Ennaan eo an Būreejtōnji eo Kein Kajuon, Jeptōm̧ba 2015

Baam̧le ko im Jar

Jān Būreejtōn Henry B. Eyring

Rikakpilōklōk eo Kein Kajuon ilo Būreejtōnji eo Kein Kajuon

Pija

Būreejtōn Henry B. Eyring

Juon iien, ke ikar jijet itūrin peet eo an jema bon̄ōn eo, ekar bwebwenato kōn tōre ko ke ekar ajri. Ekar bwebwenato kōn iakwe eo an ro jinen im jemān ilo iien ko reppen im kōn iakwe eo an Jemwōj Ilan̄ im Rilo̧mo̧o̧r eo. Ikar jeļā bwe ekar lukkuun do̧lo̧o̧l kōn kānjer, kōn menin ekar jab lukkuun kabwilōn̄ eō elōn̄ iien ko ekar pukwōj en̄jake ko an n̄an Jemedwōj Ilan̄ kōn iakwe im jouj eo an eo jemān ioon laļ in. Jema ekar emakijkij an ba bwe ke ekar jar, ekar ļōmņak bwe emaron̄ loe ilo kōlmenļo̧kjeņ eo an an Jemedwōj Ilan̄ ettōn̄dikdik.

Jinen im jemān rekar katakini jān waanjon̄ak n̄an jar āinwōt eļan̄n̄e ekar kōnono n̄an Anij im bwe Anij enaaj uwaak e ilo iakwe. Ekar aikuji waanjon̄ak in m̧ae iien ejem̧ļo̧k an mour. N̄e metak eo ippān ej ļapļo̧k, kōm̧ij loe an kar jar ilo jibbon̄ jubukwe itūrin beet eo an. Ekar lukkuun m̧ōjņo̧ n̄an an bar walōn̄ļo̧k n̄an ioon beet eo. Ekar jiron̄ tok kōm̧ bwe ekar jar im kajjitōk ippān Jemedwōj Ilan̄ etke ekar lukkuun en̄taan ke aolep iien ekar kajjieon̄ erom juon armej em̧m̧an. Ekar ba bwe juon uwaak ejouj ekar itok: “Anij eaikuji ļaddik ro nejin reperan.”

Innām ekar kijenmej n̄an jem̧ļo̧kin, lōke bwe Anij ej iakwe e, Ekar ron̄jake e, im Enaaj kotak e. Ekar jeram̧m̧an bwe emaron̄ kar jeļā ke ekar dik wōt im ej jāmin meļo̧kļo̧k bwe juon Anij eo eļap iakwe ippāņ epaak ļo̧k āinwōt juon jar.

En̄in unin an Irooj kar katakin ro jined im jemād, im rej aikuj barāinwōt katakin ajri ro nejier jar im etetal jim̧we im̧aan mejān Irooj (Lale D&C 68:28).

Gospel eo an Jisōs Kraist em̧ōj an jepļaaktok—ippān Bok in Mormon eo im aolep kii ko an priesthood ko remaron̄ liāpe baam̧le ko—kōnke Josep Smith āinwōt juon ļaddik jidikdik ekar jar ilo tōmak. Ekar bōk tōmak in an ilo juon baam̧le eo ewōr iakwe ippāer im lukkuun tiljek.

Ron̄oul iiō ko rem̧ootļo̧k, Irooj ekar leļo̧k n̄an baam̧le ko kapilōk in “Baam̧le Eo: Juon Naan in Kean̄ N̄an Laļ in” jān Būreejtōnji eo Kein Kajuon im Doulul eo an Jon̄oulruo Rijilōk ro: “M̧are ko repen aer rub im baam̧le ko rej ejaak wōt ioon pedped ko an tōmak, jar, ukweļo̧k, jeorļo̧k bōd, kautiej, iakwe, jeļā ņae doon, jerbal, im m̧akūtkūt ko rem̧m̧an n̄an kōkkajoor doon.”¹

Ej aikuj wōr ippād juon jon̄an kam̧m̧oolol eo eļap n̄an baam̧le in an Josep Smith Rikanaan eo kōn wāween aer kar kōkkaajririik e. Baam̧le eo an rekar waanjon̄ak jab wōt kōn tōmak im jar ak barāinwōt ukweļo̧k, jeorļo̧k bōd, kautiej, iakwe, tiriam̧o̧, jerbal, im makūtkūt ko rūm̧m̧an n̄an kōkkajoor doon.

Epepen ko renaaj itok ālkimi renaaj likūt kom̧ rijeban kōn waanjon̄ak in jar eo ami ilo baam̧le eo ami. Komaron̄ jab kōkkaajririik juon rikarejar in Anij, ak komaron̄ kōn jar ko am̧ im kōn waanjon̄ak ko am̧ retiljek n̄an jipan̄ Irooj Jisōs Kraist kōkaajririik rikaļoor ro rem̧m̧an im rejitōn bōro.

Jān aolepān men kein, komaron̄ kālet n̄an jipan̄ Irooj, jar enaaj men eo eaorōktata. Elōn̄ armej ro rem̧m̧an, n̄e rej jar, reim̧we ro jet bwe ren kōppeļļo̧k mejāer im lale wōn epād ijin. Komaron̄ erom kain armej rot in.

Ļōmņak ta en̄jake eo an eo ej bukwelōlō ippān baam̧le eo am̧ ilo iien jar eo an baam̧le. Eļan̄n̄e rej en̄jake bwe kwoj kōnono n̄an Anij ilo tōmak, tōmak eo aer enaaj ļapļo̧k im renaaj barāinwōt kōnono ippān Anij. Eļan̄n̄e kwoj jar im kam̧m̧oolol Anij kōn kōjeram̧m̧an ko rejeļā em̧ōj aer iooni, tōmak ko aer renaaj eddōkļo̧k bwe Anij ej iakwe er im bwe Ej uwaake jar ko am̧ im enaaj uwaake jar ko aer. Menin emaron̄ waļo̧k ilo iien an baam̧le eo jar eļan̄n̄e ewōr am̧ en̄jake kōn jar ko am̧ rettino, iien n̄an iien.

Eļap aō jeram̧m̧an wōt kōn jinō im jema ro raar kōnono ippān Anij. Aer waanjon̄ak kōn kajoor in jar ilo baam̧le ko enaaj barāinwōt kōjeram̧m̧an epepen ko tok ālik.

Ajri ro nejū im ajri ro jibū rej jeram̧m̧an aolep raan kōn waanjon̄ak in an ro jinō im jema. Kōn tōmak in me Anij eo eļap an iakwe eo ej ron̄jake im uwaake jar ko eaar bar kōjo̧let er. Komaron̄ kōm̧m̧ane juon bwebwenato in kakemeemej kōn baam̧le eo am̧. Ij jar bwe kwonaaj.

© 2015 jān Intellectual Reserve, Inc. Aolep jim̧we ko rej pād ippān. Jeje ilo USA. Kōmālim ilo kajin English: 6/15. Kōmālim an ukook: 6/15. Ukook eo an First Presidency Message, September 2015. Marshallese. 12589 874

Kōjeram̧m̧an 20 iiō IN NAAN in Kean̄ eo an Baam̧le

“Baam̧le Eo: Juon Naan in Kean̄ n̄an Laļ in” ej katakin pedped in katak ko rainin āinwōt aer kar kwaļo̧ki jinoin ilo Jeptōm̧ba 23, 1995. Ļōmņak in karuwaineneik kajjojo ak baam̧le ko kwoj katakin er n̄an kōjeram̧m̧an 20 iiō in naan in kean̄ eo kōn:

Laajrak in pedped in katak ko me rekitbuuj wāween eo em̧m̧an n̄an er. (Lale ewi wāween an Būreejtōn Eyring kōm̧m̧ane ilo an jar ilo enaan in ilōn̄.)
Ekōnono kōn wāween an kajjojo pedped in katak maron̄ kōjeram̧m̧an er rainin im ilju im jekļaj.
Kōm̧m̧ane kajjojo kōttōbar ko n̄an kakobaikļo̧k pedped in katak kein ilo mour ko aer im n̄an kwaļo̧ki katak kein ippān ro jet.