Mensahe ti Umuna a Panguluen, Enero 2016
Ragsak para Kadagiti Ay-ayatentayo
Ni Presidente Henry B. Eyring
Umuna a Mammagbaga iti Umuna a Panguluen
Kayattayo amin nga agragsak dagiti ay-ayatentayo ken kayattayo nga agrigatda met bassit no mabalin. Bayat ti panangbasatayo kadagiti pakasaritaan maipapan iti ragsak—ken ti rigat—iti Libro ni Mormon, naaringan dagiti kaunggan ti riknatayo no panunotentayo dagiti ay-ayatentayo. Daytoy ti pudno a pakasaritaan ti maysa a panawen ti panagragsak.
“Ket napasamak nga awan ti panagririnnupir iti pagilian, gapu iti ayat ti Dios a nagnaed iti puso dagiti umili.
“Ket awan ti innapal, wenno panagpupungtot, wenno riribuk, wenno panagiinnabig, wenno panagulbod, wenno pammapatay, wenno ania man a kita ti panaggartem; ket pudno awanen ti naragragsak a tao kadagiti amin a tao a pinarsua ti Dios.”
Kalpasanna mabasatayo:
“Ket anian a naggasatda! Agsipud ta pinaraburan ti Apo ida iti amin nga aramidda; wen, ket naparaburanda ken nagrang-ayda agingga iti sangagasut-ket-sangapulo a tawen ti napalabas; ken idi nakalikuden ti umuna a kaputotan manipud ken ni Cristo, ket awan ti panagririnnupir iti pagilian” (4 Nephi 1:15–16, 18).
Agkararag ken agtrabaho dagiti managayat a disipulo ni Cristo para iti kasta a bendision para kadagiti dadduma ken para iti bagbagida. Manipud kadagiti pakasaritaan iti Libro ni Mormon ken, para iti kaaduan kadatayo, manipud iti bukodtayo a padas, ammotayo a ti sagut ti kinaragsak ket magun-od. Ammotayo a ti dalan nga agturong iti ragsak ket silalawag a namarkaan. Ammotayo pay a saan a nalaka ti panangpatalinaed iti ragsak malaksid no, kas kadagiti Nephite kalpasan ti isasarungkar ti Mangisalakan, agtalinaed iti puspusotayo “ti ayat ti Dios”.
Adda dayta nga ayat iti puspuso dagiti Nephite gapu ta nagtungpalda iti linteg a nangaramid a posible iti daytoy. Ti pakagupgopan dayta a linteg ket masarakan iti kararag ti sakramento, a mangrugi iti naimpusuan a pakaasi iti managayat a Nailangitan nga Amatayo. Agkararagtayo nga addaan iti puso a napnuan iti pammati, ken addaan iti nalaus nga ayat para iti bukodtayo a Mangisalakan. Agkumittayo nga addaan pudno a panggep nga umawat kadatayo iti naganna, manglaglagip Kenkuana, ken agtungpal kadagiti bilinna. Iti kamaudiananna, usarentayo ti pammatitayo a ti Espiritu Santo, ti maikatlo a miembro ti Kinadios, mabalin a kanayon a kadkaduatayo, a mangipampaneknek iti puspusotayo ti maipapan iti Ama ken ti Patpatgenna nga Anakna. (Kitaen iti DkK 20:77, 79.)
Iti panangkadkadua ti Espiritu Santo kadatayo, makapagbalbaliw ti puspusotayo tapno tarigagayan ken pasangbayentayo ti ayat ti Nailangitan nga Amatayo ken ti Apotayo a ni Jesucristo. Simple ti wagas a pakagun-odan iti ayat ti Dios iti puspusotayo, kas iti wagas a pakapukawan iti rikna iti dayta nga ayat iti puspusotayo. Kas pagarigan, mabalin a pilien ti maysa a tao ti manmano a panagkararag iti Nailangitan nga Ama wenno saan a panagbayad iti naan-anay nga apagkapullo wenno agsardeng nga agpennek iti balikas ti Dios wenno di mangikankano kadagiti napanglaw ken agkasapulan.
Ania man a pili a saan a panagtungpal kadagiti bilin ti Dios ket makaigapu iti ipapanaw ti Espiritu manipud iti puspusotayo. Iti dayta a pannakapukaw, umawan ti kinaragsak.
Ti ragsak a tarigagayantayo para kadagiti ay-ayatentayo ket agpannuray kadagiti pilida. Agingga nga ay-ayatentayo ti maysa nga ubing, ti maysa nga investigator, wenno dagiti gagayyemtayo, ditayo ida mapilit nga agtungpal kadagiti bilin tapno maikarida a sagiden ken pagbalbaliwen ti Espiritu ti puspusoda.
Isu a ti kasayaatan a tulong a maitedtayo ket ti ania man a mangiturong kadagiti ay-ayatentayo a mangsipot kadagiti bukodda a pili. Inaramid ni Alma daytoy nga addaan iti awis a mabalinyo nga ited:
“Agpakumbabakayo iti sango ti Apo, ket awaganyo ti nasantuan a naganna, ket agsalukag ken agkararagkayo a kanayon, tapno saankayo a masulisog iti nalablabes ngem iti kabaelanyo, ket iti kasta iturongnakayo ti Nasantuan nga Espiritu, nga agbalin a napakumbaba, naemma, managpabus-oy, naanus, napnuan iti ayat ken managitured;
“Addaan iti pammati iti Apo; addaan iti namnama nga umawatkayo iti agnanayon a biag; addaan iti ayat ti Dios a kanayon iti puspusoyo, tapno maitag-aykayo iti maudi nga aldaw ket makastrekkayo iti paginanaanna” (Alma 13:28–29).
Ikararagko a sapay kopa ta maawat dagiti ay-ayatenyo ti naparegta nga awis a pumili iti dalan nga agturong iti manayon a ragsak.
© 2016 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/15. Pannakaanamongna a maipatarus: 6/15. Pannakaipatarus ti First Presidency Message, January 2016. Ilokano. 12861 864
Panangisuro manipud iti Daytoy a Mensahe
Isuro ni Presidenter Eyring a ti ragsak a mariknatayo iti biag ket agpannuray kadagiti pangngeddeng nga aramidentayo. Bayat ti panangilawlawagyo itoy a mensahe, ibilang ti papangipokus kadagiti banag a dinakamat ni Presidente Eyring a mabalintayo a pilien nga aramiden (kas iti panagkararag, panagtrabaho, panangusar iti pammati, ken panangikumit iti bagbagitayo nga addaan napudno a panggep) a mangiturong kadatayo iti dayta dalan ti kinaragsak. Mabalinyo nga awisen dagiti sursuruanyo a mangisurat iti dua wenno tallo a tignay a kayatda nga aramiden a mabalin a mangiturong kadakuada a nasaysayaat iti “dalan nga agturong iti manayon a ragsak.”