Klumech er a First Presidency, Kot el Buil 2016
Deureng el mo er Tirkel Betik er a Rengud
Mla er a President Henry B. Eyring
Kot el Counselor er a First Presidency
Kid el rokui el soad a deureng a le bo er tirkel betik er a rengud, e soad a bo lak el sal kmal ngara ringel. Sel donguiu a cheldecheduch el kirel a deureng— me a ringel—er a chelsel a Babier er a Mormon, eng mo ouedikel a rengud sel domdasou el kirir a rebetik er a rengud. Tiakid a meral cheldechedechal a taem er a deureng:
“Meng mlo diak a klautok er a beluu, le ng beltikelreng er a Dios el ngii a mlara chelsel a rengrir a rechad.
“E dimlak a klachechei, malechub a klautok, malechub a nglemuu, malechub a roteruul el redil, malechub a blulak, malechub omekeuad,malechub e ngii di el mekngit lomeruul; meng meral dimlak a re ngara deureng el chad el mo uai tir er a chelsir a rokui el chad el mla obeob er a chimal a Dios.
E sola kede mengiui el kmo:
“Me te meral mle ngeltengat! Le Rubak a ulemekngeltengat er tir er a ikel rokui loruul; oi, te mlo ngeltengat e mlo ungil beserir el mo el muut er a rekil a dart me a teruich el rak; el sel kot el telcheroll er a taem er a Kristo a ngilemed, e dimlak a klautok er a beluu el rokir” (4 Nephi 1:15–16, 18).
A roba beltikelreng el chedal a Kristo a ngara nglunguuch e oureor el kirel tiaikid el deureng el mora rebebil me a dirrek el tir. Ngara ikal cheldecheduch er a chelsel a Babier er a Mormon, me a dirrek el betok er kid, er a ikel teletael el mla dubech el mei er kid, e kede medengei el kmo a sengk er a mo ngara deureng a sebechel tekoi. Kede medengei el kmo a rael el mora deureng a kmal bleketakl. Kede dirrek el medengei el kmo ng diak el beot el tekoi a dolemolem el ngara deureng alsekum, el uaia re Nephites ruriul er a odngelel Osobel, “a beltikelreng er a Dios” a diak el delalem er a chelsel a rengud.
Tia el beltikelreng a mle delalem er a rengrir a re Nephites le tir lultirakl a llach el uchul eng mlo uaisei. A kedeb lomesodel tial llach a debetik er ngii er a chelsel sel nglunguuch er a sakrament, el ngii omuchel loba medemdemk el reng longit el mora Chedam er a Babeluades. Kede meluluuch loba reng el mui er a klaumerang, me a dmolech el beltikelreng, el mora Osobeled. Kede oba blakelreng e tibir er a rengud el mo nguu a Ngklel, mo melbedebek er Ngii, e mo oltirakl a rokui el Llechul. E a ulebongel, e kede oumerang el kmo a Chedaol Reng, el ngii ongedei el chedal a Kledios, bol blechoel lobengked,e louchias er kid el kirel a Chedam me a Betik er a Rengul Ngelekel. (Mesa D&C 20:77, 79.)
Ngokiu a chelmenged er a Chedaol Reng, e a rengud a sebechel mengodech el uchul eng mo soad e mengemedaol er a beltikelreng er a Demad er a Babeluades me a Rubak el Jesus Kristo. A rolel e kede nguu a beltikelreng er a Dios el mei er a chelsel a rengud a beot, el diosisiu ngii me a bo lak a beltikelreng er a rengud. Okesiul tiang, a chad a sebechel melilt el mo diak el sal blechoel ngara nglunguuch el mora Chedam er a Babeluades malechub eng diak el harau a mui el ongeltacher malechub eng mo diak losuub a tekingel a Dios malechub eng mo diak lolngeseu er a remechebuul me a rengesool.
Ngii di el omelilt el rullid el mo diak doltirakl a llechul a Rubak a sebechel uchul e a Chedaol Reng a mo diak el ngara chelsel a rengud. E sel bo lak, eng mo diak a deureng.
A deureng el soad a le bo er a rebetik er a rengud a ultuil er a omelilt er tir. Ng uaisei el betik a rengud er a ngalek, me a chad el mesuub er a ebangkelio, me a resechelid, eng di diak el sebeched lorrimel er tir el mo oltirakl a llach me bo luchul e a Chedaol Reng bol rutech e lengodech a rengrir.
A leuasiei e a kot el ungil ngeso el kid a mesterir a sel ngii a mo rulterir tirkel betik er a rengud el mo kerekikl a ikel lolilt el meruul. A Alma a rirellii lokiu a siotai el dirrek el sebechem lousbech er ngii:
“Bol ngariou a rengum er medal a Rubak, e momekedong er a chedaol ngklel, e bom kerekikl e molemolem el ngara nglunguuch, me lak bo mechetikaik lengelakl er sel diak el sebechem, me bo mukrael er a Chedaol Reng, el mo ngariou a rengum, medemdemk, cheluch, klou a rengum, e mui er a beltikelreng me a kllouelreng;
“A Oba klaumerang er a Rubak; me a urunguled el kmo kede mo nguu a diak a ulebengelel klengar; e di blechoel loba beltikelreng er a Dios er a rengud, a uchul e kede mo mosebechakl er sel uriul sils e mo soiseb er a ulengull lobengkel” (Alma 13:28–29).
Nglunguchek me tirkel betik er a rengmiu bol kengei er a ulekrael el siotai el mo melilt er a rael el kirel a diak a ulebenglel deureng.
© 2016 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/15. Kengei er a oidel: 6/15. Oidel a First Presidency Message, January 2016. Palauan. 12861 881
Osischeklel Tia el Klumech
A President Eyring a olisechakl el kmo a deureng el bo dolchesuar er a klengar a ultuil er a ikel dolilt el meruul. Sel mosaod er tial klumech, e molatk el smaod aikel tekoi el President Eyring a melekoi el ngii a sebeched el mo melilt el meruul ( el uaia nglunguuch, ureor, ultuil er a klaumerang, me sel ngii a blakelreng er kid) el uchul e kede mo ngar sel rael el bedul a deureng. Ng sebechem el siotai er tirkal molisechakl er tir el mo lmuches a eru malechub eng edei el omeruul el tir a sorir el mo meruul el uchul eng ngoiteterir el mo er sel “rael er a diak a ulebengelel deureng.”