ຂ່າວສານການຢ້ຽມສອນ, ເດືອນສິງຫາ 2015

ຄຸນສົມບັດແຫ່ງສະຫວັນຂອງພຣະເຢຊູຄຣິດ: ອ່ອນນ້ອມ ແລະ ຖ່ອມຕົນ

ໃຫ້ສຶກສາຂ່າວສານນີ້ດ້ວຍການອະທິຖານ ແລະ ສະແຫວງຫາເພື່ອຈະໄດ້ຮູ້ຈັກສິ່ງທີ່ຄວນແບ່ງປັນ. ການເຂົ້າໃຈຊີວິດ ແລະ ພາລະກິດຂອງພຣະຜູ້ຊ່ອຍໃຫ້ລອດເພີ່ມສັດທາຂອງທ່ານໃນພຣະອົງ ແລະ ເປັນພອນໃຫ້ແກ່ຄົນທີ່ທ່ານດູແລຜ່ານການຢ້ຽມສອນໄດ້ແນວໃດ? ສຳລັບລາຍລະອຽດເພີ່ມເຕີມ, ໃຫ້ເປີດເບິ່ງທີ່ reliefsociety.lds.org.

ສັດທາ • ຄອບຄົວ • ສົງເຄາະ

ພຣະເຢຊູໄດ້ກ່າວວ່າ, “ຜູ້ທີ່ເປັນໃຫຍ່ທີ່ສຸດ ຕ້ອງເປັນເໝືອນດັ່ງຜູ້ນ້ອຍທີ່ສຸດ ແລະ ຜູ້ທີ່ເປັນຜູ້ນຳ ຕ້ອງເປັນດັ່ງຜູ້ຮັບໃຊ້. ຜູ້ໃດທີ່ເປັນໃຫຍ່ກວ່າກັນ ຜູ້ທີ່ນັ່ງກິນ ຫລື ຜູ້ທີ່ຮັບໃຊ້? ແນ່ນອນແລ້ວ ຕ້ອງແມ່ນຜູ້ທີ່ນັ່ງກິນເທິງໂຕະ, ແຕ່ເຮົາຢູ່ທ່າມກາງພວກເຈົ້າ ເໝືອນດັ່ງຄົນທີ່ຮັບໃຊ້ຜູ້ໜຶ່ງ” (ລູກາ 22:26–27).

ພຣະຜູ້ຊ່ອຍໃຫ້ລອດເປັນຕົວຢ່າງທີ່ດີເລີດຂອງເຮົາເຖິງພະລັງແຫ່ງຄວາມຖ່ອມຕົນ ແລະ ການຍອມເຮັດຕາມ. ໃນທີ່ສຸດ, ການຍອມເຮັດຕາມພຣະປະສົງຂອງພຣະບິດາ ໄດ້ສ້າງເຫດການທີ່ຍິ່ງໃຫຍ່ທີ່ສຸດ ແລະ ມີພະລັງທີ່ສຸດ ໃນປະຫວັດສາດທັງໝົດ. ບາງທີ ຄຳທີ່ສັກສິດທີ່ສຸດໃນຂໍ້ພຣະຄຳພີທັງໝົດ ແມ່ນແຕ່ຄຳ ທີ່ວ່າ, ‘ຂໍຢ່າໃຫ້ເປັນໄປຕາມຄວາມປາດຖະໜາຂອງລູກ, ແຕ່ຂໍໃຫ້ເປັນໄປຕາມຄວາມປະສົງຂອງພຣະບິດາເຈົ້າເທີ້ນ’ (ລູກາ 22:42).”¹

ໃນຖານະທີ່ເປັນສານຸສິດຂອງພຣະເຢຊູຄຣິດ, ເຮົາສະແຫວງຫາທີ່ຈະເປັນເໝືອນດັ່ງພຣະອົງ. “ຄວາມອ່ອນນ້ອມ ເປັນສິ່ງຈຳເປັນສຳລັບເຮົາ ທີ່ຈະກາຍເປັນເໝືອນດັ່ງພຣະຄຣິດ” ແອວເດີ ຢູລິດຊິສ໌ ໂຊອາເຣສ໌ ແຫ່ງສາວົກເຈັດສິບ ໄດ້ກ່າວ. ຖ້າປາດສະຈາກຄວາມອ່ອນນ້ອມ, ເຮົາຈະບໍ່ສາມາດພັດທະນາຄຸນນະທຳທີ່ສຳຄັນຢ່າງອື່ນໆໄດ້. ການເປັນຄົນອ່ອນນ້ອມ ບໍ່ໝາຍຄວາມວ່າ ເຮົາອ່ອນແອ, ແຕ່ໝາຍຄວາມວ່າ ເຮົາປະພຶດຕົວດ້ວຍຄວາມດີ ແລະ ມີເມດຕາ, ສະແດງຄວາມເຂັ້ມແຂງ, ມີຄວາມສະຫງົບໃຈ, ມີຄ່າຄວນ, ແລະ ສາມາດບັງຄັບຕົນເອງ.”² ເມື່ອເຮົາພະຍາຍາມພັດທະນາຄຸນສົມບັດນີ້, ເຮົາຈະພົບວ່າ “ການຍອມເຮັດຕາມພຣະປະສົງຂອງພຣະບິດາ ຈະນຳພະລັງຂອງພຣະເຈົ້າມາໃຫ້ເຮົາ—ນັ້ນຄື ພະລັງແຫ່ງຄວາມຖ່ອມຕົນ. ມັນເປັນພະລັງທີ່ຈະສາມາດປະເຊີນກັບຄວາມຍາກລຳບາກໃນຊີວິດ, ເປັນພະລັງແຫ່ງຄວາມສັນຕິສຸກ, ເປັນພະລັງແຫ່ງຄວາມຫວັງ, ເປັນພະລັງແຫ່ງຫົວໃຈທີ່ມີຄວາມຮັກຕໍ່ພຣະຜູ້ຊ່ອຍໃຫ້ລອດ ພຣະເຢຊູຄຣິດ ແລະ ມີປະຈັກພະຍານເຖິງພຣະອົງ, ແມ່ນແຕ່ເປັນພະລັງແຫ່ງການໄຖ່.”³

ຂໍ້ພຣະຄຳພີເພີ່ມເຕີມ

ມັດທາຍ 26:39; ໂຢຮັນ 5:30; ໂມໄຊຢາ 3:19; ຮີລາມັນ 3:35

ຈາກພຣະຄຳພີ

ໂອກາດໜຶ່ງທີ່ຫວານຊື່ນ ແລະ ມີພະລັງຫລາຍ ກ່ຽວກັບການປະຕິບັດສາດສະໜາກິດຂອງພຣະຄຣິດ ແມ່ນຕອນທີ່ພຣະອົງໄດ້ລ້າງຕີນໃຫ້ສານຸສິດຂອງພຣະອົງ. “ພຣະອົງຈຶ່ງລຸກຂຶ້ນຈາກພາເຂົ້າ, ແລ້ວແກ້ເສື້ອຊັ້ນນອກອອກ; ແລະ ໃຊ້ຜ້າມັດແອວ. ແລ້ວພຣະອົງກໍຖອກນ້ຳໃສ່ຊາມ ແລະ ເລີ່ມລ້າງຕີນຂອງພວກສາວົກ ແລະ ເຊັດຕີນຂອງພວກເພິ່ນດ້ວຍຜ້າມັດແອວນັ້ນ” (ໂຢຮັນ 13:4–5).

ເມື່ອພຣະຜູ້ຊ່ອຍໃຫ້ລອດ ໄດ້ເລີ່ມຕົ້ນພິທີການນີ້, ພວກສານຸສິດອາດບໍ່ເຂົ້າໃຈວ່າ ເປັນຫຍັງພຣະຜູ້ເປັນເຈົ້າ ແລະ ພຣະອາຈານຂອງເຂົາເຈົ້າ ຈຶ່ງນັ່ງຄຸເຂົ່າຢູ່ຕໍ່ໜ້າເຂົາເຈົ້າ ແລະ ປະຕິບັດການຮັບໃຊ້ທີ່ອ່ອນນ້ອມຫລາຍແທ້ໆນັ້ນ. ແລ້ວພຣະເຢຊູໄດ້ອະທິບາຍບົດຮຽນ ທີ່ພຣະອົງປະສົງໃຫ້ເຂົາເຈົ້າ ແລະ ເຮົາທຸກຄົນ ຮຽນຮູ້ ດັ່ງນີ້:

“ຖ້າຫາກພຣະອົງເຈົ້າ ແລະ ພຣະອາຈານ ໄດ້ລ້າງຕີນໃຫ້ພວກເຈົ້າສັນໃດ; ພວກເຈົ້າກໍຄວນລ້າງຕີນໃຫ້ກັນແລະກັນສັນນັ້ນ.

“ດ້ວຍວ່າ ເຮົາໄດ້ວາງແບບຢ່າງໄວ້ໃຫ້ພວກເຈົ້າແລ້ວ, ເພື່ອໃຫ້ພວກເຈົ້າເຮັດເໝືອນດັ່ງທີ່ເຮົາໄດ້ເຮັດແກ່ພວກເຈົ້ານັ້ນ” (ໂຢຮັນ 13:14–15).

© 2015 ໂດຍ Intellectual Reserve, Inc. ສະຫງວນລິຂະສິດທຸກປະການ. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/15. ການແປໄດ້ຮັບອະນຸຍາດ: 6/15. ແປຈາກ Visiting Teaching Message, August 2015. Laotian. 12588 331

ໃຫ້ພິຈາລະນາສິ່ງນີ້

ການມີຄວາມຖ່ອມຕົນສາມາດຊ່ອຍເຮົາໃຫ້ຮັກ ດັ່ງທີ່ພຣະອົງໄດ້ຮັກແນວໃດ?