Mensahe sang Unang Panguluhan, Enero 2016
Kalipayan para sa Aton mga Pinalangga
Ni Pangulong Henry B. Eyring
Unang Manuglaygay sa Unang Panguluhan
Tanan kita maluyag sang kalipayan para sa aton mga pinalangga, kag luyag naton sang pinakadiutay nga kasakit para sa ila kon posible. Sa aton pagbasa sang mga istorya sang kalipay—kag sang kasakit—sa Libro ni Mormon, ang aton mga balatyagon nagakapukaw kon ginpanumdum naton ang aton mga pinalangga. Yari ang isa ka matuod-tuod nga istorya sang isa ka tion sang kalipay.
“Kag natabo ini, nga wala sing pagbinaisay sa kadutaan, tungod sang gugma sang Dios nga nagpuno sa mga tagipusuon sang katawhan.
“Kag wala sing mga paghinisaay, ukon mga pagsinuay, ukon mga kinagubot, ukon mga pagkamakihilawason, ukon mga pagbinutig, ukon mga pagpamatay, ukon ano man nga sari sang pagkahiwalan; kag pat-od gid nga wala na sing isa ka mas malipayon pa nga katawhan sa tunga sang tanan nga katawhan nga gintuga sang kamot sang Dios.”
Dayon mabasa naton:
“Kag daw ano kabulahan sa ila! Kay ginpakamaayo sila sang Ginuo sa tanan nila nga mga ginahimo; huo, bisan ginpakamaayo sila kag ginpauswag tubtob nga nakalabay ang isa ka gatos kag napulo ka tuig; kag naglabay ang una nga kaliwatan gikan kay Cristo, kag wala sing pagbinaisay sa bug-os nga kadutaan.” (4 Nefi 1:15–16, 18).
Ang mapinalanggaon nga mga disipulo ni Cristo nagapangamuyo kag nagapangabudlay para sinang mga bugay para sa iban kag para sa ila mga kaugalingon. Gikan sa mga istorya sa Libro ni Mormon kag, para sa madamo sa aton, gikan sa aton kaugalingon nga inagihan, nakahibalo kita nga ang regalo sang kalipayan sarang maangkon. Nakahibalo kita nga ang dalan pakadto sa kalipayan maathag. Nakahibalo man kita nga ang pagtipig sang kalipayan indi mahapos luwas kon, kasubong sang mga Nefinhon pagkatapos sang pagbisita sang Manluluwas, “ang gugma sang Dios” nagapuno sang aton mga tagipusuon.
Ina nga gugma yara sa mga tagipusuon sang mga Nefinhon tungod ginsunod nila ang kasuguan nga naghimo sini nga posible. Ang kaundan sinang kasuguan makita sa mga pangamuyo sa sakramento, nga nagasugod sa isa ka hugot nga pag-ampo sa aton mapinalanggaon nga Amay nga Langitnon. Nagapangamuyo kita nga may tagipusuon nga puno sang pagtuo sa, kag may madalum nga paghigugma para, sa aton personal nga Manluluwas. Nagapangako kita nga may hugot nga katuyuan sa pagdala sa aton kaugalingon sang Iya ngalan, sa pagdumdum sa Iya, kag sa pagtuman sang tanan Niya nga mga kasuguan. Pagkatapos, nagapakita kita sang pagtuo nga ang Balaan nga Espiritu, ang ikatatlo nga miyembro sang Panguluhan sang Dios, mahimo mangin kaupod naton pirme, nga nagapamatuod sa aton mga tagipusuon sa Amay kag sa Iya Hinigugma nga Anak. (Tan-awa sa D&C 20:77, 79.)
Upod sang pag-ubay sang Balaan nga Espiritu, ang aton mga tagipusuon mahimo magbag-o sa bagay nga handumon naton kag abi-abihon ang pagpalangga sang aton Langitnon nga Amay kag sang Ginuong Jesucristo. Ang paagi nga mabaton naton ang pagpalangga sang Dios sa aton mga tagipusuon simple lang, pareho man sang paagi nga madula inang balatyagon sang pagpalangga sa aton mga tagipusuon. Halimbawa, ang isa ka tawo mahimo magpili nga magpangamuyo sing mas talagsa sa Langitnon nga Amay ukon indi magbayad sang bug-os nga ika-pulo ukon mag-untat sa pagpaayaw sa pulong sang Dios ukon indi pagsapakon ang mga imol kag nagakinahanglan.
Ang bisan ano nga pagpili nga indi pagtumanon ang mga kasuguan sang Ginuo mangin rason nga ang Espiritu magbiya sa aton mga tagipusuon. Sa sinang kawad-on, ang kalipay nagabuhin.
Ang kalipay nga ginahandum naton para sa aton mga pinalangga nagasandig sa ila mga pagpili. Bisan pa palangga naton ang isa ka bata, ang isa ka investigator, ukon aton kaabyanan, indi naton sila mapilit sa pagtuman sang mga kasuguan agud nga mangin takos sila para sa Balaan nga Espiritu nga magtandog kag magbag-o sang ila mga tagipusuon.
Gani ang pinakamaayo nga mga bulig nga aton mahatag amo ang kon ano ang nagatulod sa aton mga pinalangga nga bantayan ang ila kaugalingon nga mga pagpili. Ginhimo ini ni Alma paagi sa isa ka pangagda nga mahimo ninyo itanyag:
“Magpaubos kamo sang inyo mga kaugalingon sa atubang sang Ginuo, kag manawag sa iya balaan nga ngalan, kag magbantay kag magpangamuyo sing dalayon, nga indi kamo masulay sing labaw pa sa sinang inyo masarangan, kag sa sina nga paagi magiyahan sang Espiritu nga Balaan, nga mangin mapainubuson, malulo, mapailubon, masinulundon, mapainumuron, puno sang gugma kag bug-os nga pagkamainantuson;
“Nga may pagtuo sa Ginuo; nga may paglaum nga magabaton kamo sang kabuhi nga wala’y katapusan; nga may gugma sang Dios sing dalayon sa inyo mga tagipusuon, agud mabayaw kamo sa katapusan nga adlaw kag magsulod sa iya palahuwayan” (Alma 13:28–29).
Nagapangamuyo ako nga ang inyo mga pinalangga mahimo nga magbaton sang inspirado nga imbitasyon sa pagpili sang dalan pakadto sa kalipay nga dayon.
© 2016 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/15. Pagtugot sa paglubad: 6/15. Paglubad sang First Presidency Message, January 2016. Hiligaynon. 12861 861
Pagtudlo gikan sa Sining Mensahe
Si Pangulong Eyring nagapanudlo nga ang kalipay nga aton mabatyagan sa kabuhi nagasandig sa mga desisyon nga aton ginahimo. Sa inyo pagtudlo sining mensahe, huna-hunaa ang pagtutok sa mga butang nga ginmitlang ni Pangulong Eyring nga pwede naton pilion nga himuon (kasubong sang pagpangamuyo, pag-obra, pagpakita sang pagtuo, kag pagdedikar sang aton kaugalingon nga may sinsero nga katuyuan) nga magatuytoy sa aton sa sinang banas sang kalipay. Mahimo man ninyo agdahon ang inyo mga ginatudloan nga magsulat sang duha ukon tatlo ka mga buluhaton nga luyag nila himuon nga makatuytoy sa ila sing mas maayo sa “dalan pakadto sa kalipay nga dayon.”