Mensahe sa Visiting Teaching, Oktubre 2015
Langitnon nga mga Kinaiya ni Jesucristo: Puno sang Kaluoy kag Gugma
Tun-i sing mainampuon ining materyal kag magpangamuyo agud mahibaloan kon ano ang ipaambit. Paano ang paghangop sang langitnon nga mga kinaiya sang Manluluwas makapadugang sang inyo pagtuo sa Iya kag magabugay sa ila nga inyo ginabantayan paagi sa visiting teaching? Para sa dugang nga impormasyon, maglog-on sa reliefsociety.lds.org.
Pagtuo, Pamilya, Bulig
Ang Giya sa Balaan nga mga Kasulatan nagalaragway sang gugma sa isigkatawo nga “ang pinakamataas, pinakahalangdon, pinakagamhanan nga sahi sang pagpalangga” (“Charity”). Ini ang putli nga pagpalangga ni Jesucristo. Sa aton pagtuon parte kay Jesucristo kag pagtinguha nga mangin pareho sa Iya, amat-amat naton nga mabatyagan ang Iya putli nga pagpalangga sa aton mga kabuhi kag mapaisog nga magpalangga kag mag-alagad sa iban subong sang Iya ginahimo. “Ang gugma amo ang pag-angkon sang pasensya sa isa nga nagpaslaw sa aton,” siling ni Pangulong Thomas S. Monson. “Ini amo ang pagbato sa huyog nga madali masaklaw. “Ini amo ang pagbaton sang mga kahuyang kag mga kakulangan. “Ini amo ang pagbaton sang mga tawo kon ano gid sila. “Ini amo ang pagtulok indi sa panggwa nga hitsura kundi sa mga kinaiya nga wala nagalubad sa pagligad sang panahon. “Ini amo ang pagbato sa huyog nga husgahan ang iban.”1
Sa Libro ni Mormon, matun-an naton ang importante nga kamatuoran nga kita “magpangamuyo sa Amay sa bug-os nga ikasarang sang tagipusuon agud mapuno [kita] sa sining gugma nga iya ginhatag sa tanan nga matuod nga mga sumulunod sang iya Anak nga si Jesucristo; agud nga [kita] mahimo nga mangin mga anak sang Dios; agud kon sia magapakita mangin subong kita sa iya kay makita naton sia subong nga sia gid agud mahimo naton nga maangkon ini nga paglaum agud maputli kita bisan subong nga sia putli.” (Moroni 7:48).
Dugang nga Balaan nga mga Kasulatan
Juan 13:34–35; 1 Mga Taga-Corinto 13:1–13; 1 Nefi 11:21–23; Eter 12:33–34
Gikan sa Aton Kasaysayan
Ang isa ka sister nga bag-o lang nabalo mapinasalamaton sa mga visiting teacher nga nag-unong sa iya kalisod kag nagpasulhay sa iya. Sia nagsulat: ‘Kinahanglan ko gid katama ang isa nga magdab-ot; isa nga mamati sa akon. … Kag namati sila. Ginpasulhay nila ako. Naghibi sila upod sa akon. Kag ginhakos nila ako … [kag] ginbuligan nila ako nga makalampuwas gikan sa tuman nga kalisud kag kamingaw sadtong una nga pila kabulan sang pag-isahanon.’
“Isa pa gid ka babayi ang nagpabutyag sang iya mga balatyagon sang sia nagbaton sang matuod nga gugma gikan sa isa ka visiting teacher: ‘Nakahibalo ako nga labaw pa ako sangsa isa lang ka numero sa listahan nga iya bilisitahan. Nakahibalo ako nga nagaulikid sia sa akon.’”2
Pareho sining mga sister, madamo nga mga Santos sa Ulihing mga Adlaw sa bug-os nga kalibutan ang makapamatuod sang kamatuoran sining pulong ni Pangulong Boyd K. Packer (1924–2015), Pangulo sang Korum sang Napulo’g Duha ka mga Apostoles: “Daw ano ka makapasulhay ang mahibaloan nga bisan diin man [ang isa ka pamilya mahimo] magkadto, may Simbahan [nga makabig nila nga pamilya] nga nagahulat sa ila. Sumugod sa adlaw sang ila pag-abot, ang lalaki mangin kabahin sang isa ka korum sang priesthood kag ang babayi mangin kabahin sang Relief Society.”3
© 2015 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/15. Petsa sang pagtugot sa paglubad: 6/15. Paglubad sang Visiting Teaching Message, October 2015 Hiligaynon 12590 861
Binagbinaga Ini
Paano si Cristo nangin aton himpit nga ehemplo sang pagpalangga kag gugma sa isigkatawo?