Etop eke First Presidency, Ofiong Duop ke isua 2015
Kure ye Utuenikang Fo Ndikaka-iso Nsak
Otode President Dieter F. Uchtdorf
Udiana Ono-item ke First Presidency
Ke Idung Greece eset, mme efehe itok ekesifehe mbuba-itok eke owo kiet-kiet emi ekotde lampadedromia.1 Ke mbuba oro, mme andifehe itok ekesikama utuenikang ke ubok mmo ndien ediyak eno efehe itok efen tutu akpatre owo ke nka-itok oro edi-be akpatre nde.
Owo ikeyakke eno ino nka-itok emi ekesopde itok ekan —ekeno akpa nka-itok emi ekedisimde akpatre nde ye utuenikang mmo ndikaka-iso nsak.
Odu ata akpan ukpebnkpo mi, ukpebnkpo kiet eke mme prophet eset ye eke ini emi ekekpebde: ete kedi akpan nkpo nditongo mbuba-itok, oro kedi ata akpan nkpo ete nnyin ikure ye utuenikang nnyin ndikaka-iso nsak.
Solomon ama Otongo Ofon
Akwa Edidem Solomon edi uwutnkpo ke owo kiet emi okotongode ofon. Kini enye ekedide akparawa, enye “ama-ma Jehovah, ke asanga ke item David ete esie” (1 Kings 3:3). Abasi ama enem esit ye enye onyung odoho ete, “Benge se ndinode fi” (1 Kings 3:5).
Ke nde emi enye okpobupde oyom inyene ye anyan uwem, Solomon okobup oyom “esit oniong man ekpe ikpe ikot Abasi, man etim ofiok eti ye idiok” (1 Kings 3:9).
Emi ama etim enem Jehovah esit ke ntre Enye ikediongke Solomon ye ifiok ikpong edi ama adian akpakip inyene ye anyan uwem.
Okposukedi nte Solomon eketimde enyene ifiok onyung anam ediwak akwa nkpo, enye ikekureke ofon. Ye mfuho, ke utit uwem esie, “Solomon anam idiok ke iso Jehovah, inyung itimke itiene Jehovah” (1 Kings 11:6).
Ndikure Mbuba-itok Eke Nnyin
Ikafang ke nnyin itongo nkpo edi nnyin ikureke? Mme udia? Mme Edinam Edisinge-idem? Mme Ndisin-ifik nkot Nwed Abasi kpukpru usen? Mme Ndibiere ndidi eti asanga-utom Jesus Christ?
Esiwak didie nnyin ndinam mkpe-mbiere ke Akpa Ofiong-isua ndien inam oro ye akwa nsin-ifik ke mme esisit usen, esisit urua, ye kpa ke mme esisit ofiong ndien idisim ke Ofiong Duop, uyama nsin-ifik nnyin akabare ekpri akan mbit-mbit ntong?
Usen kiet ami mma nkut ndise-nyo nte ebua kiet anade ekpere ikpa-nwed emi enye ama ekewai. Ewet do ete, “Nwed-itoro eke Ebua Obode-ukpeb Okop-item.”
Nnyin ke ubak ini itie ntre.
Nnyin imenyene mme nti ekikere; nnyin imesitongo ofon; nnyin imoyom ndidi ata nti ke idem nnyin. Edi ke akpatre nnyin imewai, isin, inyung ifre mme mkpe-mbiere nnyin.
Edi edu-owo ke ndinam ndudue, nduo, ndien ke ubak-ini iyom ndiworo mkpong mbuba-itok. Edi nte mme asanga-utom eke Jesus Christ, nnyin ikenyimeke nditongo mbuba kpot edi ima inyime ndifehe nkure—inyung ikure mbuba oro ye utuenikang nnyin ndikaka-iso nsak nyama. Andinyanga okonwongo ono mme mbet Esie ete, “Eyenyanga owo eke edimede ime tutu osim akpatre” (Matthew 24:13).
Yak ami nnam anwanga se Andinyanga okonwongode ke eyo nnyin emi ete: Edieke nnyin idinimde ewuho Esie inyung ikure ye utuenikang nnyin ndikaka-iso nsak, nnyin iyenyene nsinsi uwem, emi edide mkpon-nkan ke ofuri mme eno eke Abasi (kese D&C 14:7; kese nko 2 Nephi 31:20).
Unwana Eke Midikpaha
Ke ubak ini ke ima ikedue, iduo, kpa ye ke ndikpong idem, nnyin isinke idem aba inyung inim ete ke unwana nnyin ama enime ndien ke mbuba-itok nnyin ama osop-usung. Edi ami nting iko ntiense nte ke Unwana eke Christ ikemeke ndinime. Enye esiyama ke ata ekim okoneyo ndien eyefiak ayama ke esit nnyin edieke nnyin iyakde esit nnyin ino Enye ikpong (kese 1 Kings 8:58).
Ke adanga nte iduo nnyin ekpewakde mme okpotungode, Unwana Christ ke asasak ayama ke nsinsi. Ndien mme ekpedi ke ata ufot okoneyo, edieke nnyin isangade itiene Enye, Unwana Esie eyefuk mme mbukpong onyung afiak asak-ayama ke mme ukpong nnyin.
Mbuba-itok eke asanga-utom emi idihe itok eke edisopde-sop ikure; edi mbuba-itok eke edifehede ebighe. Ndien anam ata esisit ukpuhore ke nte nnyin ifehede isop ika. Ke akpaniko, nkokure usung eke nnyin iditipde ke mbuba emi edi ke ndifehe ntre ke usung mme nditetre ndifehe ke akpatre.
Edi ke nte nnyin ikade iso ndidemere nnyung nsanga ntiene Andinyanga nnyin, nnyin iyekan ke mbuba-itok ye mme utuenikang nnyin ndisasak nyama.
Koro utuenikang idihe kabanga nnyin mme kabanga se nnyin inamde.
Utuenikang edi kabanga Andinyanga ererimbot.
Ndien oro edi Unwana eke midikemeke ndinime. Oro edi Unwana eke edimende ekim imen, okok unan nnyin, onyung asiaha ayama kpa ke ufot akwa mfuho ye ekim eke owo mikpekemeke ndifiok.
Edi Unwana ekekande ifiok owo.
Mbenge nte yak nnyin kiet-kiet ikure utom emi nnyin iketongode. Ndien dian ye unwam eke Andinyanga ye Andifak nnyin, Jesus Christ, nnyin iyedadara ikure ye ikure ye utuenikang nnyin ndikaka-iso nsak.
© 2015 eketode Intellectual Reserve, Inc. Ekpan kpukpru unen ndiming nwed emi. Ekeming ke USA. Enyime edikabare ke Iko Mbakara: 6/15. Enyime edikabare: 6/15. Edikabare eke First Presidency Message, October 2015. Efik 12590 553
Ukpebnkpo eketode Etop Emi
Kere banga ndinam mbon emi mbufo ekpebde man ekere ebanga ndaha eke mmo edude ke “mme mbuba” mmo ke uwem. Nte utuenikang mmo ke asasak ayama? Mbufo emekeme ndikot udim-iko emi etingde ete ke Unwana eke Christ edi “Unwana eke emende ekim emen, okok unan nnyin onyung ayama kpa ke ufot akwa mfuho ye okposong ekim.” Ndien kere banga ndineme ye mbon emi mbufo ekpebde kadanga nte Unwana Christ ekenyenede odudu ke uwem mmo ke ini edem ye nte danga unwana oro enyenede odudu ke uwem mmo idahaemi.