Mulwol ko Bin Somm’on e Presidency, October 2015
Mu’ nibay e Gal’aay rom ni Kube Dromrom
Ni yib ku President Dieter F. Uchtdorf
Bin La’gruw e Counselor u lane Bin Somm’on e Presidency
Kakrom u Greece, ma picha’an nib ta mil e yaed ma un ko ba sagreng ni kannoeg e lampadedromia ngay.1 Lane fare sagreng, ma picha’an nima mil e yaed be koel e gal’aay roraed nga pa’ raed miyaed pi’ ngak e cha’an migid ni nge mil nge taw ko ngiyal’ ni yaed gubin ni kar thap gaed ko tomur.
Fare tawa’ath e dani ma pi’ ngak e ra ulung ni tha’abi peay nike mil—ra tawa’ath e kan pi’ ngak e ra ulung ni tha’abi somm’on nike thap ko tomur nikab dromrom e gal’aay roraed.
Bay ban’en ni ran fil u roy, reb nike fil e pi profet ni kakrom nge chiney: baga’ fan ni ngan tabab nag fare sagreng, machane rib gel e ga’fan riy ni ngad mu’ gaed ni kubay e gal’aay rodaed ni kube dromrom.
Solomon e Tabab nib Gel
Solomon ni Pilung e reb e wo’ ni bee’ ni tabab nib gel. Nap’an nikab fal’ yangren, ma “ba t’uf Somol rok, ma fol ko thin rok David ni chitamngin” (1 Kings 3:3). Ba falfalen’ Got ngak me ga’ar, “Mang e ga ba’adag ni nggu pi’ ngom” (1 Kings 3:5).
Mus ni nge fith ngak e fal’ab fa nge n’uw e yafas rok, me fith Solomon ni ngan pi’ ngak e “gonop ni nge yag ngog ngu’ug gagiyegnag e girdi’ rom nrogon nib yal’uw ma ngug nang e n’en nib thil ko tin ni bfel’ nge tin nib kireb” (1 Kings 3:9).
Biney e falfalen’ Somoel ngay me yibliy Solomon ni gathi kemus ni gonop machane kiki fal’eg wa’athan ko fal’ab nge yafas rok nike n’uw nag.
Demtrug rogon ni rib llowan’ Solomon ma ke rrin’ bukun ban’en nib falel’, ma dani mu’ nib gel. Ba kirbaen’, ni ta’boech riy u lane yafas rok me, “I denen nib togopluw ngak Somoel ma daki par nib yul’yul’ Ngak” (1 Kings 11:6).
Mu’ Niged e Birodaed e Sagreng
Uw urngin yay ni kad tabab niged ban’en ma darni mu’ nag? Abich ni yib sag’al ngay? Pi program ko exercise? Pi m’ag ni ngan bi’eg fapi chep nib thothup ni gubin e rran? Tin nikan mel’eg ni ngan mang e pi gachalpen Yesus Kristus nib mangil?
Uw urngin yay ni gadaed ma dugliy ban’en u lane January man rrin’ u lan in e rran, lan in fan e wiik, fa lan in e pul ma kemus ni pir’eg u lane October, ni fare ram’en e nifiy ko m’ag rodaed e ke boed e awat nike aw a garbeb ngay?
Reb e rran e gguy ba sasing ni ya’an ba kus nibe mol u to’ban ba babyor nike gusthuy nib mak’ak’ar ya’an. Bay e yol riy nibe ga’ar, “Gidii’ nibay e Babyoren raed ni ngar Llowan’ Niged e Kus.”
Boech ngiyal’ ma aram rogon gadaed.
Fal’ e tafney rodaed; gadaed tabab ni gadaed ba gel; ma gadaed ba adag ni ngad cheg gaed. Machane tomur ma kad digeyed e tin ni kad dugliyed ni ngad rrin’ed nike mogchod, kan n’ag, ma kan pagtilin.
Ban’en ko gidii’ ni ngan doel’, man kirbaen’, ma boech ngiyal’ e yi ba adag ni ngan tal ko fare sagreng. Machane gadaed ni pi gachalpen Yesus Kristus, ma gathi kemus ni kad dugliyed ni ngad tabab niged fare sagreng machane kukun dugliyed ni ngad mu’ niged— man mu’ nag ni kubay e gil’aay rodaed ni kube dromrom nib gel. Ke micheg Tathapeg nag ngak e pi gachalpen ni, “En nra athamgil nge mada’ ko tomur e rayag e yafos ngak” (Matthew 24:13).
Soen ni nggu weliy e n’en nike micheg nag Tathapeg ngodaed u lane rran rodaed: Fa’anra gadaed ra fol ko pi motochiyel Rok man mu’ ni kubay e gil’aay rodaed nib dromrom, ma rayog e yafas nib manemus ngodaed, ni bin tha’abi fel’ u fithik e pi tawa’ath rok Got (muguy ko D&C 14:7; kum guy ko 2 Nephi 31:20).
Fare Tamilang ni Darma Maath
Boech ngiyal’ ko tomuren nikan doel’, kan kirbaen’, fa kan tal’, ma musan’ daed ma gadaed leam nag nike ma’ e tamilang rodaed ma kad waer gaed ko birodaed e sagreng. Gube micheg ni fare Tamilang rok’ Kristus e dabiyog ni nge maath. Ma mat’ u fithik e gin tha’abi lumor ma ra tamilang nag bayay gumircha’daed fa’anra kemus ni gadaed ra pi’ gumircha’daed Ngak (muguy ko 1 Kings 8:58).
Demtrug urngin yay fa rogon ni gadaed be mul, ma fare Tamilang rok’ Kristus e kube dromrom nib gel. Ma kumus u fithik e lumor nib almarin, machane fa’anra gadaed ra yaen Ngak, ma tamilang Rok e ra chuweg fapi lumor me pi’ gelngin e ya’el rodaed.
Biney e sagreng ko gachalpen e gathi’ sagreng nib papay; ban’en ni yibe paer ma yibe gay rogon ni ngan rrin’. Ma ra thil rogon pangin ni gadaed be yaen. Arrogon, kemus ni rayog ngad waer gaed ko fare sagreng fa’anra karin pagey ngay fa kan tal.
Nap’an ni gadaed ra ul’ul’ iyan ni ngan athamgil man yaen iyan ngak e Tathapeg rodaed, ma gadaed gel nag fare sagreng nibay e gil’aay rodaed ni kube dromrom nib gel.
Ya fare gil’aay e gathi mornga’agen dad fa mornga’agen e n’en ni gadaed be rrin’.
Mornga’agen fare Tathapeg ko Fayleng.
Ma iraram e ra Tamilang ni ri dabiyog ni nge maath. Ba tamilang nima chuweg e lumor, me gol nagdaed, ma rib gel u fithik e kirbaen’ nge pi magawon nib alamrin.
Ba Tamilang ni dabiyog ni ngan nang fan.
Ayra bagadaed me mu’ nag e ra kanawo’ nike tabab nag. Ma ayuw nibay rok e Tathapeg nge Tabiyul rodaed ni, Yesus Kristus, ma rayog ngad mu’ gaed u fithik e falfalen’ ni bay e gil’aay rodaed ni kube dromrom.
© 2015 by Intellectual Reserve, Inc. Gubin mabay matwon. Kan yoloey u Mariken. Kan micheg nag ko thin nu Ngalis: 6/15. Micheg nag i pilyeg: 6/15. Pilyeg thin ko First Presidency Message, October 2015. Yapese. 12590 905
Rogon ni ngan Fil ko Biney e Mulwol
Mu pi’ e athamgil ngak e picha’an ni gabe sensey nag ni ngar leam niged ko uw e yaed bay riy u lane “sagreng” roraed u lane yafas. Fapi gil’aay roraed e be dromrom nib gel? Rayog ni ngam bi’eg fare thin nibe yoeg ni fare Tamilang rok’ Kristus e “ba tamilang nima chuweg e lumor, me gol nagdaed, ma rib gel u fithik e kirbaen’ nge pi magawon nib alamrin.” Ma arame mag weliy ngak e picha’an ni gabe sensey nag rogon nike ayuweg raed fare Tamilang rok’ Kristus u lane yafas roraed kafram nge rogon nibe ayuweg raed u lane yafas roraed e chiney.