Mensahe sa Visiting Teaching, Enero 2016
Ang Panimalay: Isa ka Proklamasyon sa Kalibutan
Tun-i sing mainampuon ining materyal kag magpangamuyo agud mahibaloan kon ano ang ipaambit. Paano ang paghangop sang doktrina sang pamilya magabugay sa ila nga inyo ginabantayan paagi sa visiting teaching? Para sa dugang nga impormasyon, maglog-on sa reliefsociety.lds.org.
Pagtuo, Pamilya, Bulig
Parte sa pangkabilugan nga miting sang Relief Society sang 1995, sang una ginbasa ni Pangulong Gordon B. Hinckley (1910–2008) “Ang Panimalay: Isa ka Proklamasyon sa Kalibutan,” si Bonnie L. Oscarson, pangkabilugan nga pangulo sang Young Women, nagsiling: “Nagpasalamat kita kag naghatag bili sa kaathag, kasimple, kag kamatuoran sang sining sinulat nga diosnon nga pahayag. … Ang proklamasyon parte sa pamilya nangin ang aton talaksan sa paghusga sang mga pilosopiya sang kalibutan, kag nagasaksi ako nga ang mga prinsipyo nga ginpahamtang … matuod sa karon pareho sadto sang ang mga ini ginhatag sa aton sang isa ka propeta sang Dios malapit 20 anyos na ang nakaligad.”1
“Gikan sa proklamasyon sa pamilya,” dugang ni Carole M. Stephens, unang manuglaygay sa pangkabilugan nga pangulohan sang Relief Society, “matun-an naton nga ‘Sa kabuhi antes sa duta, ang espiritu nga mga anak nga lalaki kag espiritu nga mga anak nga babayi nakakilala kag nagsimba sa Dios bilang ila Wala’y Katapusan nga Amay’2 …
“… Kita kada isa kabahin sang kag kinahanglanon sa pamilya sang Dios.”3
Nagakabuhi kita sa panahon nga dapat pangapinan sang mga ginikanan ang ila mga puluy-an kag mga pamilya. “Ang Panimalay: Isa ka Proklamasyon sa Kalibutan” mahimo makagiya sa aton.
Dugang nga Balaan nga mga Kasulatan
Istorya Gikan sa Matuod-tuod nga Kabuhi
“Si Lee Mei Chen Ho sang Tao Yuan Third Ward, Tao Yuan Taiwan Stake, nagsiling nga ang proklamasyon nagtudlo sa iya nga ang mga kaangtanan sa pamilya nagabulig sa pagpatubo sang langitnon nga mga kinaiya kasubong sang pagtuo, pagpaumod, kag pagpalangga. ‘Kon nagatinguha ako nga pauswagon ang akon kaugalingon suno sa proklamasyon, sarang ako makaeksperiyensya sing matuod-tuod nga kalipay,’ siling niya.”4
Si Barbara Thompson, nga nakatambong sang ang proklamasyon ginbasa sa una nga tion kag sang ulihi nag-alagad bilang manuglaygay sa pangkabilugan nga pangulohan sang Relief Society, nagsiling: “Naghunahuna ako sing makadali nga [ang proklamasyon] wala gid man nagatumod sa akon bangod indi ako kasado kag wala ako sang kabataan. Apang halos pareho kadasig naghunahuna ako, ‘Pero nagatumod gid ini sa akon. Isa ako ka miyembro sang isa ka pamilya. Isa ako ka anak, isa ka utod, isa ka tiya, isa ka pakaisa, isa ka hinablos, kag isa ka apo. … Bisan pa nga ako na lang ang nagaisahanon nga buhi nga miyembro sang akon pamilya, isa gihapon ako ka miyembro sang pamilya sang Dios.’”5
© 2016 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/15. Pagtugot sa paglubad: 6/15. Paglubad sang Visiting Teaching Message, January 2016. Hiligaynon. 12861 861
Binagbinaga Ini
Paano bala nga ang “Ang Panimalay: Isa ka Proklamasyon sa Kalibutan” isa ka sinulatan para sa aton panahon?