Fel’ Yangren
Deaf nifan ko Mich Rog
Tayoloey e be paer u Idaho, USA.
Napan nib ragag nge nel’yangreg, me yib ba fagar nga tabinaew romaed ni yaed e pi tamachib. U lan reb e pul nikan fil e bin somm’on ban’en, ma gubin e pi duwer rog e kan fulweg taban nib mangil rogon. Ku thamiy fare Kan ni Thothup nibe micheg nag bin riyul’ e pi mulwol ni mornga’agen fare Sulyarmen. Dani boed ban’en ni kug thamiy, ma ku nang ni gubin ma ba riyul’.
Machane, ku waen u fithik gafgow nge gidii’ nibe dubuy dakeanag nib alamrin ko kafram. Ku thamiy ni go’gaag rog, ku magaf, ma ke balyang an’ug. Fa’anra gube rrin’ e n’en nib mat’aw, ma mongfan ni gube yaen u fithik e pi gafgow nib alamrin? Daryog ni nggu nang fan rogon ni pi sikeng rog e fan ngog. Fapi tamachib e ri filed ngog ni nggu baley nag e abich rog mug meybil, mus ni lukngun e ngiyal’ ni yibe skuul. Napan ni ra momaw’ ni dabkiyog mug goeg e n’en ni bay u lan gumircha’eg ni gubin mug thamiy e gapas ko fare Kan ni Thothup.
Fare wik ko tawfe rog e rib sug ko sikeng. Boos rog e be yoeg ni nge tal’eg neg ko murwel fa’anra dabgu digey e tawfe rog ni nggu yoen loen bee’ ko murwel, kan noen’eg nga na’un u aspital niba’ e kidney stone rog, ma ke yoeg e galabthir rog ni nggu chuw u tabinaew romaed. Oren e pin’en nibe buch ni dabyog ni nggu rrin’ ban’en ngay, ma n’en ni karimus ni rayog ni nggu rrin’ e nggu chel ngak Somoel.
Gubin e pi sikeng nem e ke fan ngog ni nge ayuweg neg. Kar ayuwegned gag ku fil mornga’agen fapi machib ko fare gospel, nike pi’ e deaf ni fan ko mich rog.