Pweng sin Prestuhnsi Se Met, Ohktohpa 2015
Ahksahfye wi Kahp In E Lowos Srwack Fihrihr
Fin acn Greece met, sensu uh amaci ke akuhtuhn in rire uh suc pahngpahng muh lampadedromia.1 Ke akuhtuhn uh, sensu uh sruok kahp soko uh in paholos ac tahfweacng nuh sin sensu se tohkohl uh nuh ke in sun mempucr sahflah ke oak soko uh sun keso uh.
Opi ac tiac ituckyang nuh sin oak soko ma muhi emet ah—el som nuh sin oak soko emet ma sun keso uh wi kahp in e la an srwack fihrihr.
Sie mwe luti na loal pa inge, ma lutiyuck sin mwet pahluh met ah ac pacl pacna inge: tuh ke yohk srihpac in ahkwot ke akuhtuhn uh, arlac yohk srihpac likina kwewa tuh kuht in ahksahfyelah wi kahp in e lasr uh in srwack fihrihr.
Solomon El Ahkwot Kuh
Tohkohsrah Solomon el pa sie srihkasrak ke sie mwet suc ahkwot na kuh. Ke el fuhsr, el “lungse Leum God, ac el fahsrna ke mwe luti lal David, papa tumal” (Sie Tokosra 3:3). God El engan sel ac fahk elan, “Mea kom lungse ngan sot nu sum?” (Sie Tokosra 3:5).
Sahyacn siyuck ke kahsruhp kuh moul pahtok, Solomon el siyuck ke “lalmwetmet, tuh nga fah ku in kol mwet lom ke suwohs, ac in etu inmasrlon ma wo ac ma koluk” (Sie Tokosra 3:9).
Ma inge Leum El arlac engankihn yohk tuh oruh El ahkinsewowoyacl Solomon tiac ke lahlmwetmwet muhkwena tuhsruhk wi pac kahsruhp koflahna in srihkasrakuh ac wi moul loeloes.
Tuh pwacye lah Solomon el arlac lahlmwetmwet ac oruh ma wo pucspucs, tuh el tiacna tu kuh ne ke sahflah. Ahsor, tok ke moul lal, “El oru ma koluk lain Leum God, ac tiana inse pwaye nu sel” (Sie Tokosra 11:6).
Ahksahfye Akuhtuhn Lasr Sifacna uh
Pacl ekahsr kuht ahkwot ke sie ma uh ac tiac ahksahfyelah? Mongo in Ahksrihk? Prokracm in ahsrosr? Insacnweacng in riti ma suhmuhslah lwen nuh kwewa? Sulaclah in ekihn mwet tuhma lutlut wowo luhn Jisus Kraist?
Fuhkah fususiyacn ayaol nuhnak kuht oruh ke Jacnweri ac lihksreni na ukwe ke kuhiyacsr ke lusen lwen ekahsr, wik ekahsr, kuh finne mahlwem ekahsr pacna in sokwack tuh ke Ohktohpa, tuh muh wacngihnlac usrwacn insacnweacng uh?
Sie lwen ah nga tuh liyacack petsac na tahfuhnkahs se ke kosro soko oan na sisken pwepuh se el seseyac uh. Ritiyuck angwe, “Pwepuh in Akihlen Ahkpah Luhn Kosro-Ahkostwen.”
Kuhtuh pacl uh kuht oacna ngwacn.
Nuhnkweyac sesr wo, kuht ahkwot kuh; kuht kena nuh sesr in arlac kuhtaklah. Tuhsruhk ke sahflahiyac uh kuht som seseyac, sislah, ac muhlkuhnlah nuhnak kuht otwelah in oruh inge.
Ohiyacn mwet uh pa ke tihkuclkucl uh, puhtatlac, ac kuhtuh pacl uh kena fuhlweack tari. Tuhsruhk in ekihn mwet tuhma lutlut luhn Jisus Kraist, kuht tiac otwelah na in ahkwot ke akuhtuhn uh tuhsruhk in ahksahfyelah—ac in ahksahfyelah wi kahp in e lasr uh in srwack fihrihr na. Tuh Mwet Lahngo El olwelah nuh sin mwet tuhma lutlut Lal lah, “Kutena mwet su muteng nwe ke safla, el ac fah moul” (Matthew 24:13).
Lwelah nga in tahfuh ma Mwet Lahngo El olwelah in lwen lasr inge uh: Fin kuht liyacacng masap Lal ac ahksahfye wi kahp in e lasr srwack fihrihr, kuht fah wi eis moul ma pahtpaht, suc pa mwe sang se ma yohk emet ke mwe sang nuh kwewa luhn God uh (liye D&C 14:7; liye pac 2 Nephi 31:20).
Kahlwem Se Ma Tiac Wi Kunlac Uh
Kuhtuh pacl uh tukun tikuclkucl, muhnahslah, kuh ne fuhlweack pacna, kuht sun sahngwenglah ac luhlahlfongi muh kahlwem lasr uh som wacngihnlac ac kuht kuf tari ke akuhtuhn lasr uh. Tuhsruhk nga fahkwack luhlahlfongi lah Kahlwem luhn Kraist uh koflah na kunlac. El tohlwack fong lohsr na mahtoltol ac sifil puhrakwack insiyacsr fin kuht loh nuh Sel ke insiyacsr (liye Sie Tokosra 8:58).
Tiac wekyuck puhtahkah kuh lusackac puhtatlac lasr uh, tuh Kahlwem luhn Kraist fihrihr na som. Ac ne ke lohsrlohsr in fong, fin kuht sis falkacsr nuh Yohrohl, kahlwem Lal uh e afuhnlah nguhn in lohsr uh ac puhrakwack nguhnasr.
Akuhtuhn in sie sin sie uh el tiac yakyu meta se; el kahsruhsr loeloes se. Ac e wacngihn pacna eklac kac ke kuht lihksreni som uh. Pwacye tuh, inkacnek sefanna ma in ahklusye kuht uh pa in kuf kuh fuhlweack.
Ke na kuht kalweni in ahkwot ac fahsr nuh met nuh yurin mwet Lahngo lasr, kuht kuhtanglah akuhtuhn uh wi kahp in e lasr fihrihr na.
Tuh kahp in e uh tiac ma kacsr kuh ke ma kuht oruh uh.
El ma ke Mwet Lahngo luhn facluh.
Ac pa ingacn sie Kahlwem ma tiac kuh in lohsrlah. El pa Kahlwem se ma ohkohmlah lohsrlohsr uh, unwelah kihnet kacsr uh, ac kahlmwelihk e ke pacl ahsor luhlahp ac lohsr mahtoltol.
El pa Kahlwem se ma ahliki etwacack uh.
Lwelah tuh kais sie sesr in ahksahfyelah inkacnek kuht ahkwot kac uh. Ac in wi kahsruh luhn Mwet Lahngo ac Mwet Iwaclah lasr, Jisus Kraist, kuht tuhfah ahksahfye ke engan ac wi kahp in e lasr srwack fihrihr.
© 2015 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/15. Ahkkweyeyucklac ke lweng: 6/15. Lwenglah luhn First Presidency Message, October 2015. Kosraean. 12590 868
Luti ke Pweng Se Inge
Nuhnkuh in ahkkweye elos suc ma kom luti an in motko ke ohiyac elos oasr kac ke “moul in srihke” lalos uh. Kuh kahp in e lalos an fihrihr kahlwem? Kom ac kuh in riti pohloh kahs se ma fahk muh Kahlwem luhn Kraist uh pa “Kahlwem se ma ohkohmlah lohsrlohsr uh, unwelah kihnet kacsr uh, ac tohlwack in pacl ahsor luhlahp ac lohsr mahtoltol.” Na motko in sruhmuhn yurin mwet suc kowos luti an lah fuhkah ke Kahlwem luhn Kraist uh moklwelah moul lalos in pacl somlah ah ac fuhkah luhman moklweyuck ke moul lalos in pacl inge.