Parau poro’i na te mau tuahine hahaere, Tenuare 2016
Te utuafare : E Poro’i i to te Ao nei
A tuatapapa na roto i te pure i teie materia ma te imi ia ite e aha te faa’ite atu. Nahea te maramaramaraa i te haapiiraa tumu no ni’a i te utuafare i te haamaitai i te feia ta outou e haapa’o nei na roto i te tere hahaereraa ? No te mau haamaramaramaraa hau atu, a haere i ni’a i te reliefsociety.lds.org.
Te Faaroo, Te Utuafare, Te Totauturu
No ni’a i te putuputuraa rahi a te Sotaiete Tauturu i te matahiti ra 1995, te taime matamua a tai’o ai te peresideni Gordon B. Hinckley i « Te utuafare : E Poro’i i to te Ao nei », ua parau o Bonnie L. Oscarson, peresideni rahi no te Feia Apî Tamahine : « Ua mauruuru tatou e ua haafaufaa tatou i te papûraa, te ohieraa e te parau mau o teie parau heheu… Ua riro roa mai te poro’i no ni’a i te utuafare ei tapa’o faa’ite no te hi’o-feruri-raa i te mau mana’o hohonu o te ao, e o to’u iteraa papû e, e parau mau teie mau parau tumu tei vauvauhia … i teie mahana mai i te mahana a horo’ahia mai ai te reira e te peropheta a te Atua a 20 matahiti i teie nei.1
Te parau atoa nei te tuahine Carole M. Stephens, tauturu matamua i roto i te peresideniraa rahi o te Sotaiete Tauturu, « I roto i te poro’i no te utuafare, te haapii nei tatou e, ‘I roto i te ao na mua a’e, ua ite e ua haamori na ho’i te mau tamaiti e te mau tamahine varua i te Atua to ratou Metua Mure Ore’2…
« No roto tatou tata’itahi i te utuafare o te Atua e ua hinaarohia tatou ».3
Tei te hoê tau tatou e ti’a i te mau metua ia paruru i to ratou fare e to ratou utuafare. E ti’a i « Te utuafare : E Poro’i i to te Ao nei » e arata’i ia tatou.
Te tahi atu mau irava papa’iraa mo’a
Mosia 8:16-17 ; Te Parau Haapiiraa e Te mau Parau Fafau 1:38
Aamu mau
« Te parau ra Lee Mei Chen Ho no te paroisa Tao Yuan 3, no te titi no Tao Yuan Taiwan e, ua haapii te poro’i ia’na e, e tauturu te mau auraa utuafare ia faatupu i te mau huru atua mai te faaroo, te faaoromai e te here. ‘I te taime e tamata vau i te haamaitai ia’u ia au i teie poro’i, e ite au i te oaoa mau’, te parau ra oia ».4
Te parau nei Barbara Thompson, oia tei parahi i roto i te amuiraa a tai’ohia ai te poro’i no te taime matamua e o tei tavini i muri iho ei tauturu i roto i te peresideniraa rahi o te Sotaiete Tauturu : « Ua mana’o vau no te hoê taime e, aita [te poro’i no te utuafare] i tano maitai ia’u no te mea aita vau i faaipoipohia e aita ta’u e tamarii. Are’a râ ua mana’o vitiviti ihora vau e, ‘Tera râ, e tano atoa te reira ia’u. E melo vau no te hoê utuafare. E tamahine au, e tuahine, e metua vahine fetii, e tuahine fetii, e tamahine fetii, e e mootua tamahine… Noa’tu e o vau ana’e te melo e ora nei no to’u nei utuafare, e melo noa â vau no te utuafare a te Atua’ ».5
© 2016 na Intellectual Reserve, Inc. Faturaa paruruhia. Nene’ihia i te Mau Hau Amui no Marite. Parau faati’a no te reo peretane : 6/15. Parau faati’a no te iritiraa : 6/15. Iritiraa no Visiting Teaching Message, January 2016. Tahitian 12861 895
A feruri i teie
Nahea « Te utuafare : E Poro’i i to te Ao nei » e riro nei ei parau tano no to tatou anotau ?