ຂ່າວສານຈາກຝ່າຍປະທານສູງສຸດ, ເດືອນສິງຫາ 2015
ຢືນເປັນຄວາມສະຫວ່າງ
ຂ້າພະເຈົ້າໄດ້ມີໂອກາດໄປຮ່ວມການສະເຫລີມສະຫລອງວັດທະນະທຳຫລາຍບ່ອນ ທີ່ກ່ຽວພັນກັບການອຸທິດພຣະວິຫານ. ຂ້າພະເຈົ້າກໍມັກການສະແດງທັງໝົດ, ຮ່ວມທັງເທື່ອແລ້ວນີ້ ທີ່ຂ້າພະເຈົ້າໄດ້ໄປຮ່ວມໃນເມືອງຟີນິກ, ລັດອາຣິໂຊນາ, ສະຫະລັດ, ໃນເດືອນພະຈິກ ທີ່ຜ່ານມານີ້.
ຊາວໜຸ່ມໄພ່ພົນຍຸກສຸດທ້າຍຜູ້ທີ່ເຂົ້າຮ່ວມໃນການສະເຫລີມສະຫລອງວັດທະນະທຳດັ່ງກ່າວ ໄດ້ຈັດການສະແດງທີ່ໜ້າອັດສະຈັນໃຈ ແລະ ໜ້າຊົງຈຳຫລາຍ. ປີກາຍນີ້ ໃນເມືອງຟີນິກ, ກ່ອນເລີ່ມຕົ້ນການສະເຫລີມສະຫລອງ, ຂ້າພະເຈົ້າໄດ້ບອກຜູ້ສະແດງວ່າ, “ພວກເຈົ້າເປັນເດັກແຫ່ງຄວາມສະຫວ່າງ.”
ຂ້າພະເຈົ້າຢາກໃຫ້ຊາວໜຸ່ມທຸກຄົນຂອງສາດສະໜາຈັກຮູ້ວ່າ ເຂົາເຈົ້າເປັນເດັກແຫ່ງຄວາມສະຫວ່າງ. ເມື່ອເປັນເຊັ່ນນັ້ນ, ພວກເຂົາຈຶ່ງມີໜ້າທີ່ຮັບຜິດຊອບທີ່ຈະເປັນ “ຄວາມສະຫວ່າງຢູ່ໃນໂລກ” (ຟີລິບປອຍ 2:15). ພວກເຂົາມີໜ້າທີ່ ທີ່ຈະແບ່ງປັນຄວາມຈິງເລື່ອງພຣະກິດຕິຄຸນ. ພວກເຂົາໄດ້ຖືກເອີ້ນໃຫ້ຢືນເປັນໄຟສັນຍານຂອງພຣະວິຫານ, ເພື່ອສະທ້ອນແສງຂອງພຣະກິດຕິຄຸນໃສ່ໂລກທີ່ມືດມົວ. ພວກເຂົາໄດ້ຖືກສັ່ງໃຫ້ຮັກສາຄວາມສະຫວ່າງຂອງຕົນ ໃຫ້ລຸກໄໝ້ຢູ່ ແລະ ຮຸ່ງແຈ້ງຂຶ້ນເລື້ອຍໆ.
ເພື່ອເຮົາຈະສາມາດເປັນ “ຕົວຢ່າງຂອງຜູ້ທີ່ເຊື່ອໄດ້” (1 ຕີໂມທຽວ 4:12), ຕົວເຮົາເອງຕ້ອງມີຄວາມເຊື່ອກ່ອນ. ເຮົາຕ້ອງພັດທະນາສັດທາ ທີ່ຈຳເປັນຕໍ່ຄວາມລອດທາງວິນຍານ ແລະ ເພື່ອສ່ອງຄວາມສະຫວ່າງໃຫ້ແກ່ຄົນອື່ນ. ເຮົາຕ້ອງບຳລຸງລ້ຽງປະຈັກພະຍານຂອງເຮົາ ຈົນກວ່າມັນກາຍເປັນສະໝໍໃຫ້ແກ່ຊີວິດຂອງເຮົາ.
ໃນບັນດາວິທີທາງຕ່າງໆທີ່ມີປະສິດທິພາບ ໃນການໄດ້ຮັບ ແລະ ຮັກສາສັດທາ ທີ່ເຮົາຕ້ອງການໃນທຸກວັນນີ້ ແມ່ນທີ່ຈະອ່ານ ແລະ ສຶກສາພຣະຄຳພີ ແລະ ອະທິຖານເລື້ອຍໆ ແລະ ເປັນປະຈຳ. ຕໍ່ຊາວໜຸ່ມຂອງສາດສະໜາຈັກ, ຂ້າພະເຈົ້າຂໍບອກວ່າ, ຖ້າຫາກພວກເຈົ້າຍັງບໍ່ໄດ້ເຮັດເທື່ອ, ໃຫ້ພວກເຈົ້າເລີ່ມຕົ້ນສ້າງນິໄສຕອນນີ້ ເລື່ອງການສຶກສາພຣະຄຳພີ ແລະ ການອະທິຖານທຸກວັນ. ຖ້າປາດສະຈາກການກະທຳທີ່ສຳຄັນສອງຢ່າງນີ້, ອິດທິພົນພາຍນອກ ແລະ ຄວາມເປັນຈິງຂອງຊີວິດ ຊຶ່ງບາງເທື່ອກໍຮ້າຍແຮງ ຈະເຮັດໃຫ້ຄວາມສະຫວ່າງຂອງພວກເຈົ້າດັບແສງລົງເທື່ອລະໜ້ອຍ ຫລື ແມ່ນແຕ່ມອດດັບໄປເລີຍກໍເປັນໄດ້.
ຊີວິດໃນໄວລຸ້ນ ບໍ່ໄດ້ເປັນໄລຍະທີ່ງ່າຍສະບາຍ. ມັນເປັນໄລຍະທີ່ຊາຕານຈະພະຍາຍາມລໍ້ລວງພວກເຈົ້າ ແລະ ມັນຈະພະຍາຍາມຈົນສຸດແຮງຂອງມັນ ເພື່ອກີດກັນພວກເຈົ້າ ບໍ່ໃຫ້ເດີນໄປໃນເສັ້ນທາງ ທີ່ຈະພາພວກເຈົ້າກັບໄປຫາບ້ານສະຫວັນຂອງພວກເຈົ້າ. ແຕ່ເມື່ອພວກເຈົ້າອ່ານ ແລະ ອະທິຖານ ແລະ ເມື່ອພວກເຈົ້າຮັບໃຊ້ ແລະ ເຊື່ອຟັງ, ພວກເຈົ້າຈະຮູ້ຈັກ ຄວາມສະຫວ່າງທີ່ຮຸ່ງແຈ້ງກວ່າ ຊຶ່ງສ່ອງແສງຢູ່ໃນຄວາມມືດ (ເບິ່ງ D&C 6:21), ຕົວຢ່າງ ແລະ ຄວາມເຂັ້ມແຂງຂອງເຮົາ—ແມ່ນແຕ່ອົງພຣະເຢຊູຄຣິດເຈົ້າ. ພຣະອົງເປັນຄວາມສະຫວ່າງ ທີ່ເຮົາຕ້ອງຍົກຂຶ້ນ ເພື່ອກຳຈັດຄວາມມືດ (ເບິ່ງ 3 ນີໄຟ 18:24).
ດ້ວຍປະຈັກພະຍານທີ່ເຂັ້ມແຂງເຖິງພຣະຜູ້ຊ່ອຍໃຫ້ລອດ ແລະ ເຖິງພຣະກິດຕິຄຸນທີ່ຟື້ນຟູຄືນມາໃໝ່ຂອງພຣະອົງ, ພວກເຈົ້າຈະມີໂອກາດຢ່າງຫລວງຫລາຍ ທີ່ຈະສ່ອງແສງ. ໂອກາດດັ່ງກ່າວມີຢູ່ອ້ອມຮອບພວກເຈົ້າໃນທຸກວັນ, ບໍ່ວ່າພວກເຈົ້າຈະຢູ່ໃນສະຖານະການໃດໆກໍຕາມ. ເມື່ອພວກເຈົ້າເຮັດຕາມຕົວຢ່າງຂອງພຣະຜູ້ຊ່ອຍໃຫ້ລອດ, ພວກເຈົ້າຈະມີໂອກາດເປັນຄວາມສະຫວ່າງ, ໃນຊີວິດຂອງຜູ້ທີ່ຢູ່ອ້ອມຮອບພວກເຈົ້າ—ບໍ່ວ່າເຂົາເຈົ້າເປັນສະມາຊິກໃນຄອບຄົວຂອງພວກເຈົ້າ, ເປັນເພື່ອນນັກຮຽນ, ເປັນເພື່ອນທຳງານ, ເປັນພຽງຄົນລຶ້ງເຄີຍ, ຫລື ແມ່ນແຕ່ເປັນຄົນແປກໜ້າກໍຕາມ.
ເມື່ອພວກເຈົ້າເປັນຄວາມສະຫວ່າງໃຫ້ແກ່ໂລກ, ຜູ້ຄົນທີ່ຢູ່ອ້ອມຮອບພວກເຈົ້າ ຈະຮູ້ສຶກເຖິງພຣະວິນຍານພິເສດ ທີ່ເຮັດໃຫ້ເຂົາເຈົ້າຢາກເປັນເພື່ອນກັບພວກເຈົ້າ ແລະ ເຮັດຕາມຕົວຢ່າງຂອງພວກເຈົ້າ.
ຂ້າພະເຈົ້າຂໍໃຫ້ຜູ້ເປັນພໍ່ແມ່ ແລະ ຜູ້ນຳຂອງຊາວໜຸ່ມ ໃຫ້ຊ່ອຍເຫລືອພວກເຂົາ ຢືນຢູ່ຢ່າງໝັ້ນຄົງໃນຄວາມຈິງ ແລະ ຄວາມຊອບທຳ. ຈົ່ງເປີດປະຕູແຫ່ງການຮຽນຮູ້, ແຫ່ງຄວາມເຂົ້າໃຈ, ແລະ ແຫ່ງການຮັບໃຊ້ ໃນອານາຈັກຂອງພຣະເຈົ້າ ອອກໃຫ້ກວ້າງຕໍ່ພວກເຂົາ. ຈົ່ງເພີ່ມຄວາມເຂັ້ມແຂງພາຍໃນໃຫ້ແກ່ພວກເຂົາ ເພື່ອຈະສາມາດຕ້ານທານກັບການລໍ້ລວງຂອງໂລກໄດ້. ຈົ່ງຊ່ອຍພວກເຂົາໃຫ້ເຕັມໃຈ ທີ່ຈະເດີນໄປດ້ວຍຄຸນນະທຳ ແລະ ສັດທາ, ທີ່ຈະອະທິຖານ, ແລະ ເພິ່ງອາໄສສະຫວັນ ໃຫ້ເປັນສະໝໍຂອງພວກເຂົາສະເໝີ.
ຕໍ່ຊາວໜຸ່ມຂອງພວກເຮົາ, ຂ້າພະເຈົ້າຂໍກ່າວວ່າ, ພຣະບິດາເທິງສະຫວັນຮັກພວກເຈົ້າ. ຂໍໃຫ້ພວກເຈົ້າຈົ່ງຮູ້ສຶກເຖິງຄວາມຮັກ ທີ່ຜູ້ນຳໃນສາດສະໜາຈັກມີຕໍ່ພວກເຈົ້າ. ຂໍໃຫ້ພວກເຈົ້າຈົ່ງມີຄວາມປາດຖະໜາ ທີ່ຈະຮັບໃຊ້ພຣະບິດາເທິງສະຫວັນຂອງພວກເຈົ້າ ແລະ ພຣະບຸດຂອງພຣະອົງ. ແລະ ຂໍໃຫ້ພວກເຈົ້າຈົ່ງເດີນໄປໃນຄວາມຈິງ ແລະ ຢືນເປັນຄວາມສະຫວ່າງໃນບັນດາລູກໆຂອງພຣະເຈົ້າ.
ການສອນຈາກຂ່າວສານນີ້
ໃຫ້ຄິດທີ່ຈະສົນທະນາກັບຄົນທີ່ທ່ານສອນ ເຖິງຄວາມໝາຍຂອງການເປັນ “[ເດັກ] ແຫ່ງຄວາມສະຫວ່າງ.” ມີໜ້າທີ່ຮັບຜິດຊອບແນວໃດແດ່? ທ່ານສາມາດສົນທະນາກ່ຽວກັບຊ່ວງເວລາທີ່ຄວາມສະຫວ່າງຂອງເຂົາເຈົ້າສ່ອງແຈ້ງຫລາຍທີ່ສຸດ ແລະ ແມ່ນຫຍັງທີ່ເຮັດໃຫ້ມັນສ່ອງແຈ້ງ. ຂໍໃຫ້ເຂົາເຈົ້າຄິດກ່ຽວກັບຄົນໃດຄົນໜຶ່ງ, ດັ່ງເຊັ່ນ ຊາວໜຸ່ມຄົນໜຶ່ງ, ເພື່ອນທຳງານຄົນໜຶ່ງ, ຫລື ສະມາຊິກໃນຄອບຄົວຄົນໜຶ່ງ, ຜູ້ທີ່ຕ້ອງການຄວາມສະຫວ່າງ. ແລ້ວພວກທ່ານສາມາດອະທິຖານນຳກັນ ເພື່ອຈະຮູ້ວິທີທີ່ຈະແບ່ງປັນຄວາມສະຫວ່າງໃຫ້ກັບຄົນນັ້ນ.
© 2015 ໂດຍ Intellectual Reserve, Inc. ສະຫງວນລິຂະສິດທຸກປະການ. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/15. ການແປໄດ້ຮັບອະນຸຍາດ: 6/15. ແປຈາກ First Presidency Message, August 2015. Laotian. 12588 331