Poraus seni Fefin Chon Amwa, September 2015
Napanapen Jises Kraist mi Monomon: Unusen Manaman me Uren Ning
Anneaochu me ikiotek usun ekkei mettoch me kutta met kopwe aporausa. Ifa usun om weweiti usun manauan me angangen ewe Chon Amanau epwe tongeni anapano om nuku non I me efeiochu ekkewe aramas ka kan tumunu non om angangen an fefin chon amwa? Ren fatafatochun poraus, kopwe nengeni reliefsociety.lds.org.
Nuku, Famini, Aninis
Ekkewe pukefel ra aitikich pwe Jises Kraist “a angei unusen manaman, non nang me pwan won fonufan, iwe ewe ningen ewe Sam mi nom ren” (D&C 93:17). Elter M. Russel Ballard seni ewe Mwichen Engon me Ruemon Aposel a apasa pwe seni ei manaman ach we Chon Amanau a fori ekkewe nang me fonufan, a fori manaman, me engino ngeni ewe metek non Gethsemane me Calvary.1 Nupwen sia weweiti ei, ach nuku non Kraist epwe napeno, iwe sipwe pochokuneno.
Nupwen sipwe fori me apwonueta pwon mi pin non tempel, ewe Samon epwe efeiochu kich ren An manaman. Linda K. Burton, presetenin unusen Fin Anisi, a apasa “Ach apwonueta pwon mi pin a apochokuna, awora manaman, me tumunu kich. … Ukeran chok churi emon minefon chiechiei mi achengicheng. A pwarata pwe mwirin an angei an endowment non tempel, a mefi pochokun ren manaman an epwe ungeni sossot.”2
Nifai a apasa an kapasen pwarata usun manamanen pwon mi pin: “Ngang, Nifai, ua kuna ewe manamanen ewe Namen Kot, pwe a feitiw … won ekkewe aramas pwon noun ewe Samon, … iwe ra fotata wenechar me ren ewe manamanen Kot non ning mi napanap” (1 Nifai 14:14).
Pwan ekkoch Wokisin
Seni ekkewe Pukfel
Ren an uren watten umoumoch ngeni Martha me Mary, Jises Kraist a amanauata mwongeer we Lazarus seni mano me ren ewe manamanen Kot mi nom ren.
Jises a tori imwen Martha me Mary we mwirin an Lazarus a fen nom non ewe peias non ukukun ruanu ran. Ra feino ren peiasen Lazarus we, iwe Jises a annuku ngeni ewe foun fau mi pwonano asaman we pwe epwe mareno. Jises a apasa ngeni Martha, “Ua apasa ngonuk, pwe, ika pwe kopwe nuku, kopwe kuna ningen Kot?” Iwe mwirin a iotek ngeni Kot ewe Sam me “newemong ne apasa, Lazarus, pwereto.
“Iwe ewe mi mano a tou, nge poun me pechen mi chok tukutukuno ngeni mangaku.” (Nengeni John 20:1–17.) Ewe Chon Amanau a aea An manaman ne angasa me ngenikich manaman. Ach nuku non I epwe napeno nupwen sia chechemeni pwe I mi uren manaman me ning.
© 2015 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/15. Kapungunon chiakun: 6/15. Chiakun Visiting Teaching Message, September 2015. Chuukese. 12589 901
Ekkieki Usun Ei
Ifa usun ewe manamanen Kot a tongeni afouta kich ren manaman me ning?