Mensahe sang Unang Panguluhan, Oktubre 2015
Magtapos nga ang Inyo Sulo Nagasiga Pa
Ni Pangulong Dieter F. Uchtdorf
Ika-duhang Manuglaygay sa Unang Panguluhan
Sa dumaan nga Gresya, ang mga manugdalagan nagapaindis-indis sa isa ka palumba nga ginatawag lampadedromia.1 Sa sinang palumba, ang mga manugdalagan nagakapot sang sulo sa ila kamot kag ginapasa ini sa madason nga manugdalagan tubtob ang katapusan nga miyembro sang grupo makatabok sa finish line.
Ang premyo wala ginahatag sa grupo nga nagdalagan sing pinakadasig—ginahatag ini sa una nga grupo nga nakalab-ot sa finish line nga ang ila sulo nagasiga pa.
May madalum nga leksyon diri, isa nga gintudlo sang mga propeta nga dumaan kag moderno: samtang importante ang magsugod sa palumba, mas importante pa gid nga magtapos kita nga ang aton sulo nagasiga pa.
Si Solomon Nagsugod nga Mabaskog
Ang halangdon nga Haring Solomon isa ka ehemplo sang isa nga nagsugod nga mabaskog. Sang bataon pa sia, sia “naghigugma sa Ginuo, nga nagalakat sa mga palatukuran sang iya amay nga si David” (1 Mga Hari 3:3). Ang Dios nahamuot sa iya kag nagsiling, “Pangayo ka sang akon ihatag sa imo” (1 Mga Hari 3:5).
Imbis nga magpangayo sang manggad ukon malawig nga kabuhi, si Solomon nagpangayo sang “tagipusuon nga mahangpanon sa paghukom sang imo katawhan agud nga makahibalo ako sang maayo kag malaut” (1 Mga Hari 3:9).
Nahamuot gid sini kaayo ang Ginuo nga ginbugayan Niya si Solomon indi lang sang kaalam kundi subong man sang manggad nga wala’y tupong kag sang malawig nga kabuhi.
Bisan pa si Solomon masyado gid kaalam kag nakahimo sing madamo nga makahalawhaw nga mga butang, wala sia nagtapos nga mabaskog. Ang masubo, sa ulihi nga bahin sang iya kabuhi, “ginhimo ni Solomon ang malaut sa itotolok sang Ginuo” (1 Mga Hari 11:6).
Pagtapos sang Aton Kaugalingon nga Palumba
Makapila bala ka beses nga ginsugdan naton ang isa ka butang kag wala gintapos? Mga pagdyeta? Mga programa sa pag-ehersisyo? Pangako sa pagbasa sang balaan nga mga kasulatan adlaw-adlaw? Mga desisyon nga mangin mas maayo nga mga sumulunod ni Jesucristo?
Ano bala kasunson nga nagahimo kita sang mga panaad tagsa ka Enero kag ginasunod ang mga ini nga may mabaskog nga determinasyon sing mga pila ka adlaw, pila ka semana, ukon bisan pa pila ka bulan agud lang masalapuan nga pag-abot sang Oktubre, ang kalayo sang aton pangako malapit na lang magpareho sa mabugnaw nga abo?
Isa ka adlaw nakakita ako sang makahalam-ot nga larawan sang isa ka ido nga nagahigda malapit sa isa ka panid sang papel nga iya ginpanggusnit. Ang papel nagasiling, “Sertipiko sang Paghanas sang Ido sa Pagka-matinumanon.”
Pareho kita sina kon kis-a.
Maayo ang aton mga katuyuan; nagasugod kita nga mabaskog; luyag naton nga mangin ang pinakamaayo naton nga kaugalingon. Pero sa katapusan ginabayaan naton ang aton mga panaad nga nagusnit, napabay-an, kag nalimtan.
Duna sa tawo ang masandad, mapaslawan, kag kon kaisa luyag nga mag-untat sa palumba. Pero bilang mga disipulo ni Jesucristo, nagpangako kita indi lang nga magsugod sa palumba kundi man nga tapuson ini—kag tapuson ini nga ang aton sulo nagsiga pa sing masanag. Ang Manluluwas nagpromisa sa Iya mga disipulo, “Apang ang nagapadayon tubtub sa katapusan maluwas” (Mateo 24:13)
Tugoti ako nga ihambal sa simple nga pulong ang ginpromisa sang Manluluwas sa aton nga panahon: Kon tumanon naton ang Iya mga kasuguan kag magtapos nga ang aton sulo nagasiga pa, makaangkon kita sang kabuhi nga wala’y katapusan, nga amo ang pinakadako sa tanan nga regalo sang Dios (tan-awa sa D&C 14:7; tan-awa man sa 2 Nefi 31:20).
Ang Suga nga Wala Nagakapalong
Kon kaisa pagkatapos masandad, mapaslawan, ukon bisan pa mag-untat, nagakasubuan kita kag nagapati nga wala na kita sang kasanag kag napierde na kita sa palumba. Pero nagasaksi ako nga ang Kasanag ni Cristo indi gid mapalong. Nagasiga ini sa pinakadulom nga gab-i kag magapasanag liwat sang aton mga tagipusuon kon aton lang isandig ang aton mga tagipusuon sa Iya (tan-awa sa hhh1 Mga Hari 8:58).
Bisan pa kon daw ano kasunson ukon daw ano kadalum sang aton pagkahulog, ang Kasanag ni Cristo padayon nga nagasiga sing masanag. Kag bisan pa sa pinakadalum nga kagab-ihon, kon magtikang kita pakadto sa Iya, ang Iya kasanag magalamon sang kadulom kag magapukaw sang aton mga kalag.
Ining palumba sang pagkadisipulo indi malip-ot lang nga pagdalagan; malawig ini. Kag indi importante kon ano kita kadasig. Sa pagkamatuod, ang paagi lang gid nga mapierde kita sa palumba amo ang magpangampo ukon mag-untat.
Mientras nga nagapadayon kita sa pagbangon kag pagsulong pakadto sa aton Manluluwas, nagadaog kita sa palumba nga ang aton mga sulo nagasiga pa sing masanag.
Kay ang sulo indi parte sa aton ukon sa aton ginahimo.
Parte ini sa Manluluwas sang kalibutan.
Kag amo ina ang Kasanag nga indi gid magdulom. Kasanag ini nga nagalamon sang kadulom, nagaayo sang aton mga pilas, kag nagasiga bisan pa sa tunga sang pinakadalum nga kalisod kag indi matungkad nga kadulom.
Isa ini ka Kasanag nga indi matungkad sang paghangop.
Kabay nga tapuson sang tagsa sa aton ang banas nga aton ginsuguran. Kag sa bulig sang Manluluwas kag Manunubos, nga si Jesucristo, magtapos kita sing malipayon kag nga ang aton mga sulo nagasiga pa sa gihapon.
© 2015 iya sang Intellectual Reserve, Inc. Tanan nga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/15. Petsa sang pagtugot sa paglubad: 6/15. Paglubad sang First Presidency Message, October 2015 Hiligaynon 12590 861
Pagtudlo gikan sa Sining Mensahe
Hunahunaa nga paisogon ang inyo ginatudloan sa pagbinagbinag kon sa diin sila nayon sa ila “palumba” sa kabuhi. Ang ila bala mga sulo nagasiga sing masanag? Mahimo ninyo basahon ang bahin sang pulong nga nagasiling nga ang Kasanag ni Cristo “isa ka Kasanag nga nagalamon sang kadulom, nagaayo sang aton mga pilas, kag nagasiga bisan pa sa tunga sang pinakadalum nga kalisod kag indi matungkad nga kadulom.” Dayon hunahunaa nga hambalan upod sa inyo mga ginatudloan kon paano ang Kasanag ni Cristo nag-impluwensya sang ila mga kabuhi sang nagligad kag kon paano ini nagaimpluwensya sang ila mga kabuhi sa karon.