Mensahe sa Visiting Teaching, Pebrero 2016
Ang Pag-asawahay Gintangdo sang Dios
Tun-i sing mainampuon ining materyal kag magpangamuyo agud mahibaloan kon ano ang ipaambit. Paano ang paghangop sang “Ang Panimalay: Isa ka Proklamasyon sa Kalibutan” makapadugang sang inyo pagtuo sa Dios kag magabugay sa ila nga inyo ginabantayan paagi sa visiting teaching? Para sa dugang nga impormasyon, maglog-on sa reliefsociety.lds.org.
Pagtuo, Pamilya, Bulig
Ang mga propeta, mga apostoles, kag mga lideres nagapadayon sa sincero nga pag-“proklamar nga ang pag-asawahay sa tunga sang isa ka lalaki kag isa ka babayi ginmando sang Dios kag nga ang panimalay labing importante sa plano sang Tagtuga.”1
Si Elder D. Todd Christofferson sang Korum sang Napulo’g Duha ka mga Apostoles nagsiling: “Ang panimalay nga natukod sa ginkasal nga isa ka lalaki kag babayi nagadulot sang pinakamaayo nga kahimtangan para sa plano sang Dios nga magpadayon. …
“… Indi kita o bisan sin-o man nga mortal ang sarang makaliwat sining diosnon nga sugo sang pagpakasal.”2
Si Bonnie L. Oscarson, pangkabilugan nga pangulo sang Young Women, nagsiling: “Ang tanan, wala’y sapayan kon ano man ang ila sirkumstansya sa kasal ukon kadamuon sang kabataan, mangin taga-depensa sang plano sang Dios nga ginlarawan sa proklamasyon sang panimalay. Kon iya ina plano sang Gimuo, dapat aton man ina nga plano!”3
Si Elder Christofferson nagpadayon: Ang iban sa inyo wala mahatagan sang bugay sang pagpakasal bangud sa mga rason nga nagalakip sang kakulangan sang nagasantù nga mapamana ukon mapangasawa, ang pagkabihag sa kasubong nga kinatawo, mga kasablagan sa lawas ukon hunahuna, ukon tungod lang gid sa kahadlok nga mapaslawan. … Ukon ayhan nagpamana ukon nagpangasawa kamo apang ina nga pagpamana ukon pagpangasawa nagtapos na. … Ang iban sa inyo nakapamana na apang indi makapanganak. …
“Bisan pa, … ang tanan makabulig sa nagalapnag nga diosnon nga plano sa tagsa ka henerasyon.”4
Dugang nga Balaan nga mga Kasulatan
Genesis 2:18–24; 1 Mga Taga-Corinto 11:11; Doctrine and Covenants 49:15–17
Mga Buhi nga Sugilanon
Si Brother Larry M. Gibson, anay unang manuglaygay sa pangkabilugan nga panguluhan sang Young Men, nakahinumdum sang si Shirley, nga subong iya asawa, nagsiling:
“‘Palangga ko ikaw tungod nakahibalo ako nga mas palangga mo ang Ginuo sangsa akon.’ …
“Ina nga sabat nag-igo sang akon tagipusuon. …
“… [Kag] luyag ko nga pirme niya mabatyagan nga palangga ko ang Ginuo labaw sangsa tanan nga iban pa.”5
Si Elder David A. Bednar sang Korum sang Napulo’g Duha ka mga Apostoles nagpanudlo: “Ang Ginuong Jesucristo amo ang pinakasentro sa kaangtanan sang pag-asawahay sa sulod sang kasugtanan. … [Huna-hunaa nga] ang Manluluwas yara sa pinakatuktok sang isa ka trianggulo, nga may isa ka babayi sa idalom sang isa ka kanto kag isa ka lalaki sa idalon sang pihak nga kanto. Karon binagbinaga kon ano ang matabo sa kaangtanan sa tunga sang lalaki kag babayi samtang ang tagsa sa ila padayon nga ‘nagapalapit kay Cristo’ kag nagatinguha nga ‘mahimpit sa Iya’ (Moroni 10:32). Tungod sa kag paagi sa Manunubos, ang lalaki kag ang babayi mas nagalapit sa isa kag isa.”6
© 2016 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/15. Pagtugot sa paglubad: 6/15. Paglubad sang Visiting Teaching Message, February 2016. Hiligaynon. 12862 861
Binagbinaga Ini
Paano ako sa akon kaugalingon makapadayon sa “pagkari kay Cristo”?