Klumech er a First Presidency, Ongeteruich el buil 2015
Mrekir el di Kmard a Tuich el Mobang
Sera chuodel el taem er a Greece, e a rechad er a rurt a kaidesachel er a rurt el okedongall el lampadedromia.1 Chelsel tial rurt, e a rechad a remurt loba tuich er a chimorir e kaiuediuid er ngii el mora ta me a tang el di merekmo ngike el ulebongel el chad era rurt a lochedii a teb.
A nguked a dimlak le bo er ngike el mle kot el bekerurt—ng bai mlo er sel kot el chelechad el mo lochedii a teb el dirk ke kmard a tuich lobang.
Ngarngii a dmolech el suobel er tiang, el ngii a bla lolisechakl er ngii a reprofet er a recheuodel me a chelechang: ng uaisei el klou a belkul el domuchel er a rurt, eng di ngelmuut el klou a belkul a derekir a rurt el kmard a tuich el dobang.
A Solomon a Ulemuchel el Mesisiich
A ngarbab el King Solomon a okesiul a chad lomuchel el mesisiich. Sera lekekerei, eng “mle betik a rengul er a Rubak, e ulekiu a blekeklel a demal er a David” (1 Kings 3:3). A Dios a mle chemat e ungil a rengul kirel meng uleker ngii, “Ngera soam ak beskau” (1 Kings 3:5).
Ng dimlak lolengit a iilteet malechub el klemanget er a klengar, a Solomon a bai ulengit el kirel a “ungil klemedengei er a rengul el mo merritel er a rechedal, me bo lodengelii a ungil me a mekngit” (1 Kings 3:9).
Tia liluut el dochelii a deureng er a Rubak meng ulemekngeltngat er a Solomon el dimlak di lebsa llomes ng dirrek el milsa iilteet me a kemanget el klengar ngii.
Meng uaisei el Solomon a kmal mle mellomes e riruul a betok el ungil tekoi, eng di dimlak el mesisiich el mora ulebongel. Ng mekngit el dolekoi, le uriul taem er a klengar ngii, e a “Solomon a rirelii a mekngit er medal a Rubak, e mlo diak el mui loltirakl er a Rubak” (1 Kings 11:6).
Rokir a Rurt el Dengarngii
Ng tela el taem el domuchel er a kmo ngerang e diak derekir? Omengeled? Melisiich a bedenged? Blakelreng el mo menguiu chedaol llechukl er a bek el sils? Uldesued el mo telkib el ungil chedal a Jesus Kristo?
Ng tela el taem el deruul a moktek me a telbiled sel Kot el buil e kmal blak a rengud loltirakl el sesei el klebesei, malechub eng sesei el sandei, malechub eng sesei el buil e sola mo metik er kid er a Ongeteruich el buil, el kmo sel blakelreng a telkib el kekerei er a mekelkeltang el bas?
A ta er a klebesei e ak milsa otebedechur el siasing er a bilis el medechel er a bita er a tetat el babier el blal sedelii. Ng llechukl el kmo, “Babier er a Osischakl el Mengedung a Bilis.”
Bebil er a taem e kid a kmeed el uaisei.
Ng ungil a moktek er kid, kede omuchel el mesisiich, ng kmal soad el mo ungil. Eng di sel ulebongel eng mo medechel, mechoit, malechub e kede obes aikel moktek er kid.
Ng blekerdeled a rechad el mesibas, ruebet, e a lebebil er a taem e kede tuobed er a rurt. Eng di kid el chedal a Jesus Kristo, a mla tibir el diak di domuchel er a rurt ng dirrek el kired el rokir el mora ulebongel—el mekerkard a tuich el dolab. A Osobel a mle yaksok er a rechedal kmo, “Ngike el outekangel el mora ulebongel, a mo suobel” (Mateus 24:13).
Msall e kedebengii tial yaksok er a Osobel: Alsekum e kede oltirakl a llechul e rokir a rurt el dengarngii el dmiich a tuich el dolab, e kede mo nguu a diak a ulebengelel klengar, el ngii a kot el ngarbab er a rokui el sengk er a Dios (mesa D&C 14:7; dirrek el mesa 2 Nephi 31:20).
Sel Llomes el Diak el Ngemed
Bebil er a taem ruriul er a demesibas, derebet, malechub e dekimer, eng mo seselk a rengud e omdasu el kmo a llomes el dobang a dikeang me kid a mla mo make er a rurt. Eng di a kuchais el kmo a Llomes er a Kristo a diak lemad. Ng di dmiich er a chelsel sel kmal milkolk e lmuut el mekard a rengud alsekum e kede odersii a rengud el mo er Ngii (mesa 1 Kings 8:58).
Ng diak el iior er a kmo ng tela el taem el derebet, le Llomes er a Kristo a melemolem el dmiich. Luldimukl er a ikel kmal okrokr el iilkolk, alsekum e kede omakes el bedul Ngii, e sel llomes er Ngii a dokedekii a chucheb e lmuut el mekard a rengud.
Tia el rurt er a mo chedal a diak lorechudel el rurt; ng bai marasong. Ng diak el iior er a reched a dengar tial rurt. A mera er ngii, a di tal rolel e kede mo make er tial rurt a sel lak derekir.
Ngii di dolemolem el mekiis e omakes el bedul a Kristo, e kede mo kats er tial rurt e melemolem el kmard a tuich el dobang.
Le tuich el dobang a diak lolutk el kired me a ikel doruul.
Ng melutk el kirel a Osebelel a beluulechad.
E tiaikid a Llomes el diak el bol ngemed a kerdel. Ng Llomes el oridii a iilkolk, e suumech a rengud, e melemolem el metitianged luldimukl er a chelsel aikel dmolech el klengitelreng me a chelsel a klou el iilkolk.
Ng Llomes lengelakl er a di klemedengei er kid.
A dersta er kid bo el rekir a rurt el dulchelii. E okiu a ngeso er a Osobel el ngii a Jesus Kristo, e kede mo rokir loba deureng e a tuich el dolab a melemolem el mekerkard.
© 2015 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/15. Kengei er a oidel: 6/15. Oidel a First Presidency Message, October 2015. Palauan. 12590 881
Osischeklel Tia el Klumech
Molatk el mo mengelechel er tirkal molisechakl er tir me bo lomdasu el kmo te ngar ker er tial “rurt” er a klengar. A tuich el lolab ng mekerkard a dichel? Ng sebechem el mo choiuii sel bades el kmo a Llomes er a Kristo a ngii a “Llomes el oridii a iilkolk, e suumech a rengud, e melemolem el metitianged luldimukl er a chelsel aikel dmolech el kelngitelreng me a okrokr el iilkolk.” E sola momdasu a mo mesaod lobengterir tirka el molisechakl er tir el kmo a Llomes er a Kristo ngerang mla rulii er a klengar tir er a ngaramong e ngerang mla rulii er a klengar tir er chelechang.