Thawj Pawg Thawj Tswj Hwm tsab Xov, Ib Hlis Ntuj 2016
Kev Zoo Siab rau cov uas Peb Hlub
Los ntawm Thawj Tswj Hwm Henry B. Eyring
Tus Pab Cuam thib Ib hauv Thawj Pawg Thawj Tswj Hwm
Peb sawv daws xav kom cov uas peb hlub muaj kev zoo siab, thiab tsis xav kom lawv raug kev nyuaj siab. Thaum peb nyeem tej zaj txog kev zoo siab—thiab kev nyuaj siab—nyob hauv Phau Ntawv Maumoos, ua rau peb lub siab xav txog cov uas peb hlub. Nov yog ib zaj tseeb txog ib lub caij zoo siab:
“Thiab tau muaj tias twb tsis muaj kev sib cav sib ceg rau hauv thaj av, vim yog Vajtswv txoj kev hlub uas tau nyob hauv cov neeg tej siab.
“Thiab tsis muaj tej kev xav tau luag tug, los sis tej kev sib cav sib ceg, los sis tej kev sib thab, los sis tej kev ua niam ntiav, los sis tej kev dag, los sis tej kev tua neeg, los sis ib yam kev xav sib daj sib deev li; thiab tseeb tiag tsis tau muaj ib co neeg ua zoo siab tshaj nyob hauv tag nrho cov neeg uas tau raug tsim los ntawm Vajtswv txhais tes.”
Ces peb nyeem hais tias:
“Thiab lawv tau koob hmoov heev! Vim tus Tswv tau foom koob hmoov rau lawv nyob rau tag nrho tej uas lawv ua; muaj tseeb tiag, lawv twb tau koob hmoov thiab vam meej mus txog ib puas thiab kaum xyoo tau dhau mus; thiab thawj tiam neeg txij li Khetos los tau dhau mus, thiab tsis tau muaj kev tsis sib haum nyob txhua qhov hauv thaj av” (4 Nifais 1:15–16, 18).
Cov ntseeg Khetos uas muaj kev siab hlub thov Vajtswv thiab ua hauj lwm kom tau cov koob hmoov zoo li no pub rau lwm tus thiab pub rau lawv tus kheej. Los ntawm tej zaj nyob hauv Phau Ntawv Maumoos thiab, los ntawm tej uas muaj los rau peb feem coob, peb thiaj paub tias peb txais tau kev zoo siab. Peb paub tias muaj ntaus lub cim nyob ntawm txoj kev zoo siab. Peb kuj paub hais tias yeej tsis yooj yim muaj kev zoo siab txhua lub sij hawm tsuas yog, xws li cov Neeg Nifais tom qab tus Cawm Seej tuaj xyuas lawv, “Vajtswv txoj kev hlub” nyob hauv peb lub siab.
Txoj kev hlub ntawd nyob hauv cov Neeg Nifais lub siab vim lawv ua raws li txoj kev cai. Lub ntsiab ntawm txoj kev cai ntawd nyob hauv ob zaj lus thov Vajtswv rau lub cim nco txog, uas pib nrog ib txoj kev thov rau peb Leej Txiv Saum Ntuj Ceeb Tsheej uas hlub peb. Peb muaj siab ntseeg thiab muaj kev hlub rau peb tus Cawm Seej thaum peb thov Vajtswv. Peb rau siab ntso ris Nws lub npe, nco ntsoov Nws, thiab ua raws li Nws cov lus txib. Thaum kawg, peb muab siab rau ntseeg hais tias tus Vaj Ntsuj Plig Dawb Huv, tus thib peb ntawm Pawg Vajtswv, yuav nrog nraim peb nyob, ua tim khawv rau peb lub siab txog Leej Txiv thiab Nws Leej Tub uas Nws hlub. (Saib Q&K 20:77, 79.)
Nrog rau tus Vaj Ntsuj Plig Dawb Huv, peb lub siab yuav hloov ua rau peb yuav xav tau thiab tos txais peb Leej Txiv Saum Ntuj Ceeb Tsheej thiab tus Tswv Yexus Khetos txoj kev hlub. Kev txais tau Vajtswv txoj kev hlub nyob hauv peb lub siab yeej yooj yim, ib yam li txoj kev poob txoj kev hlub nyob hauv peb lub siab kuj yooj yim thiab. Piv txwv hais tias, tej zaum ib tug neeg yuav xaiv thov Leej Txiv Saum Ntuj Ceeb Tsheej tsawg dua li qub los sis tsis them ib feem kaum ntxiv los sis tsis txhob kawm Vajtswv txoj lus tsis tu tsis tseg los sis tsis quav ntsej txog cov pluag thiab cov uas xav tau.
Ib yam dab tsi peb ua uas tsis yog raws li tus Tswv tej lus txib yuav ua kom tus Ntsuj Plig tawm ntawm peb lub siab. Thaum tsis muaj tus Ntsuj Plig, ces kev zoo siab ploj zuj zus mus.
Kev zoo siab uas peb xav tau rau cov uas peb hlub nyob ntawm seb lawv xaiv dab tsi. Txawm peb hlub ib tug me nyuam, ib tug neeg uas peb qhia, los sis peb cov phooj ywg npaum li cas los, peb yuam tsis tau lawv kom lawv ua raws li cov lus txib ua rau lawv thiaj tsim nyog muaj tus Vaj Ntsuj Plig Dawb Huv uas tshoov thiab hloov lawv lub siab.
Yog li ntawd txoj kev pab zoo tshaj uas peb pub tau yog tej yam twg uas coj cov uas peb hlub kom lawv xav txog tej yam lawv xaiv zoo zoo. Amas tau hais ib co lus uas tej zaum nej hais tau thiab:
“Tiam sis nej yuav tsum txo nej tej hwj chim rau tus Tswv, thiab hu nws lub npe dawb huv, thiab xyuas thiab thov tsis tu ncua, kom nej yuav tsis raug ntxias tshaj qhov uas nej tiv taus, thiab xwv kom yuav raug tus Ntsuj Plig Dawb Huv coj, rais los mus ua neeg txo hwj chim, siab dawb siab zoo, zam rau lwm tus, ua siab ntev, muaj kev hlub puv npo thiab muaj kev ua siab ntev nyiaj huv tib si;
“Muaj kev ntseeg rau tus Tswv; muaj txoj kev cia siab tias nej yuav tau txais txoj sia nyob mus ib txhis; muaj Vajtswv txoj kev hlub nyob hauv nej tej siab tas mus li, xwv kom nej yuav raug tsa sawv nyob hauv hnub kawg thiab nkag mus rau hauv nws qhov chaw so” (Amas 13:28–29).
Kuv thov Vajtswv kom cov uas nej hlub yuav txais nej cov lus caw kom xaiv txoj kev zoo siab uas kav ib txhis.
© 2016 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam ua lus Akiv: 6/15. Pub txhais ua lus Hmoob: 6/15. Kev txhais First Presidency Message, January 2016. Hmong. 12861 295
Qhia los ntawm tsab Xov No
Thawj Tswj Hwm Eyring qhia hais tias peb txoj kev zoo siab nyob hauv lub neej no nyob ntawm seb peb txiav txim siab li cas. Thaum nej sib tham txog zaj lus no, cia li xav seb puas tsim nyog tsom ntsoov rau tej yam uas Thawj Tswj Hwm Eyring qhia txog tej yam uas peb muaj peev xwm xaiv ua (xws li kev thov Vajtswv, kev ua hauj lwm, kev muab siab rau ntseeg, thiab kev cog lus tiag tiag) kom coj peb mus rau hauv txoj kev zoo siab. Tej zaum koj caw tau cov uas koj qhia kom lawv sau ob peb yam cia uas lawv xav ua kom coj tau lawv mus rau “txoj kev zoo siab uas kav ib txhis.”