Poraus seni ewe Aewin Presetensi, September 2015

Famini me Iotek

Seni Preseten Henry B. Eyring

Aewin Chon Aninis non ewe Aewin Presetensi

Fan ew, nupwen ua mwomwot nepekin an semei we pet non ew pwinin, a aporousa usun nekukunun. A kapas usun ewe tong an seman me inan kewe non fansoun weires me tongen Seman won Nang me ewe Chon Amanau. Ngang mi sinei pun epwene mano ren cancer, iwe use kan mairu nupwen fan ekkoch a kan ekkesiwini mefian ngeni Samach won Nang ren ewe tong me kirokiroch an seman we won fonufan. Semei we a kan soun apasa pwe nupwen a iotek, a ekieki pwe a tongeni kuna non an ekiek ewe amenimen an Semach won Nang.

Seman me inan kewe ra aiti i seni ar nenien appiru ne iotek usun ita a kapas ngeni Kot me Kot epwe penueni i non tong. Mi auchea ngeni i ena nenien appiru tori nesoponon. Nupwen ewe metek a watteno, am aua kuna i nesossor won pwasukun ren ewe pet. A fen apwangapwangeno an epwe tota sefan won ewe pet. A urenikem pwe a iotek ne eisini Seman won Nang ika pwata a fen riaffou wachemuk nge i mi achocho an epwe och fansoun meinisin. A apasa pwe ew kirokirochun penuwan a feito: “Kot a mochen anuon mi poracho.”

Iwe a chok achocho ngeni nesoponon, a apinukunuku pwe Kot a tongei i, ausening ngeni i, me epwe echiwata. A feioch an a fen sinei akkom me esap tongeni monuki pwe emon Kot mi tong mi arap ngeni i usun ew iotek.

Ina pwata ewe Samon a aiti in me sam, “Iwe repwe pwan aiti nour kewe ne iotek, me fetan wenechar me mwen ewe Samon” (D&C 68:28).

Ewe kapas allimen Jises Kraist a fen niwinsefanito—fiti ewe Puken Mormon me ekkewe kien pristut meinisin ekkewe ra tongeni rifengeni famini—pokiten Joseph Smith nupwen an emon chok kukkun at a iotek non nuku. A angei ena nuku me non ew famini mi tong me nikitu.

Rue ier a no ewe Samon a ngeni famini ei aurour non “Ewe Famini: Esinesin ngeni ei Fonufan” seni ewe Aewin Presetensi me ewe Mwichen Engon me Ruemon Aposel: “Pupunu mi murino me famini ra foruta me tumun me won ekkewe nongonongen nuku, iotek, aier, omusomusen tipis, sufon, tong, umoumoch, angang, me urumot mi murino.”¹

A fokkun watte ach kinisou ngeni ewe faminien Joseph Smith ewe Soufos ren ar tumunu me amarieta. An we famini ese chok pwar ngenikich usun nuku me iotek nge pwan aier, omusomusen tipis, sufon, tong, umoumoch, angang, me urumot mi murino.

Ekkewe tappin aramas repwe feito mwirum repwe eita ngonuk feioch fan iten om nenien appiru ren iotek non om famini. Eni kosap amarieta emon chon angang ngeni Kot mi napanap, nge ren om iotek me om nenien appiru ren nikitu ka tongeni anisi ewe Samon Jises Kraist ne amarieta chon tapweno mwirin mi murino me achengicheng.

Seni ekkewe mettoch ka finata pwe kopwe fori ne anisi ewe Samon, iotek epwe ina popunapan. Mi fen wor aramas, nupwen ra iotek, ra amemmef ngeni ekkoch ar repwe suki meser pwe repwe kuna io a nonom rer. Ka tongeni winiti ena sokkun aramas.

Ekieki ika met epwe wewe ngeni ekkewe ra fotopukutiw reom non iotekin famini. Nupwen ra mefi pwe ka kapas ngeni Kot non nuku, ar nuku epwe pwan napeno ne kapas ngeni Kot. Nupwen ka iotek ne kinisou ngeni Kot ren ekkewe feioch ir mi sinei pwe ra fen feito, ar nuku epwe pwan napeno pwe Kot mi tongei ir me I mi penuweni om iotek me epwe pwan penuweni ar. Mi tongeni fis non iotekin famini ika pwe a fen fis ngonuk non om pwisin iotek, fansoun me fansoun.

Ngang mi chiwen chok feioch me ren emon sam me emon in pwe ir mi kakapas ngeni Kot. Ar nenien appiru usun ewe manamanen iotek non famini mi chok afeiochu ekkewe tappin aramas ra feito mwirir.

Nei kewe me noun nei kewe ra feioch iteiten ran ren ewe nenien appiru an semei me inei kewe. Ewe nuku pwe emon Kot mi tong mi ausening me penuweni iotek a fen keititiw ngeni ir. Ka tongeni fori ew emwirimwir non om famini. Ua iotek pwe kopwe fori.

© 2015 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/15. Kapungunon chiakun: 6/15. Chiakun First Presidency Message, September 2015. Chuukese. 12589 901

Apwapwai ewe 20th[Eruen] Ierin ewe Esinesin ngeni ewe Famini

“An Ewe Famini: Esinesin Ngeni ei Fonufan” a asukuna nongonong mi pung ikenai usun chok nupwen an we keran affateno non September 23, 1995. Ekieki om kopwe tingorei ekkewe aramas ika ekkewe famini ka afanafaner pwe repwe apwapwai ewe 20th [eruen] ierin ewe esinesin ren ar repwe:

Makketiw ekkewe nongonong ra auchea ngeni ir. (Nengeni ifa usun an Preseten Eyring a fori ei sokkun ren iotek me non ewe porous asan.)
Aporousa ifa usun an ew me ew ekkena nongonong ra tongeni afeiochur ikenai me non ekkan ran mwach.
Forata ekkoch kokkot kopwe fori ne achufengeni ngeni ekkena nongonong non manauer me om kopwe aeafengen ngeni pwan ekkoch.