Etop eke First Presidency, eke Ofiong Iba ke isua 2016
Ndida Ubom-ofim ke Ufot Ofim-yobio nkesim Isong ke Ifure
Itimke ibighe, nnwan-ndo mi, Harriet, ye ami ikodu ke anwa mbehe ubom-ofim kiet ndise nte mme ikpo ubom-ofim ewatde edisim isong. Ekedi usen eke akwa ofim ofimede, ndien okposong ofim ama ofime ye ubom-ofim emi ekedibeghede, anam mmo kiet-kiet ndifeme nnyung ntun ke nte eyomde ndisim isong.
Nte nnyin ikesede enwan emi ke ufot uduot-obot ye ukwak, ami nditi ukpebnkpo eke uwat ubom-ofim mi ye item eke ami nkekpebde do—ndien ekedikem nda mkpeb nno mme awat ubom-ofim efen emi edude ke ukpeb.
Ami nkesima nditing nno mmo ete, Ku-unwana ndikpak ubom-ofim man anam se afo oyomde ke ufot ofim-oyobio. Suhore-idem kanga, ku-bumere unam nkpo. Wuk enyin fo se ufot ndiwere-udim emi odude isong anwa ubom-ofim. Edieke afo awatde oworo okpong usung emi afo okpoduode ke isong, nam usop nditim nenghede ndudue fo. Nim ke akpaniko ete ke ubom-ofim fo enyene ukeme ndikan oyobio. Kaka-iso ndiwat tutu ofim osuhore ama.
Mme nta awat ubom-ofim efiok ete ke mmo kpukpru ini idikemeke ndikpeme mme nkpo eke editibede ikpere mmo. Mmo idikemeke ndikan ntre ofim oyobio. Mmo idikemeke ndinam edim ye snow osop. Mmo idikemeke ndinam ofim etre ndifime mme ndiwongore usung ofim.
Edi mmo nko efiok ete ke edi ndudue ndikop ndik mbanga ofim-oyobio ye okposong ofim—ndien akpan-akpan editre ndiyom se ekpenam koro ofim efime. Usung ndida ubom-ofim nsim isong ke ifure kini oyobio etibede edi ndika-iso ndu ke nnen-nnen usung uwat ubom-ofim nnyung nwat ofon ke nte ekpekemede ndinam.
Nte ami nsuk nsede nte ubom-ofim kiet ye eken ekesuhore osim isong ndien nti mme ukpeb eke ami nkebode ke mme isua eke ami nkedide awat ubom-ofim, ami ndikere nte mme iduhe ukpebnkpo ke esit emi eke nnyin ikpekpebde k’usen-k’usen ke uwem nnyin.
Nnyin ke kpukpru ini idikemeke nditre mme idomo eke nnyin idikutde ke uwem nnyin. Ke ubak ini mme nkpo iditibeke ke usung eke nnyin ikpeyomde ete mmo etibe. Nnyin imekeme ndifina idem oto ke mme nsongo-nkpo eke edikpu, eyighe, ndik, mfuho ye nnyekidem.
Ke ufot mme ini oro, emem nnyin ndibuaha ye ofuri nkpo eke edide idiok inyung ise ete ke mme mfina nnyin edi ata nkokure nkpo ke uwem nnyin. Nnyin iduo iduk ke idomo ke ndiwuk enyin ke mme afanikong eke ikutde ikan ndiwuk enyin nse Andinyanga ye iko ntiense akpaniko nnyin.
Edi oro idihe ata eti usung ke ndisanga mbe ke mme mfina nnyin ke uwem.
Ke ukem usung nte enyene-ifiok awat-ubom-ofim okpongde ndise oyobio edi owuk enyin ese ufot usung-uwat ye nnen-nnen ebiet emi ubom-ofim ediduode ituk isong, ukem oro nko ke nnyin inyene ndiwuk enyin nse adaha mbuotidem nnyin—Andinyanga nnyin, iko Abasi Esie, ye uduak eke Ete nnyin ke Enyong—ye akpatre udong nnyin—man ifiak inyong ke ifure ika ebiet-idung nnyin ke enyong. Nnyin inyene ndinim Abasi ke akpaniko inyung isin-ifik ke ndinam nkpo nte eti eyenutom akpanamde. Nnyin inyene ndiwuk enyin, udong-esit ye ekikere nnyin ke ndidu uwem ke usung eke akpanade nnyin idu.
Ndiwut mbuotidem ye edinim-ke-akpaniko nnyin ke Ete eke Enyong ke ndidadara nim mbet Esie eyeda inemesit ye ubong osok nnyin. Ndien edieke nnyin idude ke usung emi, nnyin iyebe idomo ekededi—ke suto usung idomo oro ekpedide—inyung ifiak inyong ika ufok heaven nnyin ke ifure.
Mme ikpaenyong eke ekperede nnyin ekpedi anwanga ye mme okpoyoho ye obubit enyong eke ebietde okposio idiok ofim-oyobio, nte mbet Jesus Christ, nnyin ibem-iso iyom obio-ubong Abasi ye mme edinen-ido Esie, idiongo ete edieke nnyin inamde oro, ke eyeno nnyin ofuri nkpo efen eke nnyin idiyomde (se ke Matthew 6:33).
Nso oruk ukpebnkpo eke uwem idi emi!
Nte nnyin iwakde ndikere mbanga mme nsongo-nkpo, ndutuho, eyighe, ye ndik nnyin, ukem oro ke nkpo akakabare awak ndisong. Edi nte iwukde enyin kabanga akpatre ebiet-idung heaven nnyin ye mme idara ke ndinam se eti eyenutom akpanam—ndima Abasi, ndinwam mbohoidung nnyin—nnyin iyekeme nditim nyo mme ini idomo ye oyobio ofon.
Ndima ufan, ke suto usung eke okposong nkpo akpakabare etibe ke uwem nnyin, iko Abasi Jesus Christ ke ofuri ini eyeno eti usung ndinam uduak nnyin oworo ada ke Obio-ubong eke Ete nnyin ke Enyong.
© 2016 eketode Intellectual Reserve, Inc. Ekpan kpukpru unen ndiming nwed emi. Ekeming nwed emi ke USA. Enyime edikabare ke Iko Mbakara 6/15. Enyime edikabare 6/15. Ndikabare Etop eke First Presidency Message, February 2016. Efik 12862 553
Ukpebnkpo eketode Etop Emi.
President Uchtdorf eteme nnyin ete inim Abasi ke akpaniko inyung isin-ifik isanga ke usung nte eti eyenutom. Kere banga ndibup mbon owo emi mbufo ekpebde nkpo danga nte mmo ekesin ifik ese akpatre ebiet-idung heaven nnyin ye ke idara ke ndisanga ke usung eti eyenutom ke mme ini emi mmo ekekutde mme idomo. Mbufo emekeme ndidoho mmo ete ekere ebanga mme usung emi mmo ekpekemede ndisin-ifik ke mbuotidem mmo ye ke Christ ke mme okposong ini ndien ebong-akam nte mmo ekpenam kiet mme ediwak kotu ekikere oro ke uwem mmo.