Parau poro‘i a te Peresideniraa Matamua, Setepa 2015

Te mau utuafare e te pure

Na te peresideni Henry B. Eyring

Tauturu matamua i roto i te Peresideniraa Matamua

I te hoê taime, a parahi ai au i te hiti ro‘i o to’u metua tane i te roaraa o te pô, ua paraparau mai oia i to’na tamariiraa. Ua paraparau oia i te here o to’na na metua i roto i te mau taime fifi e i te here o to’na Metua i te Ao ra e o te Faaora. I ite na vau e, te pohe ra oia i te ma‘i mariri ai taata, aita vau i maere i te tahi taime, e ano‘i oia i to’na mau mana‘o hohonu no to’na Metua i te Ao ra e te maitai o to’na metua tane tahuti. E mea pinepine na to’u metua tane i te parau e, ia pure ana’e oia, e mana‘o oia e, te ite ra oia i roto i to’na varua i te mata ata o te Metua i te Ao ra.

Ua haapii to’na na metua ia’na i te pure na roto i te hi‘oraa, e mai te huru ra e, e paraparau oia i te Atua e e pahono mai te Atua ia’na ma te here. Ua hinaaro oia i taua hi‘oraa ra i te hopea. A puai mai ai te mauiui, ua ite matou ia’na i te po‘ipo‘i i te tuturiraa i piha‘iho i to‘na ro’i. Ua paruparu roa oia no te ho‘i i ni‘a i to’na ro‘i. Parau mai nei oia e, i pure na oia no te ani i to’na Metua i te Ao ra e, no te aha oia e mauiui rahi nei, i tamata noa na ho‘i oia ia riro ei mea maitai. Ua parau oia e, ua tae mai te hoê pahonoraa marû : « Ua hinaaro te Atua i te mau tamaiti itoito ».

E ua tape‘a oia e tae roa i te hopea ; ma te ti‘aturi e, ua here te Atua ia’na, te faaroo ra ho‘i ia’na e e faateiteihia ho‘i oia. Ua haamaitaihia oia i te ite-oioi-raa e i te oreraa e haamo‘e e, maoro noa tatou i te pureraa’tu, tei ô nei to tatou Atua here.

No reira te Atua i haapii ai i te mau metua, « e e haapii atoa ratou i to ratou ra mau tamarii ia pure, e ia afaro noa to ratou haereraa i mua i te Fatu » [PH&PF 68:28].

Ua faaho‘i-faahou-hia mai te evanelia a Iesu Mesia—e te Buka a Moromona e te mau taviri atoa o te autahu‘araa o te nehenehe e taati i te mau utuafare—maoti Iosepha Semita, tei pure ma te faaroo i to’na tamariiraa. Ua roaa ia’na taua faaroo ra i roto i te hoê utuafare here e te haapa‘o.

E piti ahuru matahiti i teie nei, ua horo‘a mai te Fatu i teie a‘o i te mau utuafare i roto « Te Utuafare : E Poro‘i i to te Ao nei » na roto mai i te Peresideniraa Matamua e te Pŭpŭ no te Tino Ahuru Ma Piti Aposetolo : « Te manuïa o te mau faaipoiporaa e o te mau utuafare ua faatumuhia ia e ua haamauhia ia i ni‘a i te mau parau tumu no te faaroo, te pure, te tatarahapa, te faaoreraa hara, te faatura, te here, te aroha, te ohipa, e te mau faaoaoaraa maitai ».¹

E tarahu faito ore ta tatou ei haamauruururaa i te utuafare o Iosepha Semita te peropheta, no to’na haapiiraahia. Aita to’na utuafare i faahoho‘a noa i te faaroo e te pure, te tatarahapa atoa râ, te faaoreraa hara, te faatura, te here, te aroha, te ohipa, e te mau faaoaoaraa maitai.

E nehenehe te mau u‘i i muri mai ia outou e haamaitai i to outou i‘oa no to outou hi‘oraa no te pure i roto i to outou utuafare. Eita paha outou e riro i te faaineine mai i te hoê tavini rahi na te Atua, e nehenehe râ ta outou, na roto i ta outou mau pure e to outou hi‘oraa no te haapa‘o maitai, e tauturu i te Fatu ia Iesu Mesia ia faaineine i te mau pipi maitai e te herehia.

I roto i te mau mea atoa o ta outou e ma‘iti ia rave no te tauturu i te Fatu, tei roto roa ïa te pure. E au e, te vai nei te tahi mau taata, e taata noa mai te reira, ia pure ana‘e ratou, e riro vetahi i te araara i to ratou mata no te hi‘o e, o vai ra tei onei. E nehenehe outou ia riro mai teie huru taata.

A feruri i te auraa o te reira no te feia e tuturi ra e o outou i roto i te pure utuafare. Ia tupu mai to ratou mana‘o e, te paraparau ra outou i te Atua ma te faaroo, e rahi atoa mai to ratou faaroo no te paraparau i te Atua. Ia pure ana‘e outou no te haamauruuru i te Atua no te mau haamaitairaa ta ratou i ite e, ua tae mai, e tupu to ratou faaroo i te rahi i te mea e, ua here te Atua ia ratou e e pahono Oia i ta outou pure e i ta ratou atoa. E tupu te reira i roto i te pure utuafare i te taime noa ua farii outou i taua iteraa ra i roto i to outou iho pure, faahou e faahou â.

Te haamaitai-noa-hia ra vau e te hoê metua tane e te hoê metua vahine tei paraparau i te Atua. Te haamaitai noa nei â to raua hi‘oraa no te mana o te pure i roto i te utuafare fetii i te mau u‘i i muri mai ia raua.

Te haamaitaihia nei ta’u mau tamarii e mau mootua i te mahana atoa e te hi‘oraa o to’u na metua. Te faaroo e, te faaroo mai nei te hoê Atua here e te pahono nei ho‘i i te mau pure, ua tae mai ïa ia ratou. E ti‘a ia outou ia faatupu i te reira faufaa ai‘a i roto i to outou utuafare. Te pure nei au e, e na reira mau outou.

© 2015 na Intellectual Reserve, Inc. Faturaa paruruhia. Nene‘ihia i te Mau Hau Amui no Marite. Parau faati‘a no te reo peretane : 6/14. Parau faati‘a no te iritiraa : 6/14. Iritiraa no First Presidency Message, September 2015. Tahitian. 12589 895

Faahanahana i te 20raa o te matahiti o te Poro‘i no te Utuafare

Te haapii nei « Te Utuafare : E Poro‘i i to te Ao nei » i te mau parau tumu e tano i teie anotau, mai i te taime a vauvauhia mai ai te reira i te 23 no tetepa 1995. A opua i te ani manihini i te mau taata e aore râ i te mau utuafare ta outou e haapii ra ia faahanahana i te 20raa o te matahiti o te Poro‘i na roto i te :

Tapuraraa i te mau parau tumu e vai ra i roto o tei riro ei auraa taa ê no ratou. (A hi‘o nahea te peresideni Eyring i te na-reira-raa no te pure i roto i te parau poro‘i i ni‘a nei).
A aparau nahea te parau tumu tata‘itahi e nehenehe ai e haamaitai ia ratou i teie mahana e a muri a‘e.
A haamau i te mau opuaraa taa ê no te faaô atu i teie mau parau tumu i roto i to ratou oraraa e ia faaite i te reira ia vetahi ê.