Mensahe sang Unang Panguluhan, Pebrero 2016
Paghugpa sing Luwas sa Kaundag
Wala pa madugayi, ako kag ang akon asawa nga si Harriet yara sa airport nagatan-aw sang matahum nga mga eroplano nga nagahugpa. Isa yadto ka mahangin nga adlaw, kag ang mamadlos nga dapya sang hangin naghampak sang nagapalapit nga eroplano, nga nagpabalang-balang kag nagpakudog-kudog sang tagsa sini sa ila paghilapit.
Samtang amon ginalantaw ang paindis-indis sa tunga sang natura kag makina, nadumduman ko ang akon kaugalingon nga inagihan sa paghanas sa pagpalupad kag ang mga prinsipyo nga akon natun-an didto—kag sa ulihi gintudlo sa iban nga mga piloto sa paghanas sa ila.
“Indi pag batui ang mga kontrol sang eroplano sa tion sang kaundag,” masami ko sadto nga ginahambal sa ila. “Magkalma ; indi magsala. Ituon ang imo mga mata sa linya sa tunga sang hulugpaan. Kon maglihis ka sa imo luyag nga alagyan sa paghugpa, maghimo sang maabtik pero nakalkula nga mga pagliwat. Magsalig sa ikasarang sang imo eroplano. Agwantaha ang kaundag.”
Ang eksperiyensyado nga mga piloto nakahangop nga indi nila makontrolar sa tanan nga oras ang mga nagakalatabo sa ila palibot. Indi nila basta-basta na lang dulaon ang kaundag. Indi nila mahimo nga dulaon ang ulan ukon niebe. Indi nila mapauntat ang paghuyop sang hangin ukon pagbaylo sang direksyon sini.
Apang ila nahangpan nga sala ang mahadlok sa kaundag ukon sa mabaskog nga mga hangin—kag ilabi na gid nga maparalisa sa ila. Ang pamaagi sa paghugpa sing luwas kon ang sitwasyon daw indi gid maayo amo ang pagpabilin sa husto nga alagyan kag banas sa pagdaos-dos sa pinakamaayo nga masarangan.
Samtang akon ginatan-aw ang sunodsunod nga paghugpa sang mga eroplano nadumduman ko ang mga prinsipyo nga akon natun-an sa akon mga tinuig bilang isa ka piloto, kag ginbinag-binag ko kon may yara man bala sing leksyon sa sini para sa aton adlaw-adlaw nga mga kabuhi.
Indi naton pirme makontrolar ang mga pagtilaw nga nagaabot sa aton kabuhi. Kon kaisa ang mga butang wala nagaugyon sa aton. Mahimo nga aton mabatyagan nga ginauyog kita kag nagabalang-balang tungod sang kaundag sang mga pagkadismaya, pagpangduhaduha, kahadlok, kasubo, ukon pagkabalaka.
Sa sinang mga panahon, madali ang mabuyo sa tanan nga nagakalatabo nga indi maayo kag itutok ang aton mga panghunahuna sa aton mga palaligban. Ang pagsulay amo ang magtutok sa mga pagtilaw nga aton ginaatubang sa baylo nga sa Manluluwas kag sa aton panaksihon sang kamatuoran.
Apang indi ina ang pinakamaayo nga paagi sa paglampuwas sa aton mga hangkat sa kabuhi.
Pareho sang eksperiyensyado nga piloto nga nagatutok indi sa bagyo kundi sa sentro sang hulugpaan kag sa insakto nga punto sa paghugpa, gani kita man dapat magpabilin nga nakatutok sa sentro sang aton pagtuo— sa aton Manluluwas, sa Iya ebanghelyo, kag sa plano sang aton Amay nga Langitnon—kag sa aton pinakamataas nga lalab-uton—ang magbalik nga luwas sa aton diosnon nga destinasyon. Dapat kita magsalig sa Dios kag himuon ang pagpabilin sa dalan sang pagka-disipulo nga sentro sang aton mga pagpaninguha. Dapat naton ipabilin ang aton mga mata, tagipusuon, kag hunahuna nga nakatutok sa pagpangabuhi sa pamaagi nga aton nahibaloan nga nagakadapat.
Ang pagpakita sang aton pagtuo kag pagsalig sa Amay nga Langitnon paagi sa malipayon nga pagtuman sang Iya mga kasuguan magadala sa aton sing kalipayan kag himaya. Kag kon magapabilin kita sa alagyan, malampuwasan naton ang anuman nga kaundag—wala’y sapayan kon daw ano man ini kabaskog sa imo panan-aw—kag makabalik nga luwas sa aton langitnon nga puluy-an.
Maathag man ukon puno sang makahaladlok nga mga panganod ang mga kalangitan sa aton palibot, bilang mga disipulo ni Jesucristo aton una nga pangitaon ang ginharian sang Dios kag ang Iya nga pagkamatarong, nga nakahibalo nga kon aton ini himuon, ang tanan nga iban pa naton nga kinahanglanon sa ulihi igatigana sa aton (tan-awa sa Mateo 6:33).
Daw ano kaimportante nga leksyon sa kabuhi!
Sa sobra naton nga pagtutok sa aton mga kabudlayan, sa aton mga paghimud-os, aton mga pagpangduhaduha, kag aton mga kahadlok, mas nagabudlay na gid ang mga bagay-bagay. Apang sa mas maukod naton nga pagtutok sa aton pinakadiosnon nga destinasyon kag sa kalipayan sa pagsunod sa dalan sang pagka-disipulo—pagpalangga sa Dios—pag-alagad sa kaingod—mas daku ang tsansa nga kita mangin madinalag-on sa pagpadayon sa mga tinion sang kagamo kag kaundag.
Pinalangga ko nga mga abyan, bisan ano pa man kamadlus ang paghagunos sa aton palibot sang mga hangin sang aton dutan-on nga pagsinalayo, ang ebanghelyo ni Jesucristo padayon nga magatanyag sang pinakamaayo nga paagi sa luwas nga paghugpa sa ginharian sang aton Langitnon nga Amay.
© 2016 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/15. Pagtugot sa paglubad: 6/15. Paglubad sang First Presidency Message, February 2016. Hiligaynon. 12862 861
Pagtudlo gikan sa Sining Mensahe
Si Pangulong Uchtdorf naglaygay sa aton sa pag-“salig sa Dios kag sa paghimo sang pagpabilin sa dalan sang pagka-disipulo nga sentro sang aton mga pagpaninguha.” Binagbinaga ang pagpamangkot sa inyo ginatudloan kon paano sila nagpabilin nga nakatutok “sa aton katapusan nga destinasyon kag sa mga kalipay sa pagsunod sa dalan sang pagka-disipulo” sa mga tinion nga nag-atubang sila sang mga pagtilaw. Mahimo ninyo sila agdahon sa paghunahuna sang mga pamaagi nga sila makatutok sa ila panaksihon kag kay Cristo sa mabudlay nga mga tinion kag sa mapinangamuyuon nga pagpamat-od kon paano idapat ang isa ukon masobra pa sinang mga ideya sa ila mga kabuhi.