siab mos siab muag thiab kev txo hwj chim. Vim hais tias, Nws ua raws li Leej Txiv lub siab nyiam kom thiaj muaj qhov tseem ceeb tshaj plaws, thiab qhov uas muaj hwj chim loj tshaj plaws, tsis hais nyob hauv tag nrho zaj liv xwm. Tej zaum cov lus dawb ceev tshaj plaws nyob hauv tag nrho cov vaj lug kub tsuas yog, “Tsis ua raws li kuv lub siab nyiam, ua raws li koj lub siab nyiam xwb’ (Lukas 22:42).”¹

Vim peb yog Yexus Khetos cov thwj tim, peb yuav tsum xav ua neeg zoo li Nws. Txwj Laug Ulisses Soares los ntawm Pawg Xya Caum hais tias, “Peb yuav tsum txo hwj chim kom peb yuav rais los ua neeg zoo li Yexus Khetos. Yog peb tsis txo hwj chim ces peb yeej yuav tsis muaj peev xwm coj lwm tus cwj pwm zoo. Kev txo hwj chim tsis yog kev qaug zog, tiam sis kev txo hwj chim yog kev muaj siab dawb siab zoo, kev muaj zog, kev nyob tus, kev paub yus muaj nqis, thiab kev tswj hwm yus tus kheej.”² Thaum peb ua hauj lwm kom muaj tus cwj pwm no, peb yuav kawm hais tias, “kev txo hwj chim ua raws li Leej Txiv lub siab nyiam ua rau peb muaj hwj chim ntawm Vajtswv—yog lub hwj chim ntawm ib lub siab mos siab muag. Yog lub hwj chim kom peb muaj peev xwm kov yeej peb lub neej tej teeb meem, lub hwj chim ntawm kev kaj siab lug, lub hwj chim ntawm kev cia siab, lub hwj chim ntawm ib lub siab uas muaj kev hlub thiab ib zaj lus tim khawv txog tus Cawm Seej Yexus Khetos, twb yog lub hwj chim ntawm kev txhiv dim.”³

Vaj Lug Kub Ntxiv

Mathais 26:39; Yauhas 5:30; Mauxiyas 3:19; Hilamas 3:35

Los ntawm cov Vaj Lug Kub

Ib lub sij hawm tseem ceeb thiab zoo heev los ntawm Yexus Khetos txoj hauj lwm qhuab qhia yog thaum Nws ntxuav Nws cov thwj tim txhais ko taw. “Yexus txawm sawv ntawm rooj mov mus hle nws lub tsho ntev, thiab muab ib txoj phuam los sia ntawm duav. Ces nws muab dej hliv rau hauv lub phiab thiab nqa los ntxuav cov thwj tim ko taw thiab muab txoj phuam uas nws sia ntawm duav so lawv ko taw” (Yauhas 13:4–5).

Thaum tus Cawm Seej ua txoj kab ke no, tej zaum cov thwj tim xav tsis thoob vim lawv tus Tswv thiab tus Xib Hwb txhos caug thiab txo hwj chim tag nrho ua qhov kev pab no. Ces Yexus piav txog qhov uas Nws xav kom lawv thiab peb sawv daws kawm:

“Yog tias kuv, uas yog nej tus Tswv thiab yog nej tus Xib Hwb, kuv twb ntxuav nej ko taw lawm; yog li ntawd nej ib leeg yuav tsum ntxuav ib leeg ko taw.

“Kuv ua yam ntxwv li no qhia rau nej kom nej xyaum ua raws li kuv ua rau nej lawm” (Yauhas 13:14–15).

© 2015 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Akiv: 6/15. Pub txhais ua lus Hmoob: 6/15. Kev txhais Visiting Teaching Message, August 2015. Hmong. 12588 295

Xav Txog Qhov No

Qhov uas peb txo hwj chim yuav pab peb hlub ib yam li tus Cawm Seej li cas?