Lamharon

Gatungi ang Inyo mga Sulo: Ang 30-ka-adlaw nga Eksperimento

Para sa mga lamharon sa Simbahan nga masako ang mga kabuhi, mahapos ang maguot sa batsi sang adlaw-adlaw nga buluhaton, kapin pa nahanungod sa espirituhanon nga mga butang. Nagabasa kita sang aton balaan nga mga kasulatan, nagapangamuyo, kag nagasimba sa amo lang gihapon nga paagi halos adlaw-adlaw kag dayon natingala kon ngaa daw ara kita sa espirituhanon nga pagkadismaya.

Isa sang pinakamaayo nga paagi nga matipigan ang inyo espirituhanon nga sulo nga nagasiga sing masanag amo ang pagseguro nga nagaangkon kamo sang makahulugan nga espirituhanon nga mga eksperiyensya. Pero mas mahapos ina hambalon sangsa himuon, gani ari ang isa ka suhestyon agud mabuligan kamo nga padayon nga mag-uswag sing espirituhanon: Magpanumdum sang isa ka kahiwatan nga wala pa ninyo mahimo sang una (ukon talagsa lang gid ginahimo) kag magpangako sa paghimo sini adlaw-adlaw sa isa ka bulan. Mahimo kamo magsugod sa magamay lang tungod makita ninyo nga mas mahapos ang maghimo sang magagmay nga mga pagbag-o nga mangin dalayon. Ang paghimo sang mga butang nga nagadala sa aton sa gwa sang aton naandan nga lebel sang pagkaespirituhanon nagapangayo sang mas daku nga pagtuo kag pagpangabudlay sa aton bahin, pero kon himuon naton ang mga ini, ginaagda naton ang Balaan nga Espiritu nga mangin kaupod naton, kag nagapakita kita sang mas daku nga pagtuo sa Langitnon nga Amay kag sang paghangad nga magpalapit pa gid sa Iya. Yari ang pila ka mga ideya agud makasugod kamo:

• Maghimo sang lalab-uton nga magpangamuyo sa aga kag gab-i. Tilawi nga magpangamuyo sing matunog.

• Magbugtaw sing 15 minutos nga mas temprano kag magbasa sang inyo balaan nga mga kasulatan antes mag-eskwela.

• Magbasa sang nagligad nga mga pamulong-pulong sa pangkabilugan nga komperensya.

• Mag-post sang balaan nga kasulatan gikan sa Libro ni Mormon sa social media.

• Magpamati sa mga himno ukon musika sa Simbahan imbis sang naandan ninyo nga musika.