Cov Mus Saib Xyuas Tom Tsev tsab Xov, Ib Hlis Ntuj 2016
Tsev Neeg: Ib zaj Lus Tshaj Tawm rau lub Ntiaj Teb
Ua tib zoo thov Vajtswv kawm tej yam no thiab nug seb koj yuav tsum qhia dab tsi. Qhov uas koj to taub cov lus qhuab qhia txog tsev neeg yuav foom koob hmoov li cas rau cov uas koj mus saib xyuas tom tsev? Kom tau ntaub ntawv xov xwm ntxiv, cia li txuas rau reliefsociety.lds.org.
Kev Ntseeg, Tsev Neeg, Kev Pab
Hais txog kev sib ntsib ntawm lub Koom Haum Niam Tsev nyob rau xyoo 1995, thaum Thawj Tswj Hwm Gordon B. Hinckley (1910–2008) nyeem “Tsev Neeg: Ib zaj Lus Tshaj Tawm rau lub Ntiaj Teb,” Bonnie L. Oscarson, tus tuam thawj tswj hwm ntawm lub Koom Haum Ntxhais Hluas, hais tias: “Peb ris txiaj thiab saib zaj lus uas txais los ntawm kev tshwm sim no rau nqi vim nws meej, yooj yim to taub, thiab muaj tseeb. … Zaj lus tshaj tawm txog tsev neeg twb yog peb txoj kev saib seb neeg ntiaj teb tej lub tswv yim puas zoo, thiab kuv ua tim khawv hais tias tej ntsiab cai uas lawv sau rau hauv zaj lus no muaj tseeb hnub no ib yam li tej lus no muaj tseeb txij thaum Vajtswv tus yaj saub tau muab tej no rau peb 20 xyoo tas los.”1
Carole M. Stephens, tus pab cuam thib ib nyob hauv lub Koom Haum Niam Tsev pawg tuam thawj tswj hwm hais tias, “Los ntawm zaj lus tshaj tawm txog tsev neeg, peb kawm hais tias, ‘Nyob rau lub qub neej, tej tub ntsuj plig thiab tej ntxhais ntsuj plig tau paub thiab teev tiam Vajtswv ua lawv Leej Txiv uas Nyob Mus Ib Txhis Li.’2 …
“… Peb txhua tus koom nrog Vajtswv tsev neeg thiab Vajtswv xav tau peb.”2
Peb nyob hauv ib lub caij nyoog thaum cov niam tsev txiv tsev yuav tsum pov hwm lawv tsev neeg. “Tsev Neeg: Ib zaj Lus Tshaj Tawm rau lub Ntiaj Teb” coj tau peb txoj hau kev.
Vaj Lug Kub Ntxiv
Zaj Dab Neeg uas Muaj Sia
“Lee Mei Chen Ho los ntawm Pawg Ntseeg Tao Yuan Third, Ceg Txheem Ntseeg Tao Yuan Taiwan, hais tias zaj lus tshaj tawm no qhia nws hais tias nws tsev neeg pab nws coj tej cwj pwm li Vajtswv xws li kev ntseeg, kev ua siab ntev, thiab kev hlub. Nws hais tias, ‘Thaum kuv sim ua zoo dua raws li qhia nyob hauv zaj lus tshaj tawm, ua rau kuv txais tau kev zoo siab tiag tiag.’”4
Barbara Thompson, tus uas nyob thawj zaug tau nyeem zaj lus tshaj tawm thiab tom qab ntawd ua hauj lwm ua ib tug pab cuam nyob hauv lub Koom Haum Niam Tsev pawg tuam thawj tswj hwm hais tias: “Kuv xav ib me pliag hais tias [zaj lus tshaj tawm txog tsev neeg] tsis hais txog kuv vim kuv tsis tau yuav txiv thiab kuv tsis tau muaj me nyuam. Tiam sis ua rau kuv xav kiag tom qab ntawd hais tias, ‘Tiam sis zaj no hais txog kuv thiab. Kuv muaj ib tsev neeg. Kuv yog ib tug ntxhais, ib tug viv ncaus, ib tug pog, ib tug niam tais, thiab ib tug ntxhais xeeb ntxwv. … Txawm kuv yog tib tug neeg uas tseem muaj txoj sia nyob hauv kuv tsev neeg, kuv tseem yog ib tug neeg nyob hauv Vajtswv tsev neeg.’”5
© 2016 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam ua lus Akiv: 6/15. Pub txhais ua lus Hmoob: 6/15. Kev txhais Visiting Teaching Message, January 2016. Hmong. 12861 295
Xav Txog Qhov No
“Tsev Neeg: Ib zaj Lus Tshaj Tawm rau lub Ntiaj Teb” yog ib zaj lus rau peb lub caij nyoog li cas?