Parau poro‘i na te mau tuahine hahaere, Setepa 2015
Te huru hanahana o Iesu Mesia : Mana puai e tei î i te hanahana
A tuatapapa na roto i te pure i teie materia ma te imi ia ite e aha te faa‘ite atu. Nahea te maramaramaraa i te huru hanahana o te Faaora e faarahi ai i to outou faaroo Ia’na e e haamaitai ai i te feia ta outou e haapa‘o nei na roto i te tere hahaereraa ? No te mau haamaramaramaraa hau atu, a haere i ni‘a i te reliefsociety.lds.org.
Te Faaroo, Te Utuafare, Te Totauturu
Te haapii nei te mau papa‘iraa mo‘a ia tatou e « ua farii [Iesu Mesia] i te mana atoa, no roto i te ao ra e i nia i te fenua nei, e ua vai noa te hanahana o te Metua ia’na ra, no te mea ua faaea oia i roto ia’na » (PH&PF 93:17). Ua parau Elder M. Russell Ballard no te Tino Ahuru Ma Piti Aposetolo e na roto i teie mana o to tatou Faaora ua haamanihia te ra‘i e te fenua, ua faatupu i te mau semeio, e ua faaoroma‘i i te mauiui rahi i Getesemane e i Kalavary.1 A taa maitai ai tatou i te reira, e tupu rahi atoa mai to tatou faaroo i te Mesia, e e puai atoa mai tatou.
A rave ai e a haapa‘o ai tatou i te mau fafauraa o te hiero, e haamaitai te Fatu ia tatou ma To’na mana. Ua parau o Linda K. Burton, peresideni rahi no te Sotaiete Tauturu, e « Te haapa‘oraa i te fafauraa, e mea haapuai, e mea horo‘a i te mana e e mea paruru … Aita i maoro a‘enei ua farerei au i te hoê hoa apî. Ua faaite papû oia e, i muri mai i to’na fariiraa i to’na oro‘a hiero, ua haapuaihia oia i te mana no te pato‘i i te mau faahemaraa ta’na i tafifi noa na ».2
Te faaite papû nei Nephi no te mana fafauraa : « E ua hi‘o hoi au, o Nephi, i te mana o te Arenio a te Atua i te pouraa mai… i nia iho i te feia i maitihia e te Fatu… o te parau-tia e te mana o te Atua i te hanahana rahi ra, o ta ratou ïa mauhaa » (1 Nephi 14:14).
Te tahi atu mau irava papa‘iraa mo‘a
No roto mai i te mau papaʻiraa moʻa
No To’na aroha rahi no Mareta e no Maria, ua faati‘a Iesu Mesia i to raua taea‘e ia Lazaro na roto mai i te pohe ma te mana o te Atua Ta‘na e mau ra.
Ua tae Iesu i te fare o Mareta e o Maria i muri a‘e e maha mahana to Lazaro tuuraahia i roto i te menema. Ua haere ratou i te menema o Lazaro, e ua faaue atura Iesu ia huri-ê-hia te ofa‘i e opani ra i te uputa. Ua parau Iesu ia Mareta, « aore au i parau atu ia oe e, i faaroo oe ra e ite oe i te mana o te Atua ? » I muri iho ua pure atura Oia i te Atua te Metua e « ua faateitei a‘era i ta’na reo, ua pii atura, e Lazaro, a haere mai i rapae.
« Ua haere maira taua taata i pohe ra i rapae, ua taamuhia na rima e na avae, i vehîhia hoi te mata i te ahu » (Hi‘o Ioane 11:1–45). Te faaohipa nei te Faaora i To’na mana no te faaora e no te horo‘a i te mana ia tatou. E rahi mai to tatou faaroo Ia’na a haamana‘o ai tatou e, ua î Oia i te mana e i te hanahana.
© 2015 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo peretane : 6/14. Parau faati‘a no te iritiraa : 6/14. Iritiraa no Visiting Teaching Message, September 2015. Tahitian. 12589 895
A feruri i teie
Nahea te mana o te Atua e faatara ia tatou i te mana e te hanahana ?