Lamharon
Pundasyon para sa Akon Panaksihon
Ang tagsulat nagaistar sa Idaho, Estados Unidos sang Amerika.
Sang ako nagaedad sang 16 anyos, isa ka abyan ang nagkadto sa amon puluy-an upod ang mga misyonero. Sa sulod sang isa ka bulan nga paghinambalanay, ang tanan ko nga mga pamangkot nasabat sing maathag. Akon nabatyagan nga ang Balaan nga Espiritu nagasaksi sa kamatuoran sang mga mensahe parte sa Pagpanumbalik. Isa yadto ka kinatuhay sa ano pa man nga akon nabatyagan, kag nakahibalo ako nga ang tanan nga ato matuod.
Ugaling, akon naeksperiyensyahan ang mas labi nga pagsikway kag oposisyon sa ano pa man nga tion. Akon nabatyagan ang pag-isahanon, kakapoy, kag pagkatublag. Kon akon ginahimo ang husto nga butang, ngaa nga nagapangatubang ako sang madamo nga kalisdanan? Indi ko mahangpan kon paano ang akon mga pagtilaw nangin para sa akon kaayuhan. Gintudloan ako sang mga misyonero nga magpuasa kag magpangamuyo. Kon ang mga bagay-bagay daw indi ko na mabatas akon ginapabutyag ang akon balatyagon kag sa gilayon mabatyagan ang pagpaumpaw sang Espiritu.
Ang semana sang akon bunyag napuno sang mga pagtilaw. Ginpahog ako sang akon boss nga pahalinon kon indi ko paglikawan ang akon bunyag para magtal-os sa isa ka empleyado, naospital ako tungod sa bato sa kidney, kag ginhambalan ako sang akon ginikanan nga magbiya sa amon puluy-an. Sa madamo nga mga butang nga wala ako sing kontrol, ang akon gid lang mahimo amo ang magdangop sa Ginuo.
Ang tagsa sadtong akon mga pagtilaw nag- gwa nga nangin para sa akon benepisyo. Ginbuligan nila ako nga matun-an ang parte sa mga doktrina sang ebanghelyo, nga naghatag sa akon sing pundasyon para sa akon panaksihon.