Fas Presidensi Mesej, Jenuware 2016
Fasin blong Stap Hapi blong Olgeta we Yumi Lavem
I Kam long Presiden Henri B. Aering
Fas Kaonsela long Fas Presidensi
Yumi evriwan i wantem fasin blong stap hapi blong olgeta we yumi lavem, mo yumi wantem se oli no mas harem nogud tumas. Taem yumi ridim ol stori blong fasin blong stap hapi-mo blong harem nogud-long Buk blong Momon, i tajem hat blong yumi taem yumi tingbaot olgeta we yumi lavem. Hemia wan tru stori blong wan taem we i bin gat fasin blong stap hapi:
“Mo i bin hapen se i no bin gat eni rao long graon, from lav blong God we i bin stap insaed long hat blong ol pipol.
Mo i no bin gat ol tingting blong wantem samting blong narafala man, o ol rao, o ol faet, o ol fasin blong slip olbaot, o ol giaman, o ol fasin blong kilim man i ded, o eni kaen fasin blong gat rabis tingting; mo i tru we i no save gat wan pipol we i moa hapi long medel blong evri pipol we han blong God i bin mekem olgeta.”
Afta yumi ridim:
“!Mo hamas nao oli bin kasem blesing! From Lod i bin blesem olgeta long evri wok blong olgeta; yes, mo tu Lod i bin blesem olgeta mo mekem olgeta i kam antap gud kasem wan handred mo ten yia i bin pas i gowe; mo fasfala jeneresen afta Kraes i bin pas i gowe, mo i no bin gat eni rao long ful graon” (4 Nifae 1:15–16, 18).
Ol disaepol blong Kraes we oli gat lav, oli prea mo wok from wan blesing ia blong ol narawan mo blong olgetawan. Long ol stori insaed Buk blong Momon mo blong plante long yumi, aot long ol eksperiens blong yumiwan, yumi save se yumi save kasem presen blong stap hapi. Yumi save se rod blong kasem ples blong stap hapi, oli bin makem gud. Yumi save se blong stap hapi i no wan isi samting, hemia nomo sapos i olsem ol pipol blong Nifae afta long visit blong Sevya, “lav blong God” i stap long hat blong yumi.
Lav ia i bin stap long hat blong ol pipol blong Nifae from oli bin obei ol loa we i mekem se samting ia i save hapen. Wan sot toktok abaot loa ia i stap insaed ol sakramen prea, we i stat wetem wan prea ia we i kam dip insaed long hat mo i stap go long Papa blong yumi long Heven. Yumi prea wetem wan hat we i gat strong fet long, mo wetem wan dip lav blong, Sevya blong yumi. Yumi komitim yumi wetem tru tingting ia blong tekem long yumi nem blong Hem, blong tingbaot Hem, mo blong obei evri komanmen blong Hem. Laswan, yumi praktisim fet blong yumi se Tabu Spirit, nambatri memba blong Godhed, i save stap wetem yumi oltaem, blong stap testifae long hat blong yumi abaot Papa mo Pikinini blong Hem we Hem i lavem tumas. (Luk long D&C 20:79.)
Wetem kampani blong Tabu Spirit, hat blong yumi i save jenis blong mekem se yumi wantem mo welkamem lav blong Papa blong yumi long Heven mo blong Lod Jisas Kraes. Wei blong mekem se i gat lav blong God insaed long hat blong yumi hem i simpol, olsem wei blong lusum filing blong lav ia long hat blong yumi. Eksampol, wan man i save jusum blong no stap prea oltaem long Papa long Heven o no pem wan ful taeting o blong nomo kakae long toktok blong God o blong no luksave olgeta we oli pua mo oli stap long nid.
Eni long ol joes we yumi mekem blong no obei ol komanmen blong Lod i save mekem Spirit i kamaot long hat blong yumi. Taem hemia i nogat, fasin blong stap hapi i go daon.
Fasin blong stap hapi we yumi wantem blong olgeta we yumi lavem, i dipen long ol joes blong olgeta. Olsem we yumi lavem wan pikinini, wan investigeta, o ol fren blong yumi, bae yumi no save fosem olgeta blong obei ol komanmen blong oli save kwalifae blong kasem Tabu Spirit blong tajem mo jenisim hat blong olgeta.
Mekem se bes help we yumi save givim, hem i wanem we i lidim olgeta we yumi lavem blong lukaot long ol joes we olgetawan oli stap mekem. Alma i bin mekem wetem wan invitesen we ating bae yu givim:
“Be se, bae yufala i putum tingting blong yufala i stap daon long fes blong Lod, mo prea long tabu nem blong hem, mo lukaot mo prea oltaem, blong oli no save temptem yufala i bitim mak ia we yufala i save fesem, mo olsem ia nao oli lidim yufala tru long Tabu Spirit, mo bae yufala i kam blong putum tingting blong yufala i stap daon, no stap flas, lego tingting blong yufala blong folem tingting blong narafala man, save wet, fulap long lav mo save go tru long ol hadtaem wetem longfala tingting;
“Mo gat fet long Lod; mo gat wan hop blong yufala i save kasem laef we i no save finis; mo gat lav blong God oltaem long hat blong yufala, blong oli save leftemap yufala long las dei mo go insaed long kingdom blong hem.” (Alma 13:28–29).
Mi prea se olgeta we yu lavem bae oli akseptem invitesen ia we i kam antap blong jusum rod blong fasin blong stap hapi we i stap oltaem
© 2016 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/15. Oli letem translesen: 6/15. Translesen blong First Presidency Message, January 2016. Bislama 12861 852
Yusum Mesej Ia blong Tij
Presiden Aering i tijim se fasin blong stap hapi we yumi filim long laef, i dipen nomo long ol desisen we yumi mekem. Taem yu toktokraon long mesej ia, tingting blong lukluk long ol samting we Presiden Aering i talem we yumi save jusum blong mekem (olsem blong stap prea, stap wok, stap praktisim fet, mo komitim yumiwan wetem tingting we i tru) blong lidim yumi i go long rod blong fasin blong stap hapi. Yu save invaetem olgeta we yu tijim blong raetemdaon tu o tri aksen we bae oli laekem blong tekem we bae i save lidim moa gud olgeta long “rod we i go long fasin blong stap hapi we i no gat en.”