Parau poro’i a te Peresideniraa Matamua, Tenuare 2016
Te oaoa no te feia tei herehia e tatou
Na te peresideni Henry B. Eyring
Tauturu matamua i roto i te Peresideniraa Matamua
Te hinaaro paatoa nei tatou i te oaoa no te feia ta tatou i here, e ia iti roa to ratou mauiui, e mea maitai ïa. Ia tai’o ana’e tatou i te mau aamu oaoa – e te mauiui – i roto i te Buka a Moromona, e putapû roa to tatou aau i te mana’ona’oraa i to tatou iho feia. Teie te tahi aamu mau, no te tahi taime oaoa :
« E no te aroha o te Atua tei roto i te aau o te mau taata, aore atura e mârôraa i te fenua ra.
E aita atoa’tura te feii, te mârô, te tiarepu, te faaturi, te haavare, te taparahi taata, e te mau huru ino atoa ra ; e aita ho’i e feia i roto i te mau taata i hamanihia e te rima o te Atua ra tei hau ia ratou i te oaoa ».
I muri iho e tai’o tatou :
« Auê ho’i te ao to ratou ra ! Ua haamaitai ho’i te Fatu i ta ratou mau mea atoa i rave ra ; e e ao to ratou e te maitai e ia ma’iri a’era na matahiti e hoê hanere e hoê ahuru aore ; e ua ma’iri te ui matamua i muri a’e i te Mesia ra, e aita e mârô i te fenua e hope roa’e » (4 Nephi 1:15-16, 18).
Ua pure e ua ohipa ho’i te mau pipi here na te Mesia ia roaa teie huru haamaitairaa no te taata e no ratou iho. Ia au i tei faati’ahia mai i roto i te Buka a Moromona e, no te rahiraa o tatou, ia au i te mau ohipa i tupu i roto i to tatou iho oraraa, ua ite tatou e, e nehenehe ia roaa te horo’a no te oaoa. Ua ite tatou e, ua faataa-maitai-hia te e’a no te oaoa. Ua ite atoa tatou e, e ere i te mea ohie ia vai tamau noa te oaoa maori râ, ia vai te « aroha o te Atua » i roto i to tatou aau, mai tei tupu i rotopu i te mau ati Nephi i muri iho i te fâraa mai te Mesia.
Ua vai te reira here i roto i te aau o te mau ati Nephi no to ratou haapa’oraa i te ture tei faatupu i te reira. E pu’ohuraa no te reira ture tei itehia i roto i te mau pure o te oro’a mo’a, o te haamata ma te hoê taparuraa o te aau i mua i te Metua here i te Ao ra. E pure tatou ma te aau î i te faaroo, e ma te here rahi, no to tatou iho Faaora. E euhe tatou ma te mana’o papû ia rave i To’na i’oa i ni’a iho ia tatou, ia haamana’o Ia’na, e ia haapa’o i Ta’na mau faaueraa. E i te hopea, e faaohipa tatou i to tatou faaroo, ia vai noa te Varua Maitai i roto ia tatou, te toru o te melo o te Atuaraa, Oia te faa’ite papû mai i to tatou aau no te Metua e no Ta’na Tamaiti Here. (Hi’o PH&PF 20:77, 79).
Na roto i te faahoaraa o te Varua Maitai, e nehenehe to tatou aau ia taui e ua hinaaro e ua farii poupou atura tatou i te here o to tatou Metua i te Ao ra e o te Fatu ra o Iesu Mesia. Te rave’a no te farii i te here o te Atua i roto i to tatou aau, e mea ohie ïa, mai te au atoa i te rave’a e mo’e ai te reira here i to tatou aau. Ei hi’oraa, e riro paha te hoê taata i te ma’iti eiaha e pure pinepine faahou â i te Metua i te Ao ra e aore râ, eiaha e aufau ti’a i te tuhaa ahuru e aore râ, e faaea ia popou i te parau a te Atua e aore râ, e haavare ite i te feia veve e tei nava’i ore.
Na teie mau ma’itiraa atoa ia ore e haapa’o i te mau faaueraa a te Fatu e nehenehe e faaatea atu i te Varua i to tatou aau. E ia mo’e te reira, e iti mai te oaoa.
Te oaoa ta tatou e hinaaro ra no te feia tei herehia e tatou, tei te huru ïa o ta ratou mau ma’itiraa. Noa’tu to tatou here i te ho’e tamarii, i te ho’e hoa o te Ekalesia; , e aore râ i to tatou mau hoa, eita ta tatou e nehenehe e faahepo ia ratou ia haapa’o i te mau faaueraa ia ti’a i te Varua Maitai ia haaputapû ia ratou e ia taui i to ratou aau.
E no reira, te tautururaa maitai roa a’e ta tatou e nehenehe e horo’a, o te arata’iraa ïa i te feia tei herehia e tatou ia hi’o maite i ta ratou mau ma’itiraa. Ua na reira Alama na roto i te hoê aniraa, o ta outou atoa e nehenehe e horo’a :
« Ia faahaehaa râ outou ia outou iho i mua i te Fatu, e ia ti’aoro atu i to’na ra i’oa mo’a, e ia ara, e ia pure ho’i ma te faaea ore, ia ore to outou faahemaraa ia hau i to outou puai, e ia arata’ihia outou e te Varua Maitai ; e ia riro outou ei feia mamahu, e te haehaa, e te auraro maite, e te faaoromai ; e te î ho’i i te aroha, e te faaoromai roa ra ;
« Ia faaroo outou i te Fatu ra, e ia tia’i ho’i i te ora mure ore, ia vai maite ho’i te aroha o te Atua i roto i to outou aau, ia faateiteihia outou i te mahana hopea ra, e ia ô ho’i i roto i to’na ra faaearaa » (Alama 13:28-29).
Te pure nei au ia farii te feia ta outou i here i te aniraa faauru ia ma’iti i te e’a no te oaoa vai maoro.
© 2016 na Intellectual Reserve, Inc. Faturaa paruruhia. Nene’ihia i te Mau Hau Amui no Marite. Parau faati’a no te reo peretane : 6/15. Parau faati’a no te iritiraa : 6/15. Iritiraa no First Presidency Message, January 2016 Tahitian 12861 895
Haapiiraa no roto mai i teie parau poroʻi
Te haapii nei te peresideni Eyring e, te oaoa ta tatou e farii i roto i teie oraraa, tei te huru ïa o te mau faaotiraa ta tatou e rave. A aparau ai outou no ni’a i teie parau poro’i, a opua ia faatumu i ni’a i te mau mea ta te peresideni Eyring i faahiti o ta tatou e nehenehe e ma’iti ia rave (mai te pure, te ohipa, te faaohiparaa i te faaroo e te euheraa ia tatou ma te mana’o papû) no te arata’i ia tatou i ni’a i te e’a no te oaoa. E nehenehe ta outou e ani i te feia ta outou e haapii ra ia papa’ipa’i e piti e aore râ e toru ohipa e rave ratou, o te riro i te tuu maitai a’e ia ratou i ni’a i te « e’a no te oaoa vai maoro ».