Etop eke Visiting Teaching, Ofiong Duop ke isua 2015
Mme Edisana Edu-uwem eke Jesus Christ: Okoyoho ye Ata-ima ye Ima
Dungo nkpo ukpebnkpo emi ye akam yung yom usung ndidiongo se ekpebuanade. Didie ke ndifiok mme edisana edu-uwem eke Andinyanga edi-nam mbuotidem mbufo ke Enye okpon onyung odiong mbon emi mbufo esede enyin eto ke visiting teaching? Ke oyomde ndifik awak, ka ke reliefsociety.lds.org.
Mbuotidem, Ufokemana, Unwam
Nwed Ndausung enode Nwed Abasi akabare ata-ima nte kedi “oruk ima eke okponde-akan, enyenede-ubong akan, osongde-odudu akan” (“Ata-ima”). Oro edi edisana ima eke Jesus Christ. Nte nnyin ikpebde nkpo ibanga Jesus Christ inyung inwana ndikabare mbiet Enye, nnyin iyetongo ndikop edisana ima ke uwem nnyin ndien itongo ndima nnyung nnam nkpo nno mbon efen nte Enye akpanamde. President Thomas S. Monson eketing ete ke, “Ata-ima edi ndinyene ime ye owo efen emi okosuhore nnyin itie.” “Ata-ima edi ndikan udong eke ekpenamde isosop ndiyat esit. Ata-ima edi ndinyime mmemidem ye mme ndudue. Ata-ima edi ndida mme owo nte mmo etimde edi. Ata-ima edi ndise owo mbe ndaha ikpokidem nkesim mme edu-uwem eke miditreke ke nte ini akade iso. Ata-ima edi ndikan udong ndida owo ndomo ye owo efen.”1
Ke Nwed Mormon, nnyin imekpeb akamba akpaniko ete nnyin “ibong akam ino Ete ke ofuri odudu, man [nnyin ] iyoho ye ima emi, enye okonode kpukpru mbio emi enyimede Eyen esie, Jesus Christ ke akpaniko; man [nnyin] ikabare idi mme ndito irenowo [ye iban] eke Abasi; man ke edidi esie nnyin itie nte enye, koro nnyin iyekut enye ntre; man inyene idorenyin ito enye, man enam nnyin isana nte enye asanade” (Moroni 7:48).
Itie Nwed Abasi Efen
John 13:34–35; 1 Corinthians 13:1–13; 1 Nephi 11:21–23; Ether 12:33–34
Otode Mbuk-eset Nnyin
“Eyen-eka nnwan kiet emi mibighike ekedi ebekpa ama okop inemesit kabanga mme visiting teachers oro ekefuhode ye enye enyung edong enye esit. Enye ekewet ete: ‘Ami mma ntim nyom owo eke edinwamde mi; owo eke edikpangde-utong ino mi. … Ndien mmo ema ekpang-utong. Mmo ema edong mi esit. Mmo ema etua-eyet ye ami. Ndien mmo ema efat-ewanga mi … [enyung] enwam mi esio ke ntotungo unana idorenyin ye usuhore-itie eke mme akpa ofiong ndobo-ikpong oro.’
“Nnwan efen eting ekikere esit esie ke ini enye ekedide andibo ata edinen-ima oto visiting teacher kiet ete: ‘Ami mma ndiongo nte ke ami mmetim nwak-nkan ibat owo eke edude ke nwed-ibat ke enye edi-di ndise mi. Ami mma ndiongo nte ke enye ekere nkpo abanga mi.’”2
Ukem nte ndito-eka iban emi, ediwak mbon Latter-day Saints ke nkankuk ererimbot ekeme nditing mbanga akpaniko kabanga udim iko eke President Boyd K. Packer (1924–2015), President eke Eboho mme Apostles Duopeba etingde ete: “Ndongesit okpon didie ke edidiongo ete ke ebiet eke [ufokemana kiet ekpekemede] ndidu, ke ufokemana eke UfokAbasi odu do ebet mmo. Tongo ke usen eke mmo edisimde, erenowo eyedu ke eboho itie-oku kiet ndien nnwan eyedu ke Nka Unwam eke Iban.”3
© 2015 eketode Intellectual Reserve, Inc. Ekpan kpukru unen ndiming nwed emi. Ekeming ke USA. Enyime edikabare ke Iko Mbakara: 6/15. Enyime edikabarel: 6/15. Edikabare eke Visiting Teaching Message, October 2015. Efik. 12590 553
Kere-banga Emi
Didie ke Christ edi edisana uwutnkpo ono nnyin kabanga ima ye ata-ima?