Klumech er a First Presidency, Ongeteruich me a Ongerung el Buil 2015
Mdedesau el kirel Osobel
Ng kuk mocha temel a Kurismas lobengkel a merael mei el beches el rrak. Ng kora dirk mle cheliseb e ra doutkeu er a cherelel a Osobel e omekbeches a telbiled.
Ma mle tara telbiled er chelechal rrak, kede dilemii ra rengud el mo dmedesii ra chelsel a klengar er kid ma techall el bo lultab er a chelsel a rengud a Osobel? Ma ltang e kede mlo ngeltengat el kirel sel telbiled, e ngak a ungil medengei el kmo ke de oureng el rokui el soad el lemuut el mo ungil. Tiakid el temel a Kurismas a bedochel el taem el dorritel e omekbeches a ngercheled.
Meke de mechesang el mengisemuk ra klengar kid, luldimukl er a idisel a betok el tekoi el mengesang a uldesued, e kmal klou a belkul el kired el kutmeklii ra rengud, el lorrengelii a ngercheled el nguu a Kristo el mei er a klengar er kid ma chelsel a blid. E kmal orechudel el kired, el di ua tirkel Rubak era Ongos, el delalem osengir lomes er sel btuch er Ngii e “merael mo mengull er ngii.”1
Meng ngulmuchel er a uchelel a beluulechad el mei er chelchal taem, ea tekingel a Kristo a dirk osisiu. Meng mlora Petrus ma Andrew ra le ngara bkul a chelechol er a Galilee, eng dilul kmo, “Moltirakl er ngak.”2 Meng mlora Philipus eng mlo okedong el kmo, “Moltirakl er ngak.”3 E mlo re ngike el Levite el mle dengchokl el melai a teksir a rechad eng mlo okedong el kmo, “Moltirakl er ngak.”4 Ma le bor kau e le me er ngak, ea ulekum me kede orrenges, eng mei sel osisiu el okedong lolengit el kmo: “Moltirakl er ngak.”5
Mesel bo doltirakl a blekeklel ochil er chelechal taem e sel dosuub er a okesiul, e kid a momes a techall el mo omekngeltengat e ra klengar er a rebebil. A Jesus a mengemedaol er kid el mo mesiou: “Mesang, a Rubak a ousbech er a semeriar reng ma uldasu.”6
Ngarngii a chad el kau a kirem el mo ngosuir er chelechal Kurismas? Ngarngii a kmong techang el mengiil er kau el mo odngelii?
Kesai el rrak ra mla memong ra Kurismas e ak mlo oldingel ra blil a uodel el mla melakl el dil. Me tia er ak ngarngii, eng milngosm a kabalang er a chesimer. Ea mle duum e ra medal a tuangel a kmal mechesang el ngarbab el toktang. Ng dimlak el mokedong; ngbai, kuk di mle ngii el soal el mo oldingel e ra smecher el mle sabisi.
A uai ikaikid el taem, ea rengrir tirkel diak el sebecherir el merael osiik a oureng me bo desterir sel Kurismas. Ng mle ta el Kurismas ra bo kuldingel ra blirir a re mechuodel, eak mle dengchokl el mengedecheduch e ra re teim el mechuodel el redil, eng kel kot el klou er tir a mle dart ma tang a rekil. Ng mle mikou, eng di ng mle sebechel dongchak e ra kungedecheduch.
“Bisop, kau a telkib el mlo meoud er chelechal rak!” ng millekoi. “Ng di renguk eng dikea mluut el mei.”
Ng kmal mle ungil a sils er kemam el terung. Ea tara chitechut, a kuk kora sabisi el lomes ra mado e lomelekl a tekingel el kmo, “Ak medengei el ngelekek el sechal a mei el memes er ngak er chelechal sils.” Mak melbedebek el kmo ngmo sebechel, e leng ngarngii a bebil e ra temel a Kurismas eng diak el lomekedong.
Eng di ng dirk ngarngii a taem er chelechal rak el dodars a ngeseu, ma beltikereng, ma reng el semeriar—el di uai a, doltirakl er sel lokesiu el kiltmeklii a Osebeled e mo mesiou el di ua sel Ngii a soal sel dosiou. Mesel dosiou er Ngii, eng diak el bol ngemed a techeled, el di ua ngkel chad el oungerachal e ra lengiil el blai ra ngaramong,7 me tial klengar er kid e kede odars a temed el msang meng mo kiei e ra chelsel a rengud.
Kid ng sebeched el melchesuar sel klebokel el telbiil el anghel a dilii el mo er tirkel mengkar a sib el lultekangel el ngara ked: “A kuchais er kemiu ra ungil klumech e ra klou el deuereng.” … Chelechal sils eng mlechell a … a Osebeliu, el Kristo el Rubak”?8
Ma bo de kerous a beresent er a Kurismas, e bode letkii, e doureng a soal, e denguu sel kot el ngarbab el sengk el ngii el sengk—a sengk e ra Osebeled, me bol sebeched el nguu a diak a ulebengel klengar.
“Le ngerang a klungiolel el mora chad alsekum meng nguu ngil sengk, eng di diak e ra omerellel? Mesang, ngdiak el bo loldeu e ra rengul ra mlodars el morngii, ma ka lebol lungil rengul el kirel a milsang tial sengk.”9
Bo doltirakl er Ngii, mesiou er Ngii, e dodengesii, e dengai el dualem ra klengar er kid aikel sengk el beskid, me bode, ua ikel tekingel a Demad e ra Lehi, “longeluoleu er kid el mora ulebongel el ngara imal loba beltikereng.”10
© 2015 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/15. Kengei er a oidel: 6/15. Oidel a First Presidency Message, December 2015. Palauan. 12592 881
Osischeklel Tia el Klumech
A President Monson a omekedong er kid el mo “ kutmokl a uldelomel, e klebech el ureor el nguu a Kristo el mera klengar er kid ma delengchekled.” Momes el kmo tirkel chad el molsisechakl er tir te mekerang e sebecherir el mo uldelomel a rengrir ra ngerchelir ma le telungalk. Momes mal sebechemiu e moker er tir me lomdasu el kirel a chimol chad malechub eng telungalk el bo loldingel er ngii malechub e te mesiou er chelechal Kurismas. “Ng kmal dirk ngarngii a taem er chelechal rrak el dodersii chimad el lolngeseu, odars a beltikereng, ma klemeriar el reng.”