Naan in Katak an Kōrā, Jeptōm̧ba 2015
Wāween Mour ko Rekwojarjar an Jisōs Kraist: Lukkuun Kajoor im Obrak kōn Aiboojoj
Kanooj jar ilo ekkatak kōn katak in im pukōt n̄an jeļā ta eo n̄an kwaļo̧k. Ekōjkan ami naaj meļeļe kadkad in mour eo ekwojarjar an Rilo̧mo̧o̧r eo ej kōļapļo̧k tōmak eo ami ilo E im kōjeram̧m̧an ro kom̧wij (bōk eddoier) mije er kōn naan in katak an kōrā? N̄an meļeļe ko reļļapļo̧k, etal n̄an reliefsociety.lds.org.
Tōmak, Baam̧le, Deeor
Jeje ko rekwojarjar rej katakin kōj bwe Jisōs Kraist “eaar bōk aolep kajoor, jim̧or ilo lan̄ im ioon laļ, im aiboojoj eo an Jemān eaar pād Ippān, bwe Eaar pād ilo E” (D&C 93:17). Elder M. Russell Ballard jān Doulul eo an Jon̄oulruo Rijilōk ro ekar ba bwe jān kajoor in ad Rilo̧mo̧o̧r ekar kōm̧anm̧an lan̄ ko im laļ, kijenmej jān metak ilo Gethsemane im Calvary.1 Ilo ad meļeļe menin, tōmak eo ad ilo Kraist enaaj eddōkļo̧k, im jenaaj erom̧ ro rekajoor.
Ilo ad kōm̧m̧an im kōjparok bujen ko an tampeļ, Irooj ej kōjeram̧m̧an kōj kōn kajoor eo An. Linda K. Burton, būreejtōn eo eutiej an Doulul eo an Kōrā, ekar ba: “Kōjparok bujen ej kōkajoorļo̧k, kōmālim, im kōjparok. … Jem̧aanļo̧k iaar iioon juon m̧ōtta eo ejitenbōro. Liin eaar kam̧ool bwe ālkin an bōk menin letok ekwojarjar an tam̧peļ eo, eaar en̄jake an kajoorļo̧k kōn kajoor eo n̄an jum̧ae kapo ko.”2
Nipai ej kwaļo̧k an naan in kam̧ool kōn kajoor in bujen: “N̄a, Nipai, iaar lo kajoor in Lam an Anij, bwe ekar bun̄ … ioon armej in bujen ko an Irooj, … im raar pojak kōn jim̧we im kōn kajoor in Anij ilo aiboojoj eļap” (1 Nipai 14:14).
Bar Jet Eoon Ko
Jān Jeje ko Rekwojarjar
An ekar obrak kōn eļap tiriam̧o̧ n̄an Matha im Meri, Jisōs Kraist ekar kōjerkakpeje eo jeir Lazarus jān mej kōn kajoor eo an Anij ekar pād Ippān.
Jisōs ekar itaakļo̧k ilo m̧weo imōn Matha im Meri ālkin an Lazerōs kallib ālkin emān raan ko. Rekar etal n̄an lōb eo an Lazerōs, im Jisōs ekar kean̄ bwe mejān lōb eo ej kalipopoik kōjem̧ eo bwe ren kōmakūti. Jisōs ekar ba n̄an Matha, “Eļan̄n̄e kwōj tōmak, kwō naaj lo aiboojoj an Anij?” Innām Ekar jar n̄an Anij im Jemān im “lam̧ōj kōn ainikien eļap, Lazerōs, kwōn itok.
“Im eo ear mej ej itok, kūtimi pein im neen kōn nuknuk in mej, im turun mejān lukwōje kōn bwinin mej.” (Lale Jon 11:1–45.) Rilo̧mo̧o̧r eo ej kōjerbal kajoor eo An n̄an pinmuuri im kōmālim kōj. Ad tōmak ilo E enaaj ļapļo̧k ilo ad keememej bwe E eobrak kōn kajoor im aiboojoj.
© 2015 jān Intellectual Reserve, Inc. Aolep jim̧we ko rej pād ippān. Jeje ilo USA. Kōmālim ilo kajin English: 6/15. Kōmālim an ukook: 6/15. Ukook eo an Visiting Teaching Message, September 2015. Marshallese. 12589 874
Ļōmņak kōn Menin
Ewi wāween an kajoor eo an Anij oņaake kōj kōn kajoor im aibojooj?