Pweng sin Prestuhnsi Se Met, Jacnwacri 2016
Engan nuh Selos suc Kuht Luhngse
Sel Prestuhn Henry B. Eyring
Mwet in Kahsruh Se Met ke Prestuhnsi Se Met
Kuht nuhkwewa kena tuh engan in yohk nuh selos suc kuht luhngse, ac kuht kena tuh in srihk mwe ahktoasr elos puhlakihn uh. Ke kuht riti sramsram in engan—ac kweok ke—ke Puk luhn Mormon, mokleyuckyak insiacsr ke kuht nuhnkuh ke mwet sacohk lasr uh. Pa inge sie sramsram pwacye ke sie pacl in engan:
“Ac tukun ma inge na wacngihn fohs fin acn sac, ke srihpen luhngse luhn God sucoasr insiacn mwet we ah.
“Ac wacngihn srahngwesr oa, kuh lokoalok, kuh nuhnak in koase, tiac kosro, tiac kikiacp, tiac ahkmas, kuh kuhtwena ohiyac kuhpahtol; ac pwacye tuh wacngihn na mwet engan yohk inmahsrlon mwet suc God El oraclah nuhkwewa oacna mwet inge.”
Na kuht riti:
“Ac fuhkah luhpan insewowo lalos! Tuh Leum El ahkinsewowoyaclos na ke orekma lalos nuhkwewa; ahok, elos insewowo ac kapkapwack lalos sun yac siofok singucul; ac fihl se met ma Kraist wacngihnlac, ac wacngihn fohs fin acn we nohfohn” (4 Nephi 1:15–16, 18).
Mwet tuhma lutlut luhng kuhlwacng luhn Kraist pruhe ac orekma nuhke kain mwe insewowo inge nuh sin mwet sahyac ac nuh selos sifacna. Ke sramsram ke Puk luhn Mormon ac, puhs na inmahsrlosr, ke puhla lasr sifacna, kuht etuh lah mwe sang ke engan uh kuh in utuckuh. Kuht etuh lah innek in engan uh el arlac mahki kahlwem. Kuht oacyacpac etuh lah karihngihnyacn in engan uh el tiac fihsrwacsr ne kena, oacna ke i tukun muhtwacta luhn Mwet Lahngo nuh sin mwet Nephites ah, “luhngse luhn God” oan insiacsr.
Luhngse sacn oasr tari insiacn Mwet Nephi ke srihpen elos liyacacng masap se suc oruh kuh in sikyak ohinge. Kahs in ahkuhtweyac ke masap sacn sukokyak ke pruhe ke kuhfa luhn Leum, suc muhtwacwacack ke sie kwacfe nuh sin Pahpah Tuhmasr Inkuhsrao. Kuht pruhe ke luhlahlfongi yohk luhn insiac, ac ke luhngse pwacye nuh, sin Mwet Lahngo lasr uh. Kuht eiskuhtyang ke insiacsr in eis Inel, in esamuhl, ac in liyacacng masap nuhkwewa Lal. Sahflah, kuht moulkihn luhlahlfongi muh Nguhn Muhtahl, pa mempuhr ahktolu ke Sifac ke God, ma kuh in wi kuht pacl nuhkwewa, suc fahkwack nuh insiacsr ke Pahpah ac Wen Kuloh Nahtuhl. (Liye D&C 20:77, 79.)
Ke kolyuck luhn Nguhn Muhtahl, insiacsr kuh in eklac tuh kuht in luhngse ac suli luhngse luhn Pahpah Lucngac Leum Jisus Kraist. Ohiyac nuhke eisyacn luhngse luhn God nuh insiacsr uh fihsrwacsr, oacpacna nuhke ohiyac in ahkwacngihnyaclah puhla in luhngse uh ke insiacsr. Tuh fin muh, mwet se sulaclah in tiac arlac pruhe penga na pacl nuh sin Pahpah Lucng kuh in tiac ahkfalye sie tahfuh singucul kuh in tui ke lutlutkihn kahs luhn God kuh in pihlesruh mwet suhkahsruhp kuh mwet kwacoh.
Kuhtwena sulaclah ma in tiac liyacacng masap luhn Leum kuh na in luhslah Nguhn liki insiacsr. Ke wacngihnlac luhn nguhn, engan uh srihkeni.
Engan se ma kuht finsrakkihn nuh sin mwet lasr kuh in sikyak wiwi na sulaclah lalos an. Finne yohk luhpan luhngse lasr nuh sin tuhlihk se, mwet sirapei se, kuh kawuck se, kuht tiac kuh in sap kuh nuh selos in liyacacng masap tuh elos in fal in eis kolyuck ac ikihlyuck luhn Nguhn Muhtahl ke ekuhlah insiaclos.
Pa sis kasruh se ma wo emet kuht in sang nuh selos suc kuht luhngse uh pa in lwelah elos in sifacna liyacacng sulaclah lalos. Alma el oraclah ke sie puhsren siyuck ma kom kuh pac in wi oruh.
“Ahkpuhsisaclye kowos ye muhtuhn Leum, ac pahngon ke E muhtahl lal, ac lohacng ahkwoyac ac sikalweni na in pruhe, tuh kowos in tiac srihfeyuck yohk liki kuh lowos, ac tuh in kolyucklac sin Nguhn Muhtahl, in puhsisacl na, fakpacp, muhtwacnglah, mongfihsrwacsr, sesseslah in luhngse ac mongfihsrwacsr in kweok in ma nuhkwewa;
“In luhlahlfongi ke Leum; in oasr finsrak tuh kowos fah eis moul ma pahtpaht; in oasrluhngse luhn God insiowos pacl nuhkwewa, tuh kowos in tohuyak ke lwen sahflah ac ilyak nuh in monglac lal” (Alma 13:28–29).
Nga pruhe tuh elos suc kowos luhngse an in eis suliyuck in sulaclah innek in engan ma pahpaht.
© 2016 sel Intellectual Reserve, Inc. Kuh ac suwohs nuhkwewa fihliyucki. Sihmlac fin acn USA. Ahkkweyeyucklac ke kahs English: 6/15. Ahkkweyeyucklac ke lweng: 6/15 Lwenglah luhn First Presidency Message, January 2016. Kosraean. 12861 868
Luti ke Pweng Se Inge
Prestuhn Eyring el luti lah engan suc kuht puhla in moul lasr uh wiwi na sulaclah kuht oruh uh. Ke kowos sramsramkihn pweng se inge, lohacng nuhke ma Prestuhn Eyring el fahk muh kuht kuh in sulaclah in oruh uh (oacna pruhe, orekma, ahkyohkye luhlahlfongi, ac eiskuhtyang ke inse pwacye lasr) in kol kuht nuhke inkacnek in engan. Kowos kuh in suli mwet suc kowos luti in suhmuhslah luo kuh tolu mukwikwi ma elos ke oruh ma in kohlohlos nuhke “inkacnek nuhke engan ma pahtpaht.”