MULWOL ko Bin Somm’on e Presidency, February 2016
Ke Aw nga But’ Nib Fel’ Rogon ulan fare Yoko’
Dawori n’uw napan ni gag nge Harriet, ni ppin rog, ba’ ko airport ni gomow be yaliy e sukuki nibe aw nga but’. Ba rran nib gel e nifeng, ma be aw e nifeng nib gel ko sukuki, nibe n’anggin poen nge rurur napan nibe yib iyib.
Napan ni kug guyew re magawon ney u thilin e yifang nge masin, ke sulaen’ug ko birog n’en ni ku fil nib ga’fan ni mornga’agen e pilot— me ta’aboch riy mug fil ngak boech e pilot.
“Dam gel nigem ko yap napan ni ba’ e yoko,” ni goeg ngoraed. “Mu paer nib fel’ rogon; dam rus. Mu ta’ owchem ko fare lukngun ko fare runway. Fa’anra gara chuw ko kanawo’ ni gaba adag ni ngam man nga’, mag fel’eg e gin nike kireb riy. Pagan’um ko rogon e sukuki rom. Mu un ngam aw nga but’ nib fel’ rogon.”
Pi pilot nib cheg nag e yaed manang fan ni dabyog ni ngar faworliyed e pin’en nibe buch nib liyeg raed ni gubin ngiyal’. Dabyog ni ngar tal’egned ni rogon e n’en nib tagan. Dabyog ni ngar tal’egned e n’uw fa snow. Dabyog ni ngar talegned e nifeng ni dabki gel fa thilyeg kanawo’en.
Machane ku yaed manang fan ni oloboch ni ngan rus ko nifeng— nib gel fa ba alamrin ni baga’ ni nge taleg raed ko mithmith. Rogon ni ngan aw nga but’ nib fel’ rogon fini ba’ e yoko’ e ngan paar i yaen ko kanawo’ kan duwgliy nib yul’yul’ rogon.
Napan ni gu yaliy reb e sukuki nibe yib ma gube lemnag e pin’en ni ku fil nike bukun e duw napan ni gub pilot, ma gube lemnag ni ba’ ban’en fil ko ren’ey ni fan e yafos rodad.
Dabyog ni ngad gagyeg nagdad pi yoko’ nibe ta’ e yafos nga lane kanawo’ rodad. Boech ngiyal’ ma darma buch e n’en ni gadad ba adag. Gadad ra thamiy ni yibe rurugdad ma yibe thoeydad e nifeng nib gel ko marwaer, murus, kirbaen’, fa lem nib gel.
Ngiyal’ nem, ma ba moem ni ngan lemnag ko tin nike buch nib kireb min tay pi magowan rodad kengin e lem rodad. Re lumel e ngan tiyan’um ko pi sikeng rodad ma gathi tiyan’uy ngak Tathapeg nge mich rodad ko tin riyul’.
Machane iraram e wo’ ni de fel’ ni ngan yaen u fithik e magawon ko yafos rodad.
Pilot nib cheg nag e dar yaliy e yiko’ ya be tiyan’ ko wo’ nib fel’ rogon ni nge aw e sukuki riy nga but, ma ere gadad e ngariy tiyan’dad ko kengin e mich rodad—Tathapeg rodad, gospel Rok, nge tunom rok Chitamangdad nu Tharmiy—nge amrogon—ni ngan sul nib fel’ rogon nga tharmiy. Thingarda pagan’ gaed ngak Got min tay wo’en e gachalpen nib ga’ fan u wun’dad ngay. Thingarda ayliy e p’owchdad, gumircha’dad, nge lanyan’dad nga dakaen rogon e paer nib fel’ rogon.
Gadad ma dag e michaen’ nge pagan’ ngak Chitamangdad nu Tharmiy napan ngad folgad ko pi motochiyel Rok mara yib e falfalan’ ngay. Napan ni gadad ra paer u lan fare kanawo’, ma gadad ra yaen u fithik e nifeng nib gel— ni demtrug rogon gelngin nibe m’ug—ma gadad sul nga tabinaew rodad u tharmiy nib fel’ rogon.
Demtrug ko ba fel’ lanelang fa ba sug ko maguleng nib lumor, ma gadad ni pi gachalpen Yesus Kristus, e gadad be rrin’ e n’en ni fan ko gililungun Got nge tin Mat’aw Rok, ma gadad manang ni gadad ra rrin’, ma gubin ban’en nib tu’uf rodad e ra yib (muguy ko Matthew 6:33).
Ren’ey e ba ga’fan ko yafos rodad!
Fini ngad lemniged e pi n’en nib momaw’ rodad, ngiyal’ nem pi magawon, murus, ma tin momaw’ ban’en e ra gel. Machane fini ngad tiyan’dad ko kanawo’en tharimy nge pi fafalen’ nibe un ko wo’ e galachalpen—adag ngak Got, pigpig e gidii’—ngiyal’ nem gadad ra cheg nag u fithik e magawon nge tin momaw’ ban’en.
Pi tafagar rog, demtrug rogon gelngin e nifeng fa yoko’ nibe aw nga lane yafos rodad, fare gospel rok Yesus Kristus e gubin ngiyal’ ra pi’ e bin tha’abi mangil e kanawo’ ni ngan aw nga lan gil’ilungun e Chitamangdad nu Tharmiy.
© 2016 by Intellectual Reserve, Inc. Gubin mabay matwon. Kan yoloey u Mariken. Kan micheg nag ko thin nu Ngalis: 6/15. Micheg nag i pilyeg: 6/15. Pilyeg thin ko First Presidency Message, February 2016. Yapese. 12862 905
Rogon ni ngan Fil ko Biney e Mulwol
Ke yoeg President Uchtdorf ngodad ni “pagan’ gaed ngak Got min tay wo’en e gachalpen nib ga’ fan u wun’dad ngay.” Mu lemnag e picha’an ni gama sensey nag rogon ni kar pired ni kar tiyan’ “raed ko wo’ rodad nga tharmiy nge falfalen’ ni ngan laek e kanawo’ ko gachalpen Yesus” ni gubin ngiyal’ napan ni yaed be yaen u fithik e sikeng. Rayog ni ngam moeg ngoraed ni ngar lem niged e pi kanawo’ ni rayog ni ngar tiyan’ raed ko mich roraed nge Kristus napan ni yaed be magawon mag meybil ni ngam nang ko urogon ni ngam murwel ko ta’areb fa bukun e pi tafiney nem u lane yafos roraed.